再窮都要去旅行！

窩子

用餐日期：2018/12/24

位於新蒲崗的窩子位置不多，懷舊裝潢、綠色牆身、地磚等，就好像昔日的冰室設計，配搭木製家具、桌椅，成為文青熱點。

餐點以輕食為主，意粉、甜點、咖啡等，其中梳乎厘鬆餅性價比高，水準不俗，難怪深受歡迎

小店位置唔多，用上木枱木櫈、陳年擺設、半開放式廚房隱約可見

下午茶餐牌印刷幾懷舊，餐牌供應沙律、包、意粉、薄餅、窩夫、熱香餅、千層酥等 ，定價$48-56，附伯爵茶/果汁。

最期待的梳乎厘鬆餅共四款，分別有草莓、牛油黑糖漿、抹茶紅豆及提拉米蘇，定價$75-110。即點即製，需時等候。

煙三文魚配田園沙律 $56

田園沙律當然是想像得到的味道，三文魚印象中有5大片，灑上香草，不會過鹹，沙律菜新鮮。即使我們已經吃過午飯，仍短時間內將沙律清空。

菠蘿汁 (跟餐)

黑松露炒蛋吐司 $48

黑松露香而不膩，炒蛋嫩滑，多士烘至脆身，但不會過硬，有點意想不到的好吃

伯爵茶 (跟餐)

雜莓窩夫 $56

即時製作，有三小件窩夫，伴碟有忌廉、雪糕、雜莓醬、士多啤梨及oreo碎。

窩夫蛋香有點不足，稱不上外脆，但都內軟，不會乾身，加上配料，口感豐富

草莓梳乎厘鬆餅 $75

即時製作，需時等候，約三十分鐘上枱，雲石盤盛載，賣相不錯呢。梳乎厘共有三件，倒上大量忌廉、脆脆，草莓味嘅意思係另上草莓醬，價錢合理。

鬆餅上枱時脹卜卜，厚身飽滿，鬆餅軟綿，空氣感低，口感實在，不會過份濕潤未熟，亦不會乾爭爭

蛋味濃郁，聞得到亦吃得出，不輸日本的梳乎厘班戟。但如果喜歡風一般、空氣感重的梳乎厘，未必滿足到你呢。

忌廉輕盈細膩量多，面頭大大粒的焦糖脆脆有加分，香甜脆口，果然性價比高！

雖然位置不算便利，但小店出品有水準，特別推薦鬆餅，不妨襯假日來窩子一嚐。

窩子

地址：新蒲崗仁愛街36號地下

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

茶作

用餐日期：2017/07/02

茶作最近人氣甚高，平日唔多追趕新事物嘅我地都湊湊熱鬧，只因聽到佢地有手作雪糕，提到雪糕，我總係百吃不厭。

茶室位處新蒲崗工廈，對我而言就唔係太方便，為左食杯雪糕，認真係長途跋涉，不過位置都唔難搵。 

媒體介紹後翌日我地12點半到達，可能剛開門不久，只有老闆同一位店員，坐左半小時後，我就非常慶幸自己一大早出門口嘅正確決定。 想唔到有咁多人都同我一樣，咁早黎朝聖呢

店內環境舒適，唔係古板嘅茶居，座位唔多但空間感足。

裝潢花過唔少心思，淡黃燈光、梳化、木製枱櫈，陳設茶具、乾花、書本，每個角落都係影相位，播放輕柔音樂，客人唔多嘅時間確實幾寫意

餐牌選擇不多，只有傳統中國茶配茶點、手工奶茶、梳打花茶、冷泡茶、手工意式雪糕。

見舊日有窩夫、小食等，現在並無供應，咁樣也好，畢竟茶室同一般嘅工廈cafe路線理應不一，茶先係主角。

中國茶種類較多，有普洱、鐵觀音、龍井、碧螺春、紅茶、花茶等，定價 $60-85；其他冰茶花茶定價 $32-38；雪糕一律 $30/125ml。

一場黎到，都唔會只食杯雪糕就離開，所以我地每人點左一款茶。 每款中國茶都有少量茶葉sample，方便客人可以聞下較喜歡邊款味道。

碧螺春 配茶點 $75 

一份中國茶連兩塊蝴蝶酥，用上曾經瘋搶嘅駱駝牌水壺，客人可以自己行沖泡。

老闆先作示範，碧螺春屬綠茶一類，直接用熱水撞落茶葉，有機會造成茶澀，佢建議我地沿住壺邊慢慢加入熱水，長知識了。

茶嘅顏色柔和偏淡，以第二、三泡最為清香，入口順滑甘醇，茶味唔會太濃郁，比較適合晨早就起左身嘅我地

茶點為兩塊蝴蝶酥，普普通通，口感略潮

冷泡桂花烏龍 $35

天氣熱其實飲冷泡茶會較清涼，上次去澳門嘅時候第一次飲到，但上次飲嘅係白茶，茶味有點過淡。

今次就選擇烏龍不錯飲，冷泡茶比熱茶更顯甘甜，茶味突出不澀，配合桂花清甜消暑

 如果小店推出可以外帶嘅文青樽冷泡茶，恐怕我又要黎打卡了

半熟普洱、蜂蜜茉莉花龍珠手工意式雪糕 $30/杯/125ml

曾經喺觀塘工廈食到一球細到半啖食哂嘅茶味雪糕都要接近30蚊，呢度相對定價較合理。

除左一般嘅抹茶、焙茶、朱古力等口味，仲有7款自家製茶味雪糕，例如大紅袍、鐵觀音、桔普雪芭等，強調低糖低脂。

雪糕已帶包裝，所以亦有唔少人係外帶雪糕。

茶類產品喺經營、包裝上都更加年輕，基本上好多人都唔會抗拒，特別係當茶用於甜品、雪糕上。

我個人當然大推天仁嘅鐵觀音霜淇淋，性價比高，但始終係霜淇淋，欠缺雪糕嘅滑溜，呢杯正好彌補不足。

雪糕質地綿密夠滑喺室內唔算溶得好快，影左好耐相都思毫無損。

蜂蜜茉莉花雪糕茶味唔算重，食落係清清花香，蜂蜜甜度適中；半熟普洱雪糕茶味重且濃郁，第一口好似喺茶樓飲到濃普而唔覺意咬到條茶葉嘅味道，期後愈食會愈易於入口，甚至有種甘甜。

本來以為茉莉花口味嘅糖粉較高，但原來相反。

雪糕質素唔錯，有機會想試埋桔普雪芭，聞到茶葉幾重果香。

不過地點實在有點隔涉，要我再老遠去食個雪糕會有少許卻步 （後來喺網站見到佢地喺D2 Place有pop up store，都買到茶作嘅雪糕，當堂近好多）

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com