再窮都要去旅行！

Royal-Place尚堂．手感の创作屋

用餐日期：2017/02/18 & 2017/03/12

文創村係澳門首個以文化創意為主題嘅集中地，座落水坑尾百老匯中心，佔地三層。

三樓主要提供餐飲，以小食、咖啡為主，而且有唔少位置，文青大可參觀完喺度稍作休息，醫肚。

但時間、肚皮所限，未能一一試哂，但都有兩間小店可以推介俾大家。

Royal Place主打用各種日本原材料製成甜品、食物、飲品，特別強調使用日本宇治市最有名嘅茶園之一 -  丸久小山園嘅抹茶粉，用上屬於上級水平嘅若竹抹茶粉。

除左手作抹茶雪糕，仲提供一系列抹茶/焙茶手沖茶。

​​

宇治抹茶拿鐵 $33

呢個自稱係全澳首創嘅漸層宇治抹茶latte，以標榜使用日本抹茶粉沖嘅飲品以言，定價合理。

宇治抹茶拿鐵用上丸久小山園抹茶粉，加上明治4.3牛乳，抹茶、牛奶漸層明顯，賣相討好，飲用前需搖勻。

老闆娘介紹時話佢地嘅抹茶飲品甜度較低，著重回甘，希望參照日本正宗手法。

聽到呢句，我地已經有哂心理準備，因為我地最怕台式飲品嘅甜水感覺。

雖然見過有人話呢杯飲品普通，所以成日都話口味呢樣野好主觀…我地兩個偏偏幾鐘意…

如果你喜歡甜度較高，奶香重嘅latte，呢杯或許唔啱你。

首先呢杯拿鐵甜度可以話係零，適合平日飲野都自動要求少甜嘅我地 唔知係咪因為使用明治牛乳，奶味相對薄弱，所以亦都能夠解釋何以完全唔甜。

抹茶味突出，質地厚滑，有回甘效果，唯飲到尾會有少許苦澀。

宇治焙茶沙冰 $33

天氣開始悶熱，覺得拿鐵唔夠涼爽，可以選擇沙冰。

比起抹茶，焙茶少了一份苦澀，但茶香濃厚，完全唔甜膩，更推薦焙茶飲品！

沙冰打得夠碎，入口即溶。

特別係天氣唔好嘅時間，見到老闆娘嘅小字句，可以提起勁，繼續一日嘅行程！

除左提供抹茶/焙茶飲品、手作雪糕，呢度仲有幾款大熱口味嘅芝士撻，分別有芝士、宇治抹茶、宇治焙茶、限定嘅紫薯，四種口味。

宇治焙茶芝士撻 $18

呢個焙茶撻一試愛上，推介呢款啊！選用上等宇治焙茶再人手製成撻皮，令我最近沉迷焙茶嘅源頭。識食真係要食焙茶！

焙茶芝士撻外形精緻，微溫。

咬落去流心效果明顯，焙茶澎湃。

烘過嘅茶茶香濃厚，微微炭香，但冇抹茶嘅苦澀，甜而不膩

曲奇餅皮鬆脆，好好食！

紫薯芝士撻 $18

個人對紫薯食品唔係好沉迷，但亦都唔抗拒，所以都試埋呢件期限定嘅紫薯撻。

小店用嘅係純天然紫薯，每日新鮮製作，冇添加人造色素，可以放心食。

紫薯味道唔算好強烈，味道帶甜，天然唔假，配合芝士撻都唔會好膩。

同焙茶撻一樣，紫薯撻嘅流心效果都澎湃！（燈光不足，相機有色差喔）

價錢唔貴，唯獨size偏小，感覺比香港食開嘅芝士撻再細啲。認真講，我兩啖可以食完啊，勁回味！

水坑尾百老匯中心

無論香港、台灣、國內都愈黎愈多市集、文青聚集地，推動創意產業，一眾手作人、從事藝術創作人都有機會喺各平台展示自己嘅作品。

香港有元創坊，台灣嘅華山、松山文創園區，什至深圳都有華僑城創意文化園。至於澳門？

文創村係澳門首個以文化創意為主題嘅集中地，座落水坑尾百老匯中心，佔地三層。

當日我地週五去到，可能係平日，大部分店鋪都未有營業，什至見到部分鋪位尚未租出，可以逛嘅唔多。

一樓、二樓中有商品零售、手作小店、藝術品展示、漫畫作品展。

令我諗起香港嘅「油街實現」。

其中我停留最耐就係呢間乾燥花小店，裡面有唔少手作乾燥花擺設，飾品。

週末定期會舉辦工作坊，週末人流會較旺。

不過想對其他地方嘅文創村，澳門呢個仍然發展中，希望之後會有多啲創作人加入，加強該處吸引力。

至於三樓主要提供餐飲，以小食、咖啡為主，而且有唔少位置，文青大可參觀完喺度稍作休息，醫肚。

咖啡店

熱狗店

雞蛋仔

由於時間、肚皮所限，未能一一試哂，但都有兩間小店可以推介俾大家。

澳門文創村

地址：水坑尾街258號百老匯中心3樓

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com