再窮都要去旅行！

小法國、南怡島、晨靜木公園 一日遊

KKday行程及小法國照片可參閱上一篇文章~

離開小法國，大概用左20分鐘到南怡島，等導遊安排好入場券、船飛等等，我地就準備上船喇。

除左坐船過去，仲可以玩超刺激嘅高空飛索，當然要另外收費啦，要坐就記得留意相關資料，睇下需唔需要預約。

[高空飛索]
費用 : 38,000韓元
開放時間 : 4~10月 09:00~19:00 / 11~3月 09:00~18:00

南怡島

南怡島四季都有唔同嘅景色，本來12月黎都好期待會有落雪嘅景象，可惜天氣好好，好暖，完全冇機會睇雪。雖然因為呢樣野有少少失望，但最後去到南怡島都依然覺得好靚~

真係好值得黎，而且我覺得有機會要等唔同季節再黎，欣賞下呢度嘅景色！

雖然話南怡島因為係《冬季戀歌》取景而變左熱門旅遊點，但由於個島有14萬坪，就算同時間有幾十架旅遊車（目測），都完全唔會覺得好逼人。

如果想影靚相，只要有少少恆心，有人就向前行，向前行，總會有一個點係影唔到人的。

好在參加呢個團停留南怡鳥嘅時間比較長，否則真係覺得行唔哂呀（事實上都係行唔哂）我諗自己黎的話，不妨都留3-4小時喔！（如果要用餐要再預留耐啲添~）

因為早餐食完粥之後，去到小法國村就冇再食野，所以去到南怡島都會餓呀不過可以放心，南怡島上有餐廳，碼頭附近亦都有。

我覺得呢條腸真係超好食！超好食！

腸仔 2500won/條

睇落係一條普通到極嘅烤熱狗腸…（唔知係我地餓定點）真係覺得好正！

朋友上次黎食完都覺得好好食，所以叫我地黎嘅話，一定要食~

腸仔唔知入面有咩材料，味道好特別，有啲薑味(?)總之好好食！

如果之後唔係喺餐廳食得太飽，我一定會再食一條呀！

紅豆豆沙包 1000won/個

呢個豆沙包用傳統嘅窯烤，下面真係木頭燒架，我即時諗起《三時三餐》啦！

紅豆包一個一千圜唔貴啦，所以好多人都一買買幾個。

食落就冇話有咩特別之處，裡面嘅紅荳蓉都算多，甜甜地，天氣凍嘅話襯熱食不錯吃啦。

呢度都算比較入，所以唔多旅客黎到呢邊，影相一流！

你問我，我覺得我慢慢行，慢慢影，唔計食個午餐，4個鐘頭走唔甩…唔知係咪我誇張啦，而家番到黎，直頭覺得影相太少喔。

另外喺島上我地都正經坐低食一餐正餐，雖然唔係遊客打卡熱點炒雞排，但都好滿意的，會獨立發文介紹。

如果要自行去南怡島，記得留意：

南怡島

地址： 江原道春川市南山面南怡島街1 

晨靜木公園

晨靜木公園係最後一個景點。南怡島過去都唔遠（我地坐旅遊巴），不過冬天入夜快，我記得當日香港時間5點都未夠，四圍已經係全部漆黑一片。

基本上係一個好大超大嘅公園，四季都種植左唔同嘅花，所以都好值得一黎~個人認為預留個半鐘左右夠。

• 春－春花慶典，金盞花、蠟瓣花、金鏤梅
• 夏－玫瑰、繡球花、木槿花慶典
• 秋－菊花、楓葉慶典
• 冬－五色星光庭園展(Lighting Festival)

我地剛好呢團2號出發，正正就係五色星光庭園展嘅第一日。

五色星光庭園

日期：2016/12/2 -  2017/3/26

時間：下午5:10  -  晚上9:00 （週六至11:00）

基本上就係將成個公園報置哂燈飾，而啲燈飾一啲都唔hea，初時諗都唔會靚得去邊，不過睇完行完一圈都覺得值得一黎。

個人希望下次有機會等到其他季節再黎，欣賞下人地嘅景色、花花草草。

其實用相機已經好難影到呢度嘅靚，不過我都有喪影相，而且佢最叻係都報置左一堆影相位，心心型燈、南瓜車等等。

作為當日last一個景點，行程都算完滿結束左。

喺晨靜木公園感覺係全日最凍嘅，所以我臨上旅遊巴前都食番串魚糕，可惜味道一般，勝在夠暖身！

如果要自行黎，都要留意交通同開放時間：

晨靜樹木園http:// http://www.morningcalm.co.kr 

晨靜樹木園

地址： 京畿道加平郡上面樹木園路432

總括黎講我地對KKday嘅行程都滿意，當然司機都好準時，8點半左右就送到我地番明洞，喺車上亦都訓左幾教，所以唔會太辛苦。

不過都有旅客暈車浪(?)  嘔，所以會暈車嘅都係要準備膠袋。個人認為就類似去赤柱嘅路咁，少少彎少少chok。

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com