再窮都要去旅行！

喜茶

用餐日期：2018/05/13

早個幾禮拜前睇小紅書見有人分享喜茶又有新品推出，追上黑糖鮮奶潮，非常心動

頭一星期只限於各城市黑金店先有售，直至而家其他分店都已經加入新品，貫徹品牌一向都鐘意用嘅營銷方式，第一日仲做買一送一添。

遇左一定會排長龍，所以中午就到深圳，去左三家分店，包括寶能、車公廟、世界之窗店都賣光光，唔知幾點鐘再有，打算放棄

但接近黃昏時間喺羅湖區按摩前，死不心息去到東門店又撞著有供應，真係踏破鐵鞋乜乜其實去過數間分店，最唔鐘意就係東門店，本地人同香港人都多，冇計啦，咁啱得咁橋！

而家其他飲品已經可以用微信掃QR Code落單並支付，算係消化左部分人流，但不適用於新品。（新品要排隊購買）

由排隊到下單排左35分鐘，但取茶只係十零分鐘。見有咁多人排隊，都堅持只有一個店員收銀，沖茶速度比落單快，積聚人潮

有心分流，大可以開多幾個收銀，或者搵店員喺門口一路落單。可以話呢種飢餓營銷法低手，但亦可以話幾湊效。

飲品分布蕾波波茶、奧利奧波波茶，可配鮮奶或鮮奶茶，糖度、冰度可自選，較有彈性。

為左試下分別，我地一杯點鮮奶，一杯點鮮奶茶，一杯正常糖，一杯少糖，但我覺得甜度方面冇明顯分別。

布蕾波波茶/正常冰正常糖 RMB¥19

類似喺小摘堂茶嘅炙燒波霸奶，將好薄身嘅焦糖層燒過，下面係招牌芝士奶蓋，再配鮮奶、黑糖珍珠。

提供匙更仔，可以先試焦糖配奶蓋，奶蓋係無敵，其他飲品店無法相提並論，如果焦糖層再厚身、脆啲會更好

鮮奶睇到係國內品牌，奶味冇其他用明治或者維記奶嘅咁突出，相對較淡。即使點正常糖都唔係話好香黑糖味，略為失色。

珍珠係大粒size，比一芳大粒，類似鹿角巷，口感幾有噍頭，份量唔多。

係咪好甜，我就唔覺，加上冰塊多，稍微溶化後就會啱啱好冰塊溶化前已經飲完，未至於去到底會變奶水。

奧利奧波波鮮奶茶/正常冰少糖 RMB¥19

面頭係oreo碎加芝士奶蓋，相對布蕾波波冇咁特別。鮮奶配嫣紅茶底，茶味明顯，都係一杯正常嘅珍奶。

總結：質素並唔係非飲不可，但比同類型飲品便宜，到熱潮過後都可試吖

都係嗰句，我對芝士奶蓋茶底飲品以外的，都係純粹抱集郵心態去試。

喜茶嘅其他IG帖文：http://bit.ly/2AaOZpc

喜茶 (東門店)

地址： 深圳建設路3018號1234space二樓L212鋪

其他深圳嘅飲品、麵包店介紹：

【深圳一日遊】奈雪の茶 http://bit.ly/2k5ntDO

【深圳一日遊 - 歐包熱】樸悅間 http://bit.ly/2iZDyY2

【深圳一日遊】喜茶 - 超級網紅店 http://bit.ly/2iXC3ts

【深圳一日遊】維星Veones http://bit.ly/2Ki5Edk

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

青花 Champak Restaurant

用餐日期：2018/05/07

喺波鞋街The Forest入面餐廳唔多，相信呢間青花都係最亮眼了，配合埋商場風格，裝潢簡約年輕，以好多綠色植物、盆景裝飾天花、牆身，環境舒適

配合窗外自然光，塑造清新自然感覺。連同餐具、大理石紋枱面，手殘都影到靚相

唔知道平日如何，週日晚市七點鐘已經全場滿座，很受歡迎。

餐牌供應泰式fusion菜，有沙律、小食、湯品，主食選擇唔多，有咖喱、盲鰽、炒蜆、炒菜等，另有飯麵、包餅、甜品。

二人套餐定價$428，配搭都可以，包括小食/湯、主食、炒菜、飯/包餅、飲品、甜品

由於事前睇過唔少食評作參考，想試其中一個甜品，而套餐唔包括，所以決定單點。

冬蔭公炸雞翼 $72

一份六隻，即點即炸，外皮非常脆口，亦唔油膩，雞肉並冇過火。冬蔭味道主要來自雞皮，基本上唔辣，幾明顯幾惹味嘅

黃咖喱海鮮 $138

食物擺盤確實幾精美，裡面有蜆、魷魚、大蝦，二人用足夠。四粒大蝦爽口新鮮，蜆肉偏細粒，乾淨冇沙，魷魚圈都仲幾嫩口。

黃咖喱質地稀身，適合撈飯或者沾麵包，可惜唔係太啱我地口味，唔夠香濃，可能椰漿落得比較少，食落有陣陣奇怪嘅香料味…

油酥手抓薄餅 $52

一份四片，用黎配咖喱類一流。手抓餅做得唔錯，入口冇油膩粉感，厚薄適中，面頭微微燶焦，襯熱食鬆軟

泰式肥豆兒醬炒芥蘭 $68

鐘意呢度用芥蘭苗，冇咁老，調味冇平時泰菜咁重口味，份量不少。

女仔當然係對甜品更有興趣，雖然知道芒果糯米飯比較多人推介，但個人十分期待花生芭菲

焦糖爆谷花生芭菲 $58

想試好耐嘅花生芭菲，整體都唔會太甜膩，鐘意花生醬嘅朋友可以一試。芭菲面頭唧上少量忌廉、焦糖醬緩衝。

彩色龍鬚糖不期然令我諗起姊妹店ATUM嘅甜品，最後以爆谷、花生碎伴碟

原本唔期望爆谷，但又幾好食喎，焦糖脆口冇通風。花生芭菲濃郁，連埋焦糖醬、花生粒一齊食係大滿足。

唯獨舊芭菲雪得比較冰凍，口感扎實，幾乎要剉住食。

蝶豆花椰子奶蓋 $32

適合相機食先嘅飲品，加入蝶豆花原素，做出清晰漸層效果。

奶蓋比較接近奶泡，比較虛無，味道偏甜，幸好搞勻後飲用，則與一般椰汁冰無異。

泰象青檸梳打 $36

餐牌：

青花 Champak Restaurant

地址：旺角奶路臣街17號The Forest 1樓107-108號舖

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com