皇冠假日酒店 Crowne Plaza Macau

入住日期：2017/03/12 - 2017/03/13

上個月黎嘅候，酒店選擇左 Sheraton【 http://ywycarol.pixnet.net/blog/post/298902925-%E3%80%90%E6%BE%B3%E9%96%80%E9%81%8A%E3%80%91 】第一次入住，印象一般。

唔夠一個月，我地再黎澳門玩兩日一夜，關於酒店，事前都有幾個選擇，包括較新嘅巴黎人、住開嘅holiday Inn、覺得滿意嘅JW、威尼斯人等等，呢幾間全部都喺番氹仔。

不過最後預訂左皇冠假日酒店，週日入住大概係7百幾蚊，平日嘅話會再平啲。

第一次入住呢間酒店，同以往住開嘅最大分別係：

皇冠假日係比較近關閘位置

皇冠假日只提供往來港澳碼頭嘅接駁車，而且係半小時一班

附近並冇賭場

男朋友決定揀呢間酒店，諗住我地未曾住過關閘呢邊，可能食宵夜會方便啲；另外佢話見到網上提及過此酒店剛完成裝修冇耐。

對酒店其實幾滿意，包括酒店硬件、職員態度都達到水準，唯獨未有提供唔同地點嘅接駁車，或許有住客會覺得地點唔太方便。

澳門嘅酒店要3點後先可以辦理check in，有時對住客而言，都有多少不便，尤其係氹仔嘅酒店，一到兩三點，前台就一堆客人辦理手續。

喺皇冠假日基本上唔會遇到呢個問題，因為客人根本唔多，我地兩日裡面見到嘅住客唔超過十組人。

酒店大堂

同氹仔嘅酒店有少許分別，睇落並唔係金碧輝皇，比較低調。

辦理入住手續亦都快捷，不過留意，酒店按金可以信用卡/現金支付，需要$1000。

入住嘅係最平嘅高級房，樓層係9樓。

房間大小同上次嘅sheraton 差唔多，睇落都幾乾淨企理。

小型梳化，唔肯定如果選擇雙床房型有冇。

窗簾布係電動，呢類智能系統大部分澳門嘅酒店都已經有。

唯香港俾幾百蚊晚要有電勫動窗簾比較難。

呢種茶几陳設比較接近國內酒店。我記得JW嘅房間俗有提供咖啡機。

房內空間感足。

提供多個USB插座，住客基本上唔需要帶插蘇，帶條線就可以了。

床嘅旁邊係浴室，中間嘅係一道敞門。

浴室明亮，呢塊有環形燈嘅大鏡，非常正

旁邊有塊放大鏡子，適合我呢類四眼仔，化妝比較方便。(Holiday Inn都有，後來見到佢地官網，都係屬於intercontinental group)

用嘅係Borghese嘅沐浴產品，唔好理佢好冇用，起碼係我識得嘅品牌！

浴室對面有個挺大嘅衣帽間，秋冬入住，唔怕冇地方掛放大褸。

酒店嘅泳池位於17樓，佢地只有一個室內恆溫泳池。雖然泳池唔大，但由於冇乜人入住，所以我地黃昏時間去，都係包場。

窗外景色本來不錯，不過當日天氣一般，比較大霧

（泳池禁止拍攝，所以我就只放一張官網泳池照）

〔官網圖片〕

健身房都係位於17樓。

位置唔大，但一般嘅器材設備都有，而且好新淨。

入住是生日或者週年乜乜嘅話，我都會聯絡酒店，睇下對方有冇安排。

例如蛋糕、朱古力等，一般澳門嘅酒店都能夠滿足到你小小要求。

以room service形式送上，服務一流，味道就唔差啦，普通慕絲蛋糕。

總括黎講，我都好滿意呢間酒店。

新裝修，房間光猛、乾淨，毛巾都係新簇簇。

服務有水準，職員有禮、有笑容。

不過，可能對大部分人而言，地理位置唔夠方便，始終唔接近氹仔、賭場、買手信嘅地方，附近係民居。連的士都要酒店幫忙call先會有，酒店接送車只去港澳碼頭。

我地今次都花左少少錢喺坐巴士、的士，所以有好有唔好啦。

酒店官網：https://www.crowneplaza.com

永安預訂：https://hotels.wingontravel.com/

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

FADO 花道葡萄牙餐廳

用餐日期：2017/02/18

花道(FADO) 位於比較早期嘅五星級酒店 - 皇都酒店M樓，曾經獲取唔少國際獎項，由知名大廚主理，大部分食材由葡國進口，客人可以一嚐正宗葡菜。

每次去澳門都會有意慾想安排食一餐葡菜，有名嘅試過，小店亦都試過，但過往經驗都唔太好，一係就餐廳食物質素一般，一係就價錢太貴。

而且葡菜好多時份量不少，假如人少，心思思想點多幾款菜，卻又食唔哂，好浪費。要數當中比較滿意嘅都係去年食嘅婆仔屋。

估唔到今次去嘅呢間花道葡葡牙餐廳都好有水準，特別咁貼地嘅價錢可以享受到美食、優質服務，值得一去！

花道(FADO) 仲供應午市餐單，兩道菜色每位$128，三道菜色每位$158，好似我地人少少又想淺嚐葡菜可以選擇午市。而且套餐不時轉換，每次去都有新鮮感啊！

我地今次就左花道(FADO)  嘅三道菜午餐：

餐廳裝潢簡約，空間感足。

我地被安排坐窗邊位置，自然光喺窗外透入，環境非常舒適。

人多嘅話仲可以預訂房間，私隱度高。

入座不久，客人都陸續開始多，所以即使係午市，都建議預約。

菜單定時轉換，可以自行參考官網，睇睇啱唔啱胃口。

餐單：(定時轉換，以官網顯示為準：https://www.hotelroyal.com.mo/tc/dining/fado )

我地選擇三道菜，收費為$158，包括餐茶。頭盤、主菜五選一，甜品則四選一。

點菜後，店員會送上餐前小吃，主要係自家製麵包。

手工麵包盤

以二人而言，份量相當豐富，印象中有四款，餐包微溫，配上牛油，差唔多係我獨力食哂。

不過見網上照片，應該之前係配上橄欖油，可惜今次我未能試到。

頭盤方面，共有五款，有沙律、菠菜湯、磨菇批等。

〔頭盤〕烤雞肉凱撒沙律

沙律份量比想像中多，烤雞肉都俾得大方，而且非常新鮮，如果沙律醬再多啲更好。

男朋友對沙律要求幾高，但都大讚好食！

〔頭盤〕磨菇菜心脆批

我點嘅頭盤係磨菇批，唔好睇少呢個批，我都以為小小一件，估唔到幾飽肚。

批中有大量磨菇，菇汁全被鎖住；批皮焗至脆身，牛油味香；菜心只選嫩葉部分，焗過後仍然嫩到我差啲以為食緊菠菜，推薦呢個！

主菜方面有較飽肚嘅意粉、飯、鱸魚，亦有輕食例如燒雞、烤豬頸肉。

〔主菜〕八爪魚飯

葡菜經常以八爪魚作為食材，但八爪魚飯我只係第一次食。

八爪魚飯雖然醬汁頗多，但食落唔會好滯，唯獨有少許偏鹹。份量適中，男士都剛好夠飽。

八爪魚份量不少，腍身得黎仍保留嚼勁，鮮味突出。

〔主菜〕脆嫩燒雞配薯片 

我點嘅燒雞份量明顯輕少，但由於頭盤豐富，感覺都係足夠；但建議男士可揀飯或意粉。

燒雞整體不過不失，肉質嫩，但唔夠滑，而且女仔食起上黎，唔係太方便。

旁邊嘅薯片，炸得好脆口，但唔會好油膩。

是日甜品款式比較普通，分別有朱古力蛋糕、芭菲、雪糕、水果，見曾經有人試過南瓜蛋糕，幾吸引，可惜碰唔上。

所以眼見當日都唔係好多客人點三道菜式，而選擇頭盤、主菜就算。

咁我地都一場黎到，即管試埋。

〔甜品〕雪梨雪糕

大概都冇人會諗到，雪梨雪糕係呈莓紅色。

個人認為比起稱為雪糕，呢兩球比較似係雪芭口感，賣相係好吸引，但味道不俗，小清新，配合少量榖物，增添口感。

〔甜品〕焦糖香草芭菲

香草味唔濃，面頭嘅焦糖有點不足，布丁軟熟，甜度適中。

飲品方面選擇較少，都係咖啡、茶，而且只供應熱飲。

〔飲品〕熱咖啡

好好飲講唔上，正常水準，但呢套杯碟令我欣賞左好一會，非常迷你，好可愛。

〔飲品〕熱檸茶

最後我見酒店餅房嘅葡式曲奇特價，仲買左幾盒番香港。

總括而言，花道(FADO)  嘅午市套餐確係非常抵食！

特別一提，部分菜式會由廚師親自喺客人面前主理，喜歡欣賞大廚烹調過程嘅，可以點相關菜式。

除左對食物有要求，用餐體驗都係重要一環，花道(FADO) 喺服務方面都有一定水平。

黎到澳門，想試正宗葡菜不妨考慮呢間喺皇都酒店內嘅花道葡萄牙餐廳。

餐廳網站：https://www.hotelroyal.com.mo/tc/dining/fado   裡面有詳細菜單及午市餐單

鬼丸拉麵道埸

用餐日期：2017/02/18

澳門嘅最後晚餐選定鬼丸拉麵道場，係澳門嘅一間拉麵小店，網上評語都比較舊，只係不時喺instagram見到澳門人會去食，所以紀錄在案。

鬼丸拉麵道場係位於巷中嘅拉麵小店，位置唔多。門外「鬼丸」二字，甚為搶眼。

週日大概六點到達，無需等候，但後來食食下，愈黎愈多人，近乎滿座，幸好我地黎得早。

廚房半開放式。

餐單資料未及詳盡，以牆上嘅手寫木牌補充，店員亦都會從旁介紹。

小食類：

鬼丸拉麵道場供應拉麵、烏冬，定價 $50起，視乎款式。

除左普通嘅叉燒拉麵，仲有每日按貨量供應嘅海鮮拉麵，當然價格會相對高啲。

海鮮拉麵一般售完即止，放心，甫入店，店員已經會為你介紹是日海鮮拉麵。

「今日有龍蝦拉麵、鱈場蟹拉麵都係一百四十八蚊，另外有好似魔鬼蝦咁大嘅赤蝦拉麵，供應有限。」店員道。聽左幾次之後，我已經入哂腦。

香蔥味噌叉燒拉麵 $66

先上枱嘅係男朋友嘅叉燒拉麵，睇落幾大碗，拉麵份量較多，夠飽肚。

拉麵只有洋蔥、蔥、味荀，其他基本材料例如紫菜、溏心蛋要額外加錢。

蔥、洋蔥大量。味噌湯底濃郁，相對豚骨、魚介味弱，整體較重口味，稍鹹，食食下會口渴。

唔想太鹹可以揀豚骨湯底。

麵質唔似一般日式拉麵，較租身，掛湯力一般，個人認為有啲似車仔麵嘅油麵，哈哈。

叉燒較薄身，肥瘦佔半，份量太少而肉味不足！

男朋友就覺得佢地叉燒拉麵普普通通，但我最期待嘅龍蝦拉麵不俗。特別喺座位已經聞到師傳煮湯底嘅味道！

龍蝦拉麵 $148

之前做資料搜集嘅時候，見過有半隻供應，價錢較平，本來以為店家加價，原來係份量有別。

一上枱我地都哇一聲，係原隻龍蝦！

龍蝦都幾大隻架！

店員醒目地俾隻碟仔我放龍蝦，方便食用。

龍蝦啖啖肉，不過可能烹煮時間過長，略嫌唔夠彈牙。但以此價錢，都算合格有餘。

湯底鮮味非常，比起味噌湯底出色好多。雖然有少許油，但飲落唔會鹹。

自家製溏心蛋 $8

雖然拉麵未有包含溏心蛋，由於我太鐘意食蛋，所以都點左一隻。

流心度高，呈半熟狀態，以豉油浸泡？蛋味唔濃，不過8蚊還好。

手作餃子 $36

唔推薦餃子！

首先唔似係日式餃子，餃皮很厚，雖然餡多，但由於用炸，非煎餃，油膩感重，食一件都已經覺得飽滯。

七味魷魚鬚 $28

其實覺得呢份幾好食，香口惹味，魷魚鬚軟熟。

但份量太少，性價比較低。

整體黎講，鬼丸拉麵定價合理，頗受本地人歡迎，而且定時推出限定海鮮拉麵，都可以一試。

今次百五蚊有原隻龍蝦，都優惠呢！不過由於係限定款式，加上小店一間，事前最好先向店家查詢供應，以免撲空。

后宮燒烤火鍋

用餐日期：2017/02/17

上一次黎澳門玩嘅時候，喺網上搵左唔少餐廳、食店想要一試。奈何只有兩日一夜，當時晚餐揀左贏到粥 (http://ywycarol.pixnet.net/blog/post/213945811)，於是就冇空間再食后宮！

今次再過黎，決定點都試下，並且預早幾日時間打電話預約。週五晚上客人真係蠻多，唔預約嘅話，相信比較難安排到位置。

后宮位於關閘區，以宮廷式裝潢包裝，提供三款套餐以優惠價錢任食燒烤、火鍋，加上一流服務，所以一直廣受本地、香港人歡迎。

曾經有一段時間好流行宮廷劇，或者「后宮」都係因而命名，單係店名已經充滿想像空間。

因為古色古香，甚有風味嘅裝潢，店家即使喺橫巷都輕而易見。

店內裝潢貫徹中國風，用上燈籠、屏風、木椅、木枱等。

或者你會稍為期待侍應們嘅制服、裝扮，不過要失望喇，如果著到宮女、太監般，恐怕好難招呼客人。

餐牌配合宮廷風，分三款套餐 ($148/$188/$248)，一律任飲任食兩小時，客人只需要選擇食宮女、貴妃，抑或食皇后，當然價錢不同，食物亦有所不同。

以下會為你稍作介紹，套餐名字，宮女 ($148)、貴妃 ($188)、皇后 ($248) 基本上已經反映級別。

餐牌食物一樣，分別係有冇格仔，三個格仔係任點，一個格仔係限點一次，按人頭數出，所以你唔需要填寫份量。

 宮女式任食 $148+10%服務費

基本上比起另外兩個套餐，缺少左霜降牛、牛肋骨、黑豚肉、羊扒、海鮮、烤年糕，其餘食物係相同。

所以如果你係對以上食物冇興趣的話，點呢個套餐好划算，因為選擇其實唔少。

（三個格仔係任點，一個格仔係限點一次，按人頭數出）

〔宮女式任食〕

 貴妃式任食 $188+10%服務費

「貴妃」比起「宮女」相差$40，分別在於霜降牛、牛肋骨、黑豚肉、羊扒、海鮮、烤年糕，可以點一次，按人頭數出。

我認為點呢個餐最划算，一開頭當然會覺得海鮮只可以點一次，唔夠喉，但食食下會覺得足夠有餘，畢竟餐牌仲有好多種食物可以點。

（三個格仔係任點，一個格仔係限點一次，按人頭數出）

〔貴妃式任食〕

 皇后式任食 $248+10%服務費

最貴係「皇后」，餐牌見到嘅都可以點，包括肉類、海鮮、鍋物。

（三個格仔係任點，一個格仔係限點一次，按人頭數出）

〔皇后式任食〕

一般食放題都會高估自己嘅能耐，簡稱眼闊肚窄，我地一睇餐牌，就理所當然揀最貴嘅「皇后」。

我地自問唔係細食人士，但只係點左兩輪，已經被KO喇。所以我估計大部分人點貴妃餐，已經好充分，除非你旨在食海鮮。

近樓梯位置有多款調料選擇，醬油、烤肉醬、椒鹽、辣椒、姜蓉，應有盡有。

燒烤、火鍋同一時間進行，所以除左揀餐，仲需要揀湯底，湯底另外收費，有麻辣雞鍋、蕃茄鍋、蒜香蛤蜊鍋等，$10-$20，價錢合理。我地揀嘅係蒜蓉蛤蜊鍋。

燒烤爐位置附上焗爐紙，幾衛生，一來客人可以避免食物容易燒焦，二來冇咁油膩，不過最重要係無需更換爐底，換焗爐紙就可以喇（店員會主動幫忙換）。

第一輪上菜速度快，第二輪稍緩，唔想等嘅話，可以食到差唔多就下單。

店內燈光偏黃，採光有難度，所以照片質素一般，但都睇得出非常豐富。

肉類方面，個人非常推介霜降牛、牛肋骨、黑豚肉、雞軟骨。

海鮮方面，虎蝦、鮑魚、牛油扇貝都係必食！

肉類：醬燒霜降牛、醬燒牛肋骨、蔥香牛舌、醬燒黑豚肉

牛肉腍身，肥脂分佈平均，輕輕燒過經食得！

第二輪點嘅肉類一樣靚仔，唔會發生好似香港嘅放題般，得第一輪肉靚。

海鮮：去殼貴妃虎蝦、花開寶貴鮑、愛爾蘭蟶子王

推介虎蝦鮑魚！兩樣都已經去殼、離殼，方便食用，呢點我好喜歡，唔怕整污糟手！

而且非常新鮮，肉質彈牙，以燒汁調味，完全唔腥！

相對的蟶子有點遜色，燒調味不足，燒完有少許乾。

特選蒜香雞軟骨、醬燒左腿肉、牛油扇貝、麻辣奶油蝦

麻辣奶油蝦夠惹味，店員提議拎出黎燒會快熟過放喺盤中燒，但我地更喜歡連盤燒，因為蝦肉更入味！

雪花醬燒松板豬較肥膩，燒起上來油份較多。

醬燒香菇、牛油金針菇、煉奶花生烤烤年糕、encore嘅麻辣奶油蝦

烤年糕好好食啊，年糕表面燒到微脆，裡面保持柔軟煙韌！可惜我太飽，冇能力追加！

鍋物選擇好多，但我地掛住燒烤，所以唔係食左好多。

由於我係蜆怪，瘋狂食蛤蜊，唔知食左幾多斤！蛤蜊鮮甜，完全冇沙，配蒜蓉鍋一流，自製卜卜蜆鍋！

飲品自取，樽裝可樂、雪碧、檸檬茶、菊花茶、百事、涼茶等。

后宮食物選擇多，質素整體好有水準，定價適中，可以一次過食到燒烤、火鍋，好適合我呢類花心吃貨，性價比算高！

一大班朋友去的話，可以試到嘅款式更多！

店員服務好好，幾位都好細心留意客人需要，主動換焗爐紙、收拾碗碟，見我有蛤蜊殼亦都醒目遞上小碟，男朋友去洗手間期間可能怕我燒焦食物，冇要求下都主動幫我燒好。

呢個情況下收取服務費，客人都十分願意我地揀「皇后餐」，連加一埋單$561，捧住個肚離開，不過提提大家珍惜食物，量力而為喔！

Hello Kitty Obrigado

點解會鐘意hello kitty？作為女漢子，女兒身男兒心，我都唔係好明。

我懷疑只係因為當時冇乜卡通，記憶中有史路比、Keroppi，大人們理所當然覺得女仔應該鐘意hello kitty，結果我所有文具、公仔、髮飾都係貓。

到大個左又覺得冇乜卡通特別吸引，又可能情意結，有時買野都會買番kitty公仔。

每次黎澳門都有黎一黎呢間kitty店，未必次次幫襯，但次次都有影相，明明裝潢冇變過。

男朋友見到而家有乳酪食，所以同我黎試下~

而且咁啱做緊優惠，購買任何產品，乳酪減十蚊。

剛始見到佢地嘅曲奇正正賣$10，所以結論係買乳酪就免費得到一塊曲奇嘅意思。

乳酪分兩種size：大+有配料$48、小+朱古力/草莓醬$38

細嘅只有醬，我當然係揀大杯裝。

分別有4款造型，乳酪味道一樣，就係配料唔同~

Strawberry Kiss $48

面頭一塊草莓曲奇、草莓醬，中間有少許草莓肉、草莓爆珠、草莓朱古力片。

賣相幾靚，而且幾墜手，乳酪份量不少。

草莓曲奇香脆，但莓味唔強烈，呢塊比單售10蚊塊嘅細一點。

乳酪質地比較似雪糕，加上草莓醬，十足快餐店嘅士多啤梨新地~溶得十級快，食嘅速度追唔上溶嘅速度。

中間嘅草莓肉size都幾大粒，但酸到完全唔想食…

草莓爆珠加強口感，奈何又覺得咬開太甜…又太酸又太甜…

味蕾受唔住刺激，送左俾男朋友食。

適合相機食先嘅甜品，但相機都要快食，否則溶到呀媽都唔認得。

我估係我揀嘅味道出事…另外三款嘅配料相信冇咁伏！

列出參考一下：
rainbow bridge：牛油曲奇、原味麻糬、曲奇碎、杏仁脆粒、白朱古力片
tokyo lover：綠茶曲奇、白朱古力片、燕麥脆片、紅豆、綠茶麻糬
chocolate dream：朱古力曲奇、朱古力片、朱古力醬、可可脆米

綠茶曲奇 (原價$10，買一塊乳酪減10蚊）

好淡淡嘅綠茶味，曲奇擺到第二日食，都仲係脆，反正係免費。

如果要我俾十蚊塊唔會買。除非有朋友好鐘意買黎做手信。

不是葡撻

由於見到有唔少澳門朋友嘅ig都有提及呢間「不是葡撻」，所以今次都記低左要試埋。

不是葡撻，顧明思義唔係葡撻，係澳門第一間年輪蛋糕專門店。

基本上只有個樣可以同葡撻拉上絲微關係，售價比葡撻貴，接近芝士撻嘅價位。

店內亦有日式年輪蛋糕出售，包裝幾靚，可以當手信。

芝士年輪蛋糕、葡式年輪蛋糕，各自可選軟/硬。

去到嘅時候並唔需要排隊，可能已經出爐一段時間，所以拎上手已經係唔熱。

反正唔係新鮮熱辣，我亦都冇即時食，或許同人地即食會有差異

芝士年輪蛋糕 $22/軟 

由於硬嘅已經售罄，我只能試到軟嘅呢款~

法國芝士餡，芝士味唔太突出，加上淡淡檸檬香味，食落唔膩，幾清新。

至於年輪蛋糕，個人認為普通，印象模糊，成舊野就好似食左件芝士味唔太濃嘅芝士撻 。

葡式年輪蛋糕 $18/硬

有別芝士餡，呢款用嘅係葡撻嘅手法製作，蛋糕經多層烤焗。

餅皮較厚身，但可能我唔呢件唔係剛出爐即食，居然比上面軟芝士更食到軟蛋糕嘅口感。蛋香唔重，但偏甜。

仲要俾個爛鬼紙袋仔痴甩撻皮…

可能我期望有少少高左，唔係唔好食，但冇乜特別。始終我唔係熱辣辣食，估計點都有多少影響。

俾我就寧願食番芝士撻、傳統葡撻😂

澳門特色加上日本風味，夾唔夾見仁見智。

不是葡撻

地址：新馬路澳門清平街6號地下

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

樂點咖啡

用餐日期：2017/02/17

定價挺高，平日都冇套餐提供。 旁邊有兩位學生，消費能力真高。

澳門遊

2017/02/17 - 02/18

六週年活動都係選擇近近地去澳門，老實講 ，我成日覺得去澳門唔抵，一來船飛唔平，二來酒店唔平，冇景點， 主要係食野、賭。

近年都去得密左，多得instagram，叫做可以每次安排啲唔同嘅食店、影相位，搵啲新鮮感。

星期五六兩日一夜出發，酒店會貴少少。比較便宜當然係平日 / 星期日、一出發。

電話卡：

由於男朋友有機會需要接聽公司電話/whatsapp，而我則需要update社交平台，所以我地各自都買左一張電話卡。

揀左呢張預付卡，$50/180日，不能通話，上網任用。（頭1GB係4G速度，其後降至不少於256kb）

so far兩天我開3G用，理應超過1GB，都冇感覺說被限速，速度一直維持幾mb間，對我而言，已經夠用

下次都會用呢張，某部分團購網站會平幾蚊，不過我怕煩，直接喺旺角普通電話卡嘅店就買到。

船飛：

一樣經永安預訂，訂酒店我只用永安/agoda，我發現佢地嘅價錢最平，最穩定，特別係永安，有時輸入價惠碼，會有相應扣減。

船飛經優惠碼扣減後，每位來回係$280，當然仲有部分網站，例如明星，會再平少少；不過網購最緊要方便，冇手尾。經永安買幾分鐘會收到電子收據，船飛喺碼頭嘅金光票務處領取。

酒店：

酒店，我對酒店嘅要求唔高，最緊要乾淨，能夠有酒店shuttle，因為澳門唔大，基本上酒店車能夠到大部分要去嘅地方，落車行兩步即可，可以節省的士費用。

以往我只住過四間酒店，金龍（agoda：http://bit.ly/2lZL7Be）價錢最便宜，相對較舊式，位置方便，唔需要酒店車都可以。

有一次經團購買套票住過威斯汀（現已重新裝修、改名）遠離鬧市，要出市區唔太方便，酒店車班次較疏，連賭場都冇嘅酒店，係真正要黎relax的，旁邊就有沙灘。（trivago：http://bit.ly/2llTbsM）

住得最多嘅係金沙城嘅holiday Inn，貪佢價錢平得黎較新淨，又有shuttle。（agoda：http://bit.ly/2lymiLQ）

對上一次住貴啲啲嘅JW，因為可以玩埋天浪淘園，我個人就幾鐘意JW。（agoda：http://bit.ly/2kPG2GP）

今次揀左喜來登，價位喺JW跟holiday Inn中間，但整體感覺比後者更差一點，唔會再住。（agoda：http://bit.ly/2kPvR52）

首先，酒店都係要14:00先可以check in，但同過往嘅酒店比，喜來登欠彈性，並冇提供pre-check in，別嘅酒店，次一級嘅holiday inn都有提供此服務。

早左到嘅客人可牌預先登記，酒店之後再安排房間，唔需要客人中段時間再折返酒店辦手續。

酒店房間：

我覺得比起holiday  Inn嘅小一點，而且我唔鐘意啲酒店，開哂燈都係黑黑沉沉。

中間嘅係酒店預備嘅welcome gift，男朋友預訂酒店嘅時候，打過去酒店安排。

呢種水平嘅服務，基本上澳門嘅酒店都能夠提供。

例如我之前住嘅holiday Inn生日入住有蛋糕、週年亦可以安排朱古力。

不過值得一提，佢地嘅朱古力幾高質。

酒店浴室，浴缸較細，用嘅係酒店非常普通嘅沐浴露。

相對之下，JW嘅確係高一班。

不過，我最鐘意澳門絕大部分嘅酒店，水壓都夠大！我知，唔環保，但夠relax囉！特別係我呢種住鄉村地區，平日好難體驗水壓大！

行街行一日，最重要係番到酒店沖個熱水涼。

之後我地去左附近嘅巴黎人，上次黎嘅時候，仍然建築中。

因為我地探遷就上班時間，所以週五、六出發，酒店價格有別，如果平日的話，相同價錢，唔住喜來登，都住到巴黎人。

巴黎人

黃昏前，因為逆光，所以照片影得唔好。

坐shuttle去晚飯地點時，剛日落。

晚飯後，我地再番黎影，確係另一個景色。

酒店大堂裡面都有特色、風格嘅設計。

男朋友喺instagram搵嘅保鮮花網店，約左喺晚飯地方交收。

我好開心佢有呢個安排，正因為咁，我對呢扎花又愛又恨！

雖然話係保鮮花，價錢會貴啲，事後我知道呢札居然要接近三百元，簡直係完全唔值！

手作人嘅心意唔應該用錢去衡量，但我只會尊重真正有心嘅手作人，扎花包得咁hea，連自己店面嘅絲帶都貼到斜哂（係，係我幫佢貼番正），裡面嘅花完全包得唔緊，中心嘅棉花俾啲花遮住哂，係什麼設計？

香港有好多都做得好過佢！

第二日我地食完午飯，去左百老匯中心嘅文創村，之後會再開新文章貼相。

每次黎澳門都栗搵個新地方影影相，好等整個旅程唔止一個食字。今次選擇左大炮台，我記得我想黎幾次，但冇乜印象點解最後都冇上黎睇下。

的確係幾靚，上山嘅路有點辛苦（相信對大部分而言唔困難，只係我平日少走動）

如果喜歡攝影，都值得行上黎影一次。

晚上嘅百老匯大街，上年黎嘅時候都冇咁熱鬧，現在多左不少食店，仲有人唱住歌，幾有氣氛的。

車仔檔檔主話，佢地車仔就11pm關門，但大街嘅食店都做到12點，夜晚黎呢邊，都唔怕冇宵夜食。

短短兩日行程完結左，主要就係去吃！

賭？嗯…我比較黑仔，唔敢玩賭枱，每次只係去玩下電子機（十蚊、廿蚊局），過下癮。

😳😳😳😳😳😳😳😳😳

同男朋友拍拖六年，同住都應該有四年(?)，嗌交、唔高興嘅時間都不少。有一段時間都會覺得男朋友冇以往咁喜歡我，好多女孩子可能都會咁諗(?)，硬係覺得男朋友喺追求自己嘅時候就千依百順。

不過可能年紀愈黎愈大，都明白自己唔再係追求激情，有時平平淡淡，有時嘈下交，都係一種樂趣。

最重要不忘初心，唔好忘記自己最初喜歡呢個人嘅心。

贏到粥

下環媽閣豐順新邨第三M,K舖

用餐日期：2016/6/28

一早作了資料搜集，這家餐廳真的很受歡迎，而且評語不錯。他們家的手撕雞也很有名，但剛巧他們說要檢查，所以暫時沒有。只預訂了卜卜蜆鍋。

於是打了電話預約位置，因為我們只有兩位，所以點餐不能太浪費喔！

跟很多國內的餐廳一樣，一坐下就給了小菜還有紙巾，都是收費的喔！不要的話，直接跟店員說就可以。這邊的小菜是$8紙巾是$3。

因為沒有手撕雞，所以我們叫了這道脆辣雞$88，有驚豔到！十分香口，帶少少辣味。雞肉都切了一小塊，作為小菜一流！

主打的卜卜蜆鍋$158，實在是我期待很久了！因為我本來就是個貝殼類的狂！整鍋都是蜆，調料主要就是蒜蓉，不要以為好多，味道是剛剛好的！

這個真的沒有來錯！

吃完卜卜蜆後，就可以點些火鍋的配料，打邊爐。

冬瓜片$35，價格有點高可是放到蜆鍋裡面，很甜的。

腐皮卷$38，香港的這個真的很棒大部分都是現炸，相對這個比較失色。

安格斯肥牛$88，這個好貴喔！才6塊，而且還是比較普通的牛。下次再來，不會吃的。

蝦滑$88，哇這個也好貴喔！而且也沒有什麼鮮蝦的味道，跟肥牛一樣，有失望。

超喜歡蛙蛙菜$38打邊爐的。

總體來說，這個贏到粥真的推介！雖然火鍋的配料比較貴，但卜卜蜆很上癮的喔！還有，如果人多的話，除開來也很划算的。

可惜這次我們只有兩個人，連飲料吃了$600。

Follow us:
Instagram: http://bit.ly/2g3ZtuS

Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com

這兩天是很熱很熱，所以我們都找了一些甜點，希望可以解解暑。其中這幾家也不錯的。

檸檬車露
新馬路大堂巷11號地下

用餐日期：2016/6/28

因為晚上吃了卜卜蜆，當然是有點鹹，所以想要吃個雪糕！這家也不用我多作介紹吧！

西瓜加上益力多口味，好清新而且解暑了！

華爾兹乳酪雪糕
新馬路關前正街37號地下

用餐日期：2016/6/29

預先已經查過這家yougurt，所以第二天我們吃完魚翅就來了這邊。這家就在很有名的那個洪馨椰子附近。小店的裝潢都下了不少心思，空間雖小，沒有坐的位置，但都添不少裝飾跟擺設，足夠滿足我們這些櫻相機食先的朋友喔！

他們的乳酪名字好文青：盛夏光年、花樣年華的

雖然我不是少女，但都禁不住要點了這個櫻花乳酪。

多重口感，雖然味道不是說超正，但實在很清新。最重要是少女心爆發，不停照相呢！

這好像是限定的，現在應該換了其他款式。

這個是盛夏光年，最特別是那塊曬乾了的橘子，老闆娘說是她們自己曬乾的。

然後皮雖然有點苦苦澀澀的，但果肉吃起來是甘甜。

Vanille
荷蘭園路義士若翰巴地士打街2B號地舖

用餐日期：2016/6/29

"You can't buy happiness, but you can buy ice cream."

第二天的晚餐我們吃了丼飯，雖然已經很飽，但也想要吃個雪糕呢！

Vanille $38

這裡只有這兩球雪糕，價格有點貴。可是很香滑，上面還有berries。

迫啪條 $25

好啦，我承認，我們是有點傻，居然點了這枝雪條，事後才知道在便利店買才幾塊呢！

就只是在杯子裡面加了些爆炸糖而已。

這家老實說不太推介，但店員服務卻蠻值得稱讚的。因為他們家的匙是木製還有刻了店家的名字，我們都覺得比較特別，成本高嘛。香港大概是不可能有的。店員聽到以後，就提議說可以幫我們清洗一下，帶回香港循環再用呢。這個小小的舉動讓我們都覺得有點窩心。

Follow us:
Instagram: http://bit.ly/2g3ZtuS

Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com

因為突如其來有兩天假期，決定去澳門玩。

一如以往，我們這次都是永安預約房間和船票，酒店方面因為是平日出發，房價都比較相宜，決定 book 這家，可以玩天浪淘園的！

JW Marriott Hotel Macau

入住日期：2016/6/28

房價的話是$1300左右，連兩位早餐，當然是普通deluxe room。

房間跟網站的照片幾乎一樣，雖然事前我曾經在某些討論區看到，有網友說被安排入住尾房，然後就發現尾房是比較小的。

浴室還蠻大，沐浴用品是aromatheropy家的。

雖然有咖啡機提供，好可惜前面入住的人搞得好邋遢，執房卻遺忘清潔這部份。

窗景，這邊看得是新濠影匯那邊，能看得到那個小小的8字型摩天輪吧。

6月份去了澳門，現在整理一下。

過往到澳門都有點悶，因為沒有特別做planning，又沒有找些什麼地方去玩玩、拍照。這次我都預先在instagram那邊的foodie找了幾家想去的餐廳。

Ufufu Macau

新馬路天神巷16號天福大廈地下A舖

用餐日期：2016/6/28

其實來這裡的原因，因為最近香港都開了這家cafe，但人多的爆炸。

於是見到澳門也有，所以打算在這邊吃個午飯。而且回到香港也不打算再吃！

這裡賣點是過百款芭菲，有選擇困難症的朋友留意！

飲品是不叫也無妨的程度，特別這個充滿藥水味的。

跟套餐的salad，因為我不太喜歡吃，所以男朋友獨吞。

日式蛋包飯賣相不錯，事實上味道也是不錯的，只是醬料有點多，自己吃好膩喔！

這漢堡扒不便宜呢，可是就這麼一小塊，幸好味道還不錯。

因為吃掉上面已經有點飽，但心裡想，來到這裡不吃過芭菲，好像就差一點什麼的。

所以在過百款裡面，就選了這個比較輕型的。

味道也是還好，沒有說很驚豔，所以回到香港也不會特別再跑去吃。

Follow us:
 

Instagram: http://bit.ly/2g3ZtuS

Blog: http://bit.ly/ywycarol

Facebook: http://bit.ly/2gu1fIG

Contact us: mrmrsfoodhk@gmail.com

入住日期：2016年4月份

4月是生日，所以另一半就安排跟我到澳門玩下，有時覺得去澳門實在要是平日，星期六日酒店價錢是瘋狂地貴，夠飛一轉啊。

今次就是平日，套票經永安網預訂，大概 $1100，酒店預訂了金沙城假日酒店，都住過兩次，覺得價錢合理。