火薈中日火鍋 Flaming Pot【二訪】
用餐日期:2017/08/08
今次係我第二次黎呢間火鍋店喇,記得對上一次印象都非常好,由環境、食物質素、服務到臨走我「參觀」埋店家嘅洗手間都非常滿意
餐廳位於酒吧街果邊,以前就旺,而家大不如前,唔知係咪因為咁,呢間火鍋店客人唔算好多,所以我地都冇預約,直接walk in。
餐廳喺1樓,個人認為裝潢幾靚,相當闊落,四人枱位置充足,而且客人唔多,唔催唔趕,真心坐得舒服
亦有房間,雖設最低消費,但問過定價合理,人均消費二百左右就坐到,日後有聚會都要提議朋友黎呢度。
火鍋選擇豐富,湯底都有十幾款 $68-$298,沙嗲、麻辣、胡椒豬肚雞、冬瓜瑤柱蛤蜊、蝦兵蟹將等。配料有肉類、海鮮、刺身、自家製手打丸、餃類、一般火鍋配料、粉麵、蔬菜等,定價中上,但質素甚高。
佢地都有套餐供應,三款定價每位 $208/268/298,另收茶芥($10/位)、醬油($15/位)、加一服務費,連埋飲品人均三百起,包湯底、牛、海鮮、丸類、餃類、滑類、蔬菜、粉麵等,上次我已經試過最平果個餐,其實相當抵食兼飽肚。
三文魚 (免費)
只要like店家嘅facebook就有三文魚剌身送呢,按者有份,雖然係免費,但質素唔曳
胡椒豬肚雞鍋 $138/半隻雞:
推介!胡椒味非常突出,裡面加有酸菜,成個湯底好惹味,頭一輪我覺得可以飲用完先打邊爐,唔會太鹹,之後加湯就唔好喇。
豬肚爽口,最正係果半隻雞,朋友們都大讚好食,因為完全唔老唔韌,非常高質,相信唔係冰鮮貨嘅質素,啖啖肉而肉嫩滑
頂級安格斯牛頸脊 $198/中
上次我食套餐,包嘅只係雪花肥牛,但質素真係唔差;今次自己點,就點左靚少少嘅牛頸脊,果然冇失望
牛肉份量唔多,肥瘦雙隔,手切雙飛,食落會比較厚身,口感一流帶嚼勁,牛味濃郁
手打雙拼丸 $78/8粒
呢度嘅丸類又係另一樣我覺得必點的,當然係揀左手打蝦丸、手打墨魚丸,真係好好食丸類十分大粒,食得出係手打貨,特別推薦蝦丸,食落啖啖蝦肉,好新鮮,係我食過最好食嘅蝦丸三甲
魚片頭 $38
相對其他配料當然係比較普通,中規中矩。
午餐肉 $38
餐肉切成條狀,一共6條,可能有啲人會覺得唔抵食,但我打邊爐必點嘅,而呢度嘅餐肉又係好好食,切得厚身,冇乜肥膏位。
滑豆腐 $28、油麥菜 $32
豆腐係另一樣必點配料,放落任何湯底都好食;油麥菜一片片插好,唔好以為好少,其實份量好足,夠三個人食。
王老吉 $15、汽水 $15
飲品選擇唔多,除左汽水,就係凍檸樂、咸檸七、王老吉、啤酒、竹蔗茅根,價錢就真係貴啲。
總括黎講,同我第一次黎一樣,今次都係一路食一路讚好食
環境舒適,可能因為客人唔多,店員驟眼睇只係見到兩個,但非常賣力有禮,絕對冇怠慢客人
人均三百左右,雖然較同區嘅任食火鍋價格為高,但唔知係咪我年紀大呢,愈黎愈怕放啲平得黎唔好食嘅野入口,一坐低就瘋狂畫畫畫、落單…然後限時限刻狂食。
有時寧願俾多百零蚊食啲高質素嘅火鍋,同朋友慢慢傾下計食下野,睇住電視,舒舒服服。
餐牌:
火薈中日火鍋Flaming Pot
地址:太子花園街239號嘉慶苑1樓
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表