再窮都要去旅行！

綠茶餐廳

用餐日期：2017/07/22、2017/08/13

深圳有唔少主打江浙菜嘅食店，其中來自杭州嘅綠茶餐廳頗受歡迎，曾經掀起一陣排隊潮。

亦有唔少人將佢同另一家差唔多類型嘅外婆家作比較，同樣係走平價路線嘅連鎖店，人均消費低於一百，餐單選擇多樣，性價比高。

綠茶餐廳喺深圳有好幾家分店，主要集中喺大商場，其中較多香港人去過嘅相信係海岸城店及近東門嘅1234space店。

綠茶餐廳嘅裝潢配合店名，走自然清新路線，以綠色為主調，不時見到瓷器裝飾。

海岸城分店位置相當多，週六下午茶時間去到唔洗等位；東門店裝潢風格大致接近，但細枱較多，人多嘅話等候時間會較長，週日晚等左差唔多一個鐘先有位呢！

餐牌選擇超多，有冷菜、小菜、湯羹、甜品等超過120款，定價親民。唯一挑剔係餐牌未有圖文並茂，有時睇菜名，真係唔知點左啲乜。

椒麻黃瓜 RMB ¥6

喺國內食黃瓜、拍青瓜，基本上都好對味。

火焰蝦  RMB ¥38

用錫紙包住已調味嘅蝦串，上枱會即時點火，呢個動作都係少少gimmick，食落都冇乜特別。蝦有18串左右，唔貴。

蝦黃蟹粉煲  RMB ¥22

份量很多，炒粉絲都夠乾身，唔算好油膩。

鮮蝦小籠包  RMB ¥16

小籠包皮有點厚，不過湯汁夠多夠熱。

綠茶烤雞  RMB ¥55/隻、綠茶烤肉  RMB ¥38

綠茶雞肉合併  RMB ¥55

好多人都會點呢兩款，或者人少啲會點合併。上枱時附上蠟燭，熱住食，不過只係微暖，幫助不大。

雞肉食落微辣，香料味明顯，皮燒至香脆，不過肉質唔夠嫩滑，或多或少有啲乾鞋

豬腩肉味道較好，肥瘦雙隔，睇落好似幾肥膩，食落可以接受，加上有塊鐵板烘住，油份會慢慢逼出。

豬肉皮脆肉嫩，份量多。烤雞同烤肉二選一，我會揀後者。

香烤雞翅  RMB ¥16

普通烤雞翼，冇乜特別。

農家小菜  RMB ¥18

原來係豆角，切成細粒，加辣椒粒炒成，辣勁十足，送飯之選。

客家茄子煲  RMB ¥22

並非我地食開嘅魚香茄子，較接近紅燒茄子，醬汁鹹香，幾好食。

杭州醬鴨  RMB ¥28

唔係太啱我地胃口，鴨已風乾，冇肉食，又乾又硬，有少少似廣東臘肉嘅味道，一般

綠茶烤魚  RMB ¥38

負皮……魚肉重泥味，十分之腥，而且多骨，連喜好食魚嘅朋友都唔想食

糖醋里脊 RMB ¥16

以甜味為主，正常水平。

綠茶餅  RMB ¥12

喺國內好多餐廳都有嘅綠茶餅，外婆家都有~

雖然喺綠茶餐廳，兼菜名叫綠茶餅，網名黎嘅啫，同綠茶味完全冇關係。

外圍沾上大量芝麻，增添口感，啖啖都有芝麻香，類似煎堆仔。外皮炸到脆脆地，裡面嘅芋泥餡微甜，外脆內軟

即時食味道較好，放涼冇咁好食。食落唔會好油膩，但兩件已經好飽肚。

麵包誘惑  RMB ¥28

其實冇乜特別，為相機食先已點。麵包烘至鬆軟，唔會太乾身，不過配一球雪糕太少，建議加錢要多幾球，哈哈。

招牌牛奶刨冰   RMB ¥18

刨冰、沙冰有幾款，花生、牛奶、水果、芒果，定價RMB ¥18/22。

我地俾個造型嚇一嚇，用長碟上，份量多，同一般刨冰嘅賣相有好大出入。

一大磚冰塊上鋪滿綠豆、紅豆、珍珠等材料，仲有少量芋圓，加入牛奶，其實係幾足料，亦唔會太甜。

不過冰冇打碎，仲要用長碟盛載，唔方便食用。

由於餐廳人流很多，店員都好繁忙，基本上唔係好招呼到客人，特別係東門店，上完菜調頭即走嗰隻，舉手叫服務員亦要耐性。

菜式多樣化加上消費不高，相信就係綠茶長期有人排隊嘅原因，人均RMB ¥60-80，性價比幾高的。

海岸城店  

南山區文心五路33號海岸城購物中心   

1234SPACE店  

羅湖區建設路3018號1234space5層

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com