再窮都要去旅行！

鐘路3街大排檔

平時睇韓劇經常會見到女主角喺大排檔飲燒酒爛醉，然後老闆娘就會打俾男主角叫佢黎接走女主角咁；一係呢就男女主角放工去大排檔飲酒，女主角會醉左然後示愛。

我係有少少上腦

所以去到韓國都想試下啲地道野，去完韓屋村之後就安排左喺度晚餐。

鐘路3街到左晚上就會有一列小食檔，就係呢種用塑料布套住帳篷嘅排檔。

呢度主要係售賣海鮮、家常便飯為主，即叫店家就會即場喺帳篷內煮食，相當有風味。

可能都有唔少旅遊書介紹，所以餐牌都有中文提供，不過阿豬媽唔識英文。

凍櫃入面有啲海鮮，唔識講嘅可以直接指。

當日冇乜遊客，但都有唔少本地人，而且真係好似韓劇中，會有講野好大聲嘅大叔，而且我諗本地人黎得都係以飲酒為主，因為原來唔平，人地叫幾個小菜就吹水~

我地呢啲完全遊客mode，喪點野食。

不過，始終係大排檔，腸胃唔好嘅人小心，我食開地溝油冇問題。

雞肉串 12000won
辣炒八爪魚 12000won
辣炒豬肉 12000won

基本上呢3樣野個樣睇起上黎係一樣嘅…基本上味道都係一樣，只係主要材料唔同。

雞肉幾好食，唔鞋唔老；豬肉亦都唔肥；八爪魚嫩到有啲離譜，好似真係啱啱放得落口，所以有少少怪，可能我地食唔慣。

不過食得好爽，真係好家常飯feel！

〔辣炒八爪魚〕

〔雞肉串〕

〔辣炒豬肉〕

雞蛋卷 12000won
完全唔係大排檔嘅價錢，不過真係好好食！雞蛋煎得好鬆軟，好香。阿豬媽果然有一手。

午餐肉炒蛋 15000won
點呢客午餐肉有多少心理唔平衡，因為成舊水一碟，但見到隔離枱大叔食得幾滋味，估唔到咁普通嘅材料整得咁好食！

韓國嘅午餐肉比較少肥膏，切到薄薄一片，沾上蛋再煎，好好食。

事後番到香港我地都專登去759買左罐韓國午餐肉試下煮，味道有8成似，重點係要切到薄薄一片。

但材料成本好低，所以大排檔原來都幾掠水

辛拉麵 3000won
好貴的拉麵，但我第一次喺韓國食辛拉麵，大家都覺得好好食，仲忍唔住追加多碗，再用我喺韓劇學嘅僅餘韓文讚好食，阿豬媽笑到見牙唔見眼。

麵條煮得啱啱好，仲要熱辣辣，好鬼爽！

男朋友仲睇下阿豬媽點煮得咁好食，唔知韓版辛拉麵同港版係咪真係有唔同，因為韓國食呢隻好食啲，遲啲會買韓版試下。

青口湯（免費）
泡菜（任添）食左阿豬媽好多泡菜，好好食，唔太酸唔太辣。

韓國米酒 3000won
雪碧 2000won

連埋酒、飲品，成餐都差唔多8萬圜，講真大排檔黎講真係唔平，食嘅都係平價材料。

不過我地5個人除開就大概百幾蚊港幣，食得好飽，整體黎講都係好開心好有風味嘅體驗。

鐘路3街大排檔
地址：地鐵鐘路3街站5號出口(有好多檔，我地食呢間喺Hotel Hertz對面，算比較大檔)

Follow us:

Instagram: http://ttp://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com