再窮都要去旅行！

Acapella

用餐日期：2017/02/10

觀塘嘅工廈愈黎愈多食肆，事實上都幫襯過唔少，可惜大部分都往往集中於裝潢，食物質素未如所想，例如好熱門嘅小時光就俾我呢種感覺 

週五晚去左呢間以露營車為題嘅西餐廳，整體質素相當唔錯！

由於只有一位廚師，為左保持食物質素及穩定性，晚市只以私房菜形式供應，記得要預約。（因為佢地晚市係不設walk in的）

餐廳位置唔多，四四方方，裝潢簡約，唔代表冇花心思。

廚房外牆正正係露營車模樣，當然就唔係一架真嘅露營車。

枱布都用上必備嘅嘉頓式格仔布，加上旁邊嘅草地、帳幕牆紙、露營燈，環境舒服。

冇浮誇嘅西餐廳佈置，直接反映喺價格上，合理非常。

當日我地食嘅係以魚為題嘅七道菜，作為唔太喜歡魚類嘅我，居然食得津津有味！

意式香草包

餐包新鮮熱辣，配上四款橄欖油，包括：原味、迷迭香、蒜辣、黑白胡椒，加上黑醋。

最特別係以試管盛載，食嘅時候倒出少少，沾麵包食。

香草包鬆軟，本來以為配以黑醋應該味道最穩陣好食，出乎意料我地都好喜歡蒜辣橄欖油，味道最突出，同香草包形成強烈衝突感

周打魚湯

廚師略作介紹，佢採用比目魚作材料，魚味香濃，唔腥之餘仲係鮮，肉質嫩滑。

唔似一般西湯咁杰身，入口順滑，配料豐富，蘿蔔、芹菜我都吃光光

美中不足係魚骨未能去掉，飲湯若然要小心奕奕，未夠爽快。

煎龍脷柳沙律

龍脷柳簡單用上鹽、胡椒醃製，輕輕煎過，魚肉嫩滑，表面微脆。

凱撒沙律醬加上沙律菜，好新鮮，份量不少！

鹽焗魚

廚師表示呢味用上紅友魚，經過多次測試最適合鹽焗，最能保留肉質鮮嫩及肉汁。

紅友並冇事先去麟，以蛋漿加鹽包住成條魚焗至金黃，難怪上枱聞到強烈蛋香。

廚師幫我地輕輕分拆，令我諗起潮州鹽焗烏頭魚肉紮實，當然肉質點都唔及蒸魚滑溜，但都唔會鞋口，而且保留魚汁、魚油，加上冇添加額外調味，食到魚嘅原汁原味 

魚麟有助阻隔鹽份滲入魚肉，魚肉內嘅檸檬相信都對辟除腥味起左唔少作用，既唔鹹更加唔會腥。

煎三文魚柳

三文魚柳以薰衣草香料醃製，味道唔算好香濃，帶淡淡薰衣草香。

三文魚煎得恰到好處，皮脆肉嫩，沾上少許荷蘭醬減輕油膩。伴菜有蘆荀及自家製薯蓉，入口細滑。

蕃茄磨菇薄餅

薄餅餅底自家搓製，加入香草，配料簡單鼙加入蕃茄、磨菇。

雖然薄批底夠脆，唯茄醬唔多，食落較淡，磨菇份量較少，口感一般。

意式奶凍

建議由味道較淡嘅奶凍開始食，奶凍滑溜，口感結實，奶味香甜，唔會覺得膩

焦糖燉蛋

焦糖薄薄一層，燒至香脆，甜度適中。唯燉蛋唔夠滑溜，食到有少許糖粒，跟廚師反映過，相信會作出改善調整。

以上就係七道菜。

廚師仲為我地送上一客自選海鮮配料意粉，佢地名為「車仔意粉」，以車仔麵概念而生，客人可以自選兩款配料，包括海鮮、蔬菜、肉類，並以全橄欖油即製，平日午市供應，連同餐湯、冷熱飲品，竟然只售$40！

意粉煮得剛好，唔會腍身，而且份量唔少。海鮮絕不馬虎，青口大大粒，帶子爽口，所版呢個價錢真係超值。

咁貼地嘅價錢，加上質素，如果喺附近番工，我一定會當呢度係飯堂呢！

作為參考，午市餐牌：

整體黎講，我地非常滿意呢餐晚餐，捧住肚皮離開，回家嘅過程雖遠，但大家一路討論剛才菜式，一路回味各自所好。以人頭三百蚊，食到七道菜，實屬超值。

雖然冇高級西餐廳嘅裝潢，卻有水準菜式，加上服務一流嘅廚師、店員，話係達至酒店水平亦不為過。

細問之下，原來廚師曾經從事酒店業，經過七道菜，我地都感受到佢對食物、服務有好高要求，認真看待客人，重視意見，相信日後再黎，定必一樣滿意。

再提提你，晚市係私房菜，記得預約，有特別喜好可以預約時跟廚師溝通，睇睇能否配合。

Acapella 

地址：觀塘成業街19-21號成業工業大廈4樓406室

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com.