Paddington Pancakes 柏林頓班戟屋

用餐日期:2017/03/12

來自馬來西亞嘅柏林頓班戟屋係以班戟為主題嘅餐廳,喺澳門有兩間分店,最特別係分店分別供應唔同形式嘅班戟。

東方斜巷店主要以美式班戟,即係鬆餅,或者我地叫做熱香餅;位於白馬行嘅分店則供應歐式戟,即係窩夫、可麗餅

除左有傳統甜班戟外,仲供應唔少有具創意性嘅鹹食班戟,有冇諗過班戟都可以當正餐食?

喺香港食crêpes冇8、90蚊都走唔甩,成日覺得澳門物價接近香港,但相對上柏林頓班戟屋定價都合理,幾個朋友share食相當划算。


上次我地去嘅係東方斜巷店,鬆餅相當出色,而且份量唔少,今次過去澳門就去左近白馬行分店,試埋小店嘅鹹食班戟。

柏林頓班戟屋位於小巷中,位置較癮蔽,但門面就幾亮眼。

Paddington-Pancakes-01.jpg

餐廳裝潢花過心思,靠近門口係比較悠閒嘅梳化位置。

Paddington-Pancakes-02.jpg

人多都唔怕坐得唔舒服。

Paddington-Pancakes-04.jpg

另外有少量二人、四人枱。

呢間分店明顯比東方斜巷嘅闊落、空間感足,而且人流冇嗰邊咁旺,所以我地都慢慢食,hea一陣。

Paddington-Pancakes-03.jpg

由於一落船只係去左文創村食左件撻同埋一份雞蛋仔,所以點左兩份甜食,兩份鹹食,最終飽到飛起。

韓式芝士粟米辣雞荷蘭餅 $75

我地非常推薦呢款味道嘅荷蘭餅,賣相已經好吸引,睇落似薄餅,其實係班戟底,周邊做到又薄又脆口!

荷蘭餅配料豐富,有雞肉、粟米粒、生菜絲,芝士,以韓式辣醬調味,份量頗多。

食嘅時候先切開一件件,由中間向外卷,直接揸住食更爽,口感有pancake嘅元素,邊位脆口,加上辣雞味道突出,惹味非常!

配合生菜絲、粟米粒,除左可以增添口感,同時減輕肥膩感,兩個人食清光覺得飽,但完全唔會滯,計番價錢仲覺得好抵食

唔鐘意食辣嘅尚有其他款式,例如煙三文魚、牛油果卷餅,仲有黑松露雜菌荷蘭餅等。

Paddington-Pancakes-05.jpg

芝士軟殼蟹格仔餅(窩夫) 配 現炸薯角及芝士醬 $79

賣相相當吸引,以軟殼蟹為主角,用兩件格仔餅夾住,類似漢堡造型;加上薯角、沙律,同樣都係抵食之選!

格仔餅實心有份量,軟硬適中,唯獨爭少少蛋香。軟殼蟹size一啲都唔細,有霸氣,食落脆口,值回票價

芝士汁由於採用水牛芝士,較為軟身,容易做成拉絲效果,不過味道相對唔會太濃烈,可以考慮加少少海鹽調味。

Paddington-Pancakes-06.jpg

而薯角有驚喜,熱辣辣即時炸起,非常香脆,就算唔係即時食都依然保持。旁邊嘅沙律菜既作為點綴,亦同時減輕成份格仔餅嘅油膩感。

Paddington-Pancakes-07.jpg

鹹嘅班戟好啱我地口味,推薦大家去白馬行分店一試。至於甜食,我地揀左兩款,包括招牌朱古力卷、窩夫。

雜果黑糖麻糬窩夫  配  香草雪糕 $68

窩夫質地、口感基本上差唔多,裡面夠軟熟,如果加少少焦糖喺面頭,做到外脆內軟更好。

Paddington-Pancakes-08.jpg

特別之處係窩夫中間係麻糬夾心,少少甜,食落煙韌,就算唔加糖漿都好夠味。

雲呢拿雪糕冇乜特別,反而伴碟嘅雜果夠多,有香蕉片、士多啤梨、奇異果、菠蘿、藍莓,幾大方!

Paddington-Pancakes-09.jpg

Paddington-Pancakes-10.jpg

招牌朱古力卷 $62

招牌朱古力卷以班戟配上花生醬、oero、花生、朱古力醬、淡忌廉,再加一球雪糕,份量非常大,如果好似我地咁之前已經食左幾樣野,隨時食唔哂。

12吋嘅荷蘭甜薄餅卷左兩層,口感軟熟,一層一層朱古力醬、花生醬相隔,甜度適中

雖然有oreo碎餅、花生粒,但可能比較碎,所以口感唔係太明顯,食落比較單一。

Paddington-Pancakes-11.jpg

Paddington-Pancakes-12.jpg

Paddington-Pancakes-13.jpg

飲品方面都有唔少選擇,有咖啡、朱古力飲品、果汁、沙冰、奶昔等,價位大概三十幾蚊。

薄荷青汁 (青瓜、雪碧、薄荷葉) $34 

青汁比較解膩,所以揀左呢杯,飲落清新,不過薄荷味唔夠強烈。

Paddington-Pancakes-15.jpg

雜錦樂園 (香蕉、小蜜桃、芒果、雜莓) $34

鮮榨果汁比較健康,水果混合味道酸酸甜甜。

Paddington-Pancakes-14.jpg

總括黎講,我比較喜歡柏林頓班戟屋嘅鹹食,價錢唔貴之餘頗有水準。去到澳門唔想淨係食葡撻、豬扒包可以試下班戟。

當然啦,話就話係班戟主題店,其實佢地仲有沙律、意粉、意大利飯等主食,並非戟愛好者先可以黎


柏林頓班戟屋

地址:柯傳善堂圍11號A地下 (白馬行利基通訊對面巷直入)


Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

 

arrow
arrow

    I'm Carol 發表在 痞客邦 留言(0) 人氣()