千笹日本料理
用餐日期:2017/03/12
澳門之行都有唔少餐廳想食,本身心中有另一選擇,但上網搵搵下資料先發現,原來該餐廳已經轉左做放題。咁我地放題就冇乜興趣,唯有搵另一間
千笹日本料理聽番啲澳門人講,都算係澳門比較唔錯嘅日本菜,朋友話當然比較香港仲有距離,不過都可以一試。
佢地有三間分店,分別係我地去嘅筷子基店、花城店、百老匯大街店,因為聽聞客人都幾多,所以預先打左過黎訂位,聽電話嘅店員好有禮,而且聽起黎好開朗,即時已經對佢地印象唔錯
週日晚黎到,幾乎滿座,加上筷子基店本身位置唔多,想食嘅話真係最好訂位,因為見walk in嘅客人都基本上要等位。
小店裝潢好有日本風味,燈籠、粉彩手寫嘅餐單、木製枱凳,仲有幾個面對師傅嘅吧枱位置。
餐單食物選擇非常多,沙律、刺身、壽司、卷物、串燒、爐端燒、手作料理、天婦羅、鍋物、丼物、湯、拉麵、烏冬、冷麵,花多眼亂
定價中上,兩個人都食左7百蚊左右(上網發現某網站有9折券,成功用到: http://bit.ly/2mSR5zH),都食得幾飽,但就唔係話點左好多靚野,人多嘅話相信會正好多。
由於我地只有兩個人,食物款式揀得比較多,二人枱其實唔係好放得落,呢方面我都有少少躁底+無奈
餐廳彈性唔夠高,考慮到餐枱唔夠大,應該控制出菜速度,有部分熱食,我地根本食唔切,都凍哂了。或者我應該逐樣落單啦…
刺身:
三文魚腹 $78/5片;北寄貝 $62/5枚
三文魚腩食落都好新鮮,而且厚切,肥美北寄貝就比較普通。
見有唔少人都會點佢地嘅刺身拼盤 (六款$328/十款$468)~
沙律:
溫室青瓜蟹籽沙律 $48
沙律都有十款,$52-$98,點左最普通嘅款式,喜歡特別啲嘅有海膽蟹肉沙律、芝士烤雞沙律等。
青瓜沙律賣相唔錯,份量唔少,青瓜食落好新鮮,沙律醬唔會太酸!
壽司/1件起:
蟹籽壽司 $10、香蔥金槍魚腹蓉 $26、火炙左口魚邊 $28、火炙芝士帆立貝 $24
壽司價錢偏貴,所以只係點左4款淺嚐,真係幾唔錯,金槍魚腹蓉鮮味非常,特別鐘意左口魚邊,入口即溶
串燒:
京都黑七味串燒雞中翼 $22/2隻
串燒雞中翼味道唔重,皮燒得微脆,唔會油膩。
南高梅燒丹波雞柳串 $18
來自和歌山嘅南高梅,唔試過就唔知有咩特別,可惜失望了。
雞肉串雖有醬汁,但味道唔強,而且雞肉夠乾身冇味
日本料理:
千笹豚平燒 $48 (本店限定)
見餐牌上寫住只有此分店供應,都點左一客試下。
大阪燒、文字燒就聽得多,豚平燒係第一次食,豚平燒都係關西嘅鐵板料理。
食落煙煙韌韌,蛋味濃郁;放涼嘅話味道有差,記得趁熱食
溫玉子牛舌鐵皿燒 $86
牛舌煮得腍身,而且入味,好似牛腩咁嘅質地,食到尾略鹹。
手作料理:
鯛魚湯季節野菜煮蛤 $88
如果喜歡飲魚湯,一定要點呢個蛤蜊份量不少,粒粒都大粒,完全冇沙。
特別係個湯,真係好鮮甜,魚湯一啲腥味都冇
鍋物:
豚肉韭菜泡菜鍋 $108
最後先上嘅泡菜鍋,其實我地都已經飽左8成~
點左泡菜鍋還是有啲失望,泡菜份量太少,所以味道較淡,泡菜鍋係應該喺韓國餐廳食的
鍋物材料都幾豐富,有豚肉、菇類、泡菜、韭菜、娃娃菜。
雖然有韭菜,但味道唔強烈,好似我咁唔食韭菜,只要夾開,味道都唔會好嗆。
總括黎講,呢餐都非常豐富、滿足,埋單9折後650蚊,價錢稍貴,但味道不錯,同意朋友所言,都算係澳門性價比高嘅日本料理
不過以呢個價位,服務可以再細心一啲,加上呢間分店座位較逼,如果再訪,我或許會試試百老匯大街嘅新店。
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: http://mrmrsfoodhk@gmail.com
留言列表