再窮都要去旅行！

三家村水產

用餐日期：2017/11/09

浜燒係日本沿海居民嘅飲食文化，會將捕獲嘅海產喺碼頭即燒即食，香港嘅鯉魚門最近都開左一家主打浜燒嘅日本料理， 佔地三千幾呎，每日供應多款由日本、本灣等各地引入嘅新鮮海產，以最原始嘅方法浜燒黎食。

裝潢方面，都係落足本，甚有日式風味，令人諗起日本嘅浜燒店。因為餐廳位於三家村碼頭旁，黃昏時候前往，更有機會一邊用餐，一邊睇到海景、日落景色

餐廳位於碼頭，位置闊落，近門口位置可以見到擺放魚缸同冰櫃，擺放當日新鮮運到嘅海產，菲律賓石蟹、花金鼓、池魚、日本生蠔、花竹蝦、各款貝殼類等。

客人可以親自去揀選，明碼實價，食得放心（豐儉由人）

裝潢方面花過唔少心思，用上木、竹等元素，具日式風味。人多嘅可以考慮預訂房間，更近海邊，不過我地就冇問及房間最低收費。

餐牌供應沙律、前菜、時令海產、刺身、壽司、丼飯、烏冬、燒物、炸物、甜品等，定價中上。

海膽鮮甜冇腥味，口感綿滑，夾埋脆口紫菜，連平時唔好海膽嘅我都食唔停口

帆立貝、油甘魚柔軟鮮味，基本上對呢八款刺身嘅新鮮度無需懷疑

壽司：海膽軍艦 $70/件、香蔥吞拿魚腩軍艦 $45/件、蟹籽軍艦 $35/件、黃金魷魚軍艦 $35/件

天婦羅海老卷 $160

生蠔 $40/隻

日本生蠔都幾大隻，蠔身燒到脹卜卜，軟滑多汁，鐘意食蠔嘅朋友不能錯過，定價合理

帆立貝 (浜燒) $98/隻

即時剪開左，每份依然係好大隻，一口放入，口感豐滿，貝身軟腍，不過就冇想像中鮮味相對之下，生蠔更加抵食。

中蝦 (浜燒) $168/4隻

馬刀貝 (浜燒) $118/4隻

燒油甘魚骹 $120

雖然平時唔係好鐘意食魚頭、魚骹，但十分推介呢款油甘骹，簡單鹽燒已經好香，魚骹冇細骨，而且魚肉好嫩滑，魚油豐富，完全唔乾

清酒蝴蝶蚌 $188/8隻

炸白飯魚乾 $48

岩鹽枝豆 $45

榮華冰室

用餐日期：2017/02/05

懷舊呢個兩個字近年愈黎愈值錢，有唔少餐廳都以呢兩個字為題，喺裝潢、菜式花唔少心思，令食客感受嗰種懷舊氣息，但比起有故事嘅老冰室硬係爭少少野。

講到「真懷舊」都唔少得榮華冰室，佢未必係人生必食嘅餐廳，卻係歷史嘅見證，買少見少。

有唔少城市人都會襯假期鑽窿鑽罅尋找美食，唔怕遠嘅可以一試呢間經營幾十年嘅老冰室。

由油塘出發，可以喺藍田鐵路站，坐小巴23C前往，幾分鐘就到茶果嶺村，會見到有個小公園設施，直行轉右便是。

選擇步行亦可，經麗港城，沿茶果嶺道進入村內，大概15-20分鐘。

個人而言，對懷舊味興趣唔係特別大，平時亦都唔會故意去搵呢類冰室光顧，因為我由細到大都住喺村屋，屋企嘅陳設基本上同懷舊冰室無異。

我地都係咁啱去到油塘，先順道過黎食個下午茶，落車後都搵左一陣，特別多謝有街坊見我地唔係村內人，加上一副疑惑，主動問係咪要去榮華，再指出方向，足見冰室名氣。

由於係週日，客人不少，相信有部分都係專程過黎，都舉住相機影過不停。

由門外鐵閘、天花吊扇、木椅木凳、褪色海報、手寫白板餐牌，或許對老一輩而言，滿滿回憶。

見我拎起手機影相，老闆娘都問我係咪好有特色，我笑笑回應佢，我都係某村村民，不過唔係茶果嶺村啫，哈哈。

五香肉丁麵 $16

榮華冰室一律採用出前一丁麵，無需額外加錢，淨係呢樣野已經絕哂種啦！

肉丁都係用靚野，仲要料多，成碗麵咁靚仔，我仲有咩要求？

魚片餐肉麵 $16

魚片、餐肉輕輕煎過，香口啲但唔會燶，冇鍋撈，一樣係丁麵，結合價錢，又係無得輸

雞翼尖 $13

作為雞翼尖控，見到雞翼尖係必點的。

雞翼尖用鹵水燜煮，好腍身，入味，入口離骨。唔係味精，仲食到姜蓉味，好突出！

呢個似阿媽煮嘅餸，十三蚊，一碟唔夠喉，要encore。

西多士 14

眼見每枱都會點，住家做法，冇花巧可言，西多唔會太厚身，已經切開成九宮格，方便即食，加上牛油、煉奶，即叫即做。

香口，唔膩，又唔會太甜，好抵食

凍奶茶 $11

凍檸檬茶 $11

比較普通，茶味單一，偏淡，可能因為小本經營，唔會用上好幾種茶葉去混合做茶胆，凍檸茶比奶茶好喝，檸檬份量足夠，令我不期然諗起平時啲茶記少得可憐、揸乾水嘅檸檬片…

另外留意到佢地嘅冰全部自製，唔係乾冰，一般茶室真係啋你都有味。