再窮都要去旅行！

宗像屋

用餐日期：2018/04/08

位於深水埗嘅呢間丼店，已經講左好耐好耐好耐話想試，我諗有一年，哈哈。最初開嘅時候真係人頭湧湧，而家情況稍緩，假日都好快入座。

宗像屋裝潢日式，以淺木色為主，座位唔多，一邊係L字型嘅高枱櫈，但鋪面又幾闊落，一至四位會比較容易等位。

餐牌單一，只有4款丼飯，話就話四款，嚴格上係好相似嘅野，定價$108-298，在於魚生種類唔同，大約十至十二種，最貴嘅丼會有蟹肉、海膽。 

麻醬吞拿魚

吞拿魚正正常常，唔係咩靚料，可用黎配茶漬飯。  

梅 $108、竹 $148

飯嘅製作相信很簡單，點單前後不到幾分鐘，就上齊四個飯。兩款丼嘅魚生種類一樣，只係竹嘅魚蓉份量較多，相差40蚊。

魚生有：吞拿魚、吞拿魚蓉、北寄貝、希靈魚、帶子、甜蝦、三文魚籽、魷魚、油甘魚、鯛魚，一共十款。

丼飯賣點為一丼三食，可當一般魚生飯咁食，另外提供兩片紫菜，可以自製手卷，最後可叫店員加湯變成茶漬飯。

所有魚生混合碎上為蓉，做成魚生山，加入青瓜、蔥粒、白芝麻。  

魚蓉眼見以吞拿魚蓉、三文魚籽佔多，其他魚生份量不多，就算有，都感覺唔到，偶然會食到北寄貝、希靈魚、蝦嘅碎片。

每種魚生嘅味道唔係太明顯，又未至於肥美，但亦唔覺下欄。飯量大概係筒嘅一半，足夠一人用，飯粒雖有芝麻，未有醋香，比較普通。

鐘意食魚生飯嘅朋友未必喜歡呢黎虛無嘅魚蓉，或者偏好實在嘅魚生片。

勝在做法比較有新鮮感，貪得意，包紫菜食亦都可以冇咁膩口，可惜只有兩片。

而最後嘅茶漬飯卻出奇地幾對我胃口，湯頭夠熱，清甜有芝麻香。可能我老土啲啦，有熱野入胃，會舒服啲

如果為魚生以來，或許會失望；但好似我地咁為三食嘅做法而來，又覺得可以

但你問我有冇下次呢，又未必有，畢竟款式唔多

宗像屋

地址：深水埗青山道60號地下B舖 

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://http://bit.ly/ywycarol

Contact us: mrmrsfoodhk@gmail.com

甜圓坊

用餐日期：2017/09/17

喺呢間台灣菜仲係試業時已經mark低左想要一試，奈何經唔少媒體介紹過後，小店嘅人氣不一般，加上正值暑假，有唔少人都慕名去。

嗰次下午四點幾去到，甜品已經售罊，我地意欲都減半，而且門外有十幾人排隊，只怪我地耐性比平常人低，唯有轉去康瑞

事隔個零月，喺鴨寮街辦完事，即管過黎睇睇咩環境。 週日六點半鐘，排隊嘅人就冇上次咁多，但店內已經滿座，睇清楚甜品冇售罊後，我地就決定等位，幸運地只係等左十分鐘。

小店嘅位置唔多，有部分係高枱，其餘係窄到肥少少都坐唔到，背貼背程度，唔會舒適，主要係土地供應問題啦

裝潢普通，但全店只有兩個店員，客人爆滿，感覺不論樓面定廚房兩者都承受唔到咁嘅客量，有外賣嘅人等唔切取消單退錢、有堂食嘅客人等候時間太長，難怪評語好壞參半。

相信未來除左穩定品質外，人手短缺都係店主要解決嘅一大問題。

餐牌選擇唔多，主食有滷肉飯、焢肉飯、排骨飯、油蔥拌麵；小食有皮蛋豆腐、青菜、酥炸排骨同售罊嘅鹹酥雞。

甜品方面有芋圓、仙草、西米露、剉冰及兩款甜湯；飲品有珍奶、仙草撞奶、檸茶檸水咖啡酸梅湯，及暫停供應嘅沙冰類，定價唔貴。

食物大約等左十幾分鐘，個人認為可以接受，仲比想像中快添 (笑)

手工滷肉飯 $30

新鮮熱辣上枱，滷肉偏肥膩，滷汁唔會太鹹，反而覺得飯粒太濕笠，滷蛋冇乜味，口感偏硬實。

整體唔伏唔難食，但只係普通質素。

香酥排骨飯 $45

個人認為排骨飯嘅味道唔錯，排骨現點現炸，上枱都係熱辣辣。

豬排切成條狀，size正常，唔會太厚身，食落唔韌老唔黐牙。

表面沾上好多淮鹽，做成鹽酥效果，入口唔脆，但鹹鹹地，幾好送飯。

嫩仙芋奶凍 $25

最多人介紹嘅當然係小店嘅甜品，費事食完主食先冇哂嘅關係，我地直接落埋單，所以甜品係最快上枱。反正都係食落肚，次序不用分那麼細

仙芋奶凍係仙草底，另一款「總匯」係冰底，我地揀左前者。

仙芋奶凍嘅配料都幾豐富，有仙草、西米、芋圓、地瓜圓、湯圓、薏米、紅豆、珍珠，附上ucc奶。

仙草令我諗番起多年前有人送我一罐台灣嘅仙草，味道接近，質地滑溜，唔會似涼粉，甜度唔高。

乜圓乜圓味道較淡，口感實淨唔算好煙韌，反而珍珠幾好咬口。

最O咀係大部分配都係黐埋一舊…

珍珠奶茶 $10、仙草紅豆撞奶 $10

飯麵配特飲係加$10，飲品味道一般，珍奶冇茶味，奶又唔香，只有珍珠係ok

至於仙草撞奶，奶味重到我完全唔覺得有仙草…同類型飲品我真係覺得康瑞更出色。

面對網紅店，除左要講價錢、食物質素，仲要考慮值唔值得等，呢間唔多值。

想食仙草我都係去番康瑞算了，想食台灣野我都係鐘情請坐。

甜圓坊

地址： 深水埗基隆街205號地下

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

康瑞涼茶

用餐日期：2017/01/15

已經睇過無限咁多人、雜誌介紹過康瑞甜品，我地亦都想食好耐！上次食生煎包時，有經過但未開門，所以冇食到…

糖水款式唔多，價格親民，20至25蚊就食到碗糖水~

---

特式仙草百配 $25

喺網上見過唔少圖片，發現我呢碗同大部分人嘅有少少出入…或者係唔同師傅做嘅都有所不同(?!)

(人地啲相睇落多好多料)

我呢碗就有大量仙草，仙草係食過質地最滑溜！「嗖」一聲就吞左落肚，仲帶淡淡甘香！

當中仲有西米、紅豆、薏米、珍珠 ~
以咁嘅價錢，能夠有咁多種類材料、質素，難怪咁受歡迎！

漢發麵家

用餐日期：2016/11/26

出發去韓國前，打算去鴨寮街買電話卡，男朋友乘機提出要去食佢至愛膶牛麵。

我大鄉里第一次黎，週日都等左一陣先有位。雖然座無虛席，不過翻桌夠快。
另外我覺得環境比我想像中企理、空間感足，雖然搭枱係基本，都唔會覺得又逼又狹。

而且店員全部都好有禮，老闆老闆娘都係落手落腳做的。

所以有時唔係話出左名就有資格有道理態度差嘅，至少呢次我對漢發印象好好。

豬膶炒牛麵  $39

男朋友認為好食過維記~豬膶保持到滑身，同一時間又係好爽口，唔韌，仲成塊餐肉咁厚！冇腥臭味再加上香濃薑汁味~識食仲一定要加兩蚊要炒牛，牛肉更香口~

法蘭西多士 $32

貴就貴左少少，但真係好食！現場製作，需時等候。落單時可以選擇要煉奶定糖漿~蛋漿充足，加上一大片牛油，表面炸得好鬆軟！

比起瑞記嘅西多爭好遠~呢份好食得多！（價錢不過差$10，抵俾）

油菜$18

油菜純滿足我地無飯夫婦少食菜嘅慾望，普通菜一碟，冇特別。

凍檸茶$16

凍奶茶$16

凍檸茶凍奶茶，茶味足，而且夠大杯！

出左名嘅食店都維持到食物質素同服務，長期咁好生意有原因。另外豬扒、鳳爪都值得一試~