再窮都要去旅行！

園林小食

用餐日期：2017/04/02

去完澳門都已經一段時間尚未有時間整理照片，一直拖到而家，都超過一個月，哈哈。寫野嘅速度永遠追唔上食野嘅速度呢

Day2由珠海番過澳門打算食早餐，事前本身安排去金利，點知到左門口先見到連續休息幾日…噢…即時冇哂方向 (笑)

然後上網搵其他餐廳，冇乜頭緒下去左三盞燈附近，舟車勞頓左一朝，又坐巴士又行黎行去，打算求其食少少野醫肚要緊，見呢間鋪頭門口擠左好多人，決定一試！

門口位係外賣位置，中午時間人潮湧湧，有唔少人排隊等外賣，店內位置唔多，類似香港廿蚊碗雲吞麵店嘅格局，清一色需要搭枱，有少少逼啦。

始終係快食快走，服務方面都唔好抱太大期望。

園林小食主要供應麵食，配唔同材料，例如鮮牛肉、豬扒、魷魚、魚片等，單拼就唔貴，但加餸的話每款要加$11。

眼見大部分人都點咖喱，咁我估咖喱都幾有名掛…

咖喱雞翼河 $24

咖喱豬扒雞翼撈麵 $36

咖喱豬扒雞翼麵 $36

咖喱薯仔豬扒米粉   $36

咖喱味唔算好濃烈，汁唔會太稠身，鹹淡適中，唔係好辣，見隔離枱小朋友都食到

河粉份量都幾多，滑身偏幼，點左雞翼有兩隻，連埋兩隻雞翼尖，唔係得層皮有咖喱味，炆得好腍，離骨，幾好食

豬扒比較薄身，例牌加鬆肉粉，肉質都鬆，但因為煎過，都會有少少油。

湯粉整體都幾好食，唯獨撈麵直接用咖喱汁撈過又冇湯汁就會比較鹹啲。

油菜 $17

菜心比較老，部分有渣。

汽水 $11

維他奶 $11

呢度嘅維他奶係樽裝~

比較搞笑係，問呀姐有冇芬達，呀姐話有；然後拎出一枝芬達提子汁，哈哈哈，ok冇錯嘅，我一心以為係橙汁啫 (笑)

眼見都有唔少本地人食嘅園林小食，唔算好多遊客，今次都係誤打誤撞食左呢間麵食，可能我地行左好耐，都覺得肚餓，寧舍覺得好味！

曾經經歷過不愉快旅遊，都有少少陰影，總結旅遊還是要搵合適嘅旅伴，食啲乜、去邊度冇乜所謂，最緊要開心。