再窮都要去旅行！

愛麗絲的秘密花園

用餐日期：2017/01/10

位於旺角高氏大樓嘅愛麗絲的秘密花園已經完成裝修，現正試業中。

一出電梯口，已經見到愛麗絲故事嘅場景！

單單一條走廊足見店家嘅心思，以主題餐廳而言，製作相當認真，有部分擺設更加係人手製造、加工。

由於餐廳剛開業冇耐，所以人流唔多，店員暫時都能夠充當導賞嘅角色，為每位客人介紹佢地嘅佈置，如何配合主題、食物，加上店員都好熟悉愛麗絲呢部作品，令客人都份外投入。

雖然餐廳位置有限，但裡面嘅裝潢亦都冇令人失望，連唔係愛麗絲粉絲嘅我都少女心發作，不停影相。相信如果係忠實fans，見到咁立體嘅場景相信都會好興奮。

店主喺裝潢上確係花左唔少心機，唔同嘅位置都有特別嘅設計，務求令每個角落嘅客人都影到靚相！

連個陀錶我都影左好耐…

由於餐廳仍在試業中，菜式尚未落實，以下幾款可以作為參考，不過完整餐單可能要再向店家查詢。

暫時食物餐牌：

暫時飲品餐牌：

喺"Drink Me"嘅menu中，有咖啡、茶、奶類、梳打飲品，全部以《愛麗絲夢遊仙境》人物名命，例如以下嘅漸層飲品係「白皇后」。（店主話訂左更配合主題嘅杯未到貨，好期待呢！）

白皇后 $48

其實係凍水蜜桃乳酸梳打，漸層顏色好靚，水蜜桃味重，不過呢杯稍甜。

咧嘴貓 $48

紫色呢杯係凍原個青檸藍梳打，呢杯相對冇咁甜，顏色一樣夢幻。

當然亦都有"Eat Me"餐單，暫時見到選擇都唔少，例如沙律、意粉、小食、甜品。不過由於都係試業形式，所以有部分菜式暫時未有供應，以下幾款可以參考 ~

餐湯一啲都唔馬虎，店主話都係即點即做，味道相當唔錯，蔬菜味濃郁。

煙三文魚沙律，份量一般，不過沙律菜非常新鮮。未知店家日後落實餐牌會唔會保留呢款沙律。

連餐具都好靚，一定滿足到相機食先嘅朋友 ~

鮮蝦配鮮製菠菜忌廉意粉

一上枱嘅時候，都有個疑問，鮮蝦呢？…原來「寶物尋歸底」，蝦嘅份量都唔少，不過通通埋喺意粉下呢！

有客人認為意粉比較腍身，我個人覺得還好。菠菜意粉比較乾身，喜歡醬多嘅朋友可能要點卡邦尼。

—般我都唔太期待主題餐廳嘅食物，不過呢碟意粉味道尚算不俗，單點嘅話，我見價錢大約七、八十蚊，視乎款式。

由於漢堡係即製，需時等候，我就襯空檔時間四圍影相。

仲有故事書，左邊本書係立體架，超靚。

特偉兄弟雙胞胎 

如圖中所見，「特偉兄弟雙胞胎」其實係迷你芝士漢堡，首先見到實物，份量都唔算迷你，以呢個價錢，再配合食落嘅質素，漢堡相對意粉實在更值得一試，相當出色。

兩件雖然外表唔同，但都係芝士漢堡，餡料用嘅係手打牛肉。漢堡包由於烘過，非常脆口，而且帶麥味，感覺冇咁油膩。

牛肉餡都幾大塊，配合洋蔥、芝士，味道唔錯。店主仲話日後有機會加入雞肉，客人可以有更多選擇。

整體而言，餐廳佈置裝潢認真，唔會求其擺兩張凳、加幾個公仔就話係主題餐廳，呢個位都加唔少分；食物方面由於餐單未完善，所以選擇唔多，不過慶幸味道都可以接受，而價錢亦都比一般主

題餐廳親民；加上店員都睇得出係喜歡愛麗絲嘅人，盡可能都想將餐廳每個角落特色介紹俾客人，實在難得。

暫時仍然係試業階段，建議預約呢！

愛麗絲的秘密花園

地址：油麻地彌敦道577號高氏大樓6樓B號舖

查詢電話： 6595 1177 (電話預約)

Facebook：http://bit.ly/wondergardencafe     (預約發訊息也可)

Follow us:

Instagram: http://bit.ly/2g3ZtuS

Facebook:http://http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

.