Picada
用餐日期:2017/06/21
Picada - 可以載歌載舞嘅拉丁美州餐廳
位於中環蘭桂坊嘅Picada係一間以拉丁美州菜融合嘅餐廳,南美菜喺香港未算普及,呢度係其中一間。餐廳菜單混合多款拉丁美州國家美食特色,配合由多位知名藝術家設計嘅裝潢,加上音樂,客人感覺完全遠離都市壓力,每日晚上愈夜愈精彩,例如星期三會有舞者分享莎莎舞,週末更有現場樂隊表演,一班熟客載歌載舞,氣氛一流,享受食物之餘,玩得盡興,對南美人而言,食飯大概係一種社交活動
餐廳裝潢富濃厚嘅南美風格,由店主同朋友親自創作、佈置,加入亞瑪遜河、森林、黃金國、沙漠等大自然概念,用餐環境令人放鬆,空間感足。
每晚9點過後,中心原本放有枱櫈嘅位置更會移開,化身成舞池,燈光稍稍調暗,配合音樂、舞蹈,客人都相當投入。
喺呢度用餐,分分鐘用上兩三小時,即使冇因為強勁音樂節拍動容,大概都會注目欣賞一班熱愛舞蹈嘅舞者,不分國籍、年齡,活力十足。喜歡學跳舞嘅客人都歡迎加入,佢地不時有基礎教學。
餐牌選擇豐富, 混合多國菜色,食材都來自不同嘅國家,例如牛、豬來自阿根廷;法國嘅雞肉;加拿大、越南新鮮運送嘅海鮮,定價中上。
餐牌全英文印刷,而且大部分並非常見嘅菜式名稱,幸好餐廳都有個別店員略懂廣東話,可作介紹。
頭盤係秘魯嘅特色菜 - Ceviches, Tiraditos,指嘅係拉丁美州烹調技巧,配合青檸、檸檬汁去醃製海鮮、貝殼類,強調100%用上永續海鮮 (環保海鮮),享受美食同時保護海洋資源。
Peruvian Ceviche $148
切粒嘅魚肉製成半生熟狀態,除左用青檸汁、鹽、洋蔥、香草等,亦加入名為"Leche de tigre"呢種醬汁醃製魚肉,原來係西班牙文,譯作「老虎的奶」,可提升魚肉嘅鮮味。
魚肉食落唔腥反而鮮味十足,特別配上醬汁後頗有泰式風味,旁邊抹上甜薯蓉,作為開胃菜清新不膩
Hot Scallop $98/2pcs
以少許黃辣醬、芥茉蓉煮鮮帶子,帶子新鮮爽口,咬落軟熟 而且唔洗怕會好辣或者嗆喉,只係好微辣,芥茉蓉甚至有少少似青豆蓉添。
以蕃薯葉點綴,甜甜地增添口感。
另一款南美特產係 Empanada - 指用白玉米烤成嘅餡餅或者麵包,喺哥倫比亞、委內瑞拉幾乎每餐都會食用。
Slow Cook Beef Ribs Arepas $78
以慢煮24小時牛肉夾上牛油果蓉、洋蔥、蕃茄粒、香草製成烤玉米餅,雖然細細份,但相當飽肚,喺當地唔少人都以此作為主食。
玉米餅烤至脆硬,不易分割,但本身味道較單調,所以餡料選擇多,我地揀嘅係味道較濃嘅牛肉,配搭得宜。
牛肉食落有肉汁,加上洋蔥、蕃茄等配料,口感豐富,有少少墨西哥風味,最後以牛油果蓉作為緩衝,令整體唔會太油膩
另一款代表秘魯嘅美食係 Anticuchos - 串燒。
Carne $128
一共有三款,分別係牛肉、雞肉、三文魚。
我地揀嘅係牛腩串燒,以薯仔作伴菜,腩肉來自阿根廷,雖然好大塊,表面烤至香脆,但食落好腍身,可見烤嘅時間剛好,配以少少醬汁,惹味但唔辣
Bandeja Paisa $248
飯類方面有三款,以海鮮、鴨腿、豬肉為主菜,份量頗大,適合多人分享,相對價格較高。
Bandeja Paisa係哥倫比亞有名嘅料理,以腩肉、黑豆、牛油果、煎蛋、肉碎等做成什錦飯。
拉丁菜都經常用到豆類,唔少飯都會配以黑豆、腰豆等;可惜豬腩肉比較乾硬,有明顯膻味可能未必太適合港人口味
Three Duck "Arroz xon Pato" $238
相對之下,呢款什錦飯比較對味,配以煙鴨胸、鴨腿、煎蛋及其他配菜。
煙鴨胸有明顯配煙燻味道,賣相仲有少少似叉燒,食落唔乾帶微微香辣;至於鴨腿可能要做到全熟嘅關係,肉質較實,似鴨胸位嘅質地。
飯量非常多,大廚話係用上韓式醬炒,水準不俗。
Tres Leches $75
甜品部分挑選經典嘅三奶蛋糕,以海綿蛋糕混合淡奶、煉奶、奶油忌廉做成,表面沾上椰絲,增添口感。
椰香十足,好似食緊椰子糖咁,忌廉細滑,但畢竟以奶製成,都會略甜。單點價錢有點貴,未必個個會食
Chocolate Surprise
以盒仔裝住4件朱古力,下面鋪滿黑白芝麻,上枱時仲會附上乾冰,一打開盒子有煙冒出,賣相幾靚,至於朱古力中規中矩。
飲品選擇不少,酒精、非酒精類都有。
9點鐘過後,店員就會搬動枱櫈,一班舞者自動自覺準備,原來今晚(週三)係salsa之夜,我地喺旁邊都欣賞得不亦樂乎。
本來以為外藉人士佔多,點知當中有唔少本地人,玩得相當投入。
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog:http://http://bit.ly/ywycarol
Contact us: mrmrsfoodhk@gmail.com
留言列表