再窮都要去旅行！

啡寮 Valor Cheung Chau

用餐日期：2017/11/22

距離上一次黎長洲已經係兩年前，記憶猶新，又熱又多人，一班人本來興致勃勃，最後熱到又黐退熱貼(嗚)。

近期留意到長洲都多左好多食店，存下幾間，心思思想去。早個零星期又涼涼地，啱哂我呢啲躁底人士，梳乎~

因為怕週末人多，專登揀左個平日，一行四人去走走

本來以為平日嘅長洲冇乜人，諗多左但一定好過假期黎。雖然有唔少食店都冇開門(哭)，包括左【長洲冰室】，想試個冰啊，可惜。

當日天氣超好，藍天白雲，又有涼風，久唔久吹到我中分。由於早餐食過裕興，我地喺附近行左陣黎左呢間咖啡店歇歇。

啡寮主打冰滴咖啡，由門面、裝潢、出品都好唔長洲，佈置幾花心思，牆身、木箱、咕𠱸等都印上logo。店內有少量梳化位置，配合簡約嘅色調，滿足打卡人士需要。

餐牌供應冰滴、手沖咖啡、朱古力、茶等，定價$32-52，比較吸睛一定係，椰皇冰滴咖啡。

海鹽朱古力 $42

朱古力點左熱嘅，本來想要焦糖嗰款，但當日未有焦糖。呢杯海鹽朱古力味道都唔錯啊，朱古力味香濃，拉花好靚，冇乜氣泡，而且一路飲都係完整。

奶泡帶少少海鹽鹹味，兩者配合得很好，令朱古力味更加香甜，適合呢個天氣飲

伯爵茶 $32

熱底人士係唔會為左拉花放棄凍飲的，哈，另一杯我揀左伯爵茶。杯子比較細瘦，最欣賞係佢地用環保飲管。

（雖然自己都唔係好慣，因為我係咬飲筒嘅人） 不過見人地願意多做一步，都好值得支持

伯爵茶夠哂凍，冇添加多餘野，就係一杯好濃好濃嘅伯爵，茶厚滑。英式茶有別於一般日式或者台式茶，有茶種嘅甘澀，未必個個喜歡。  

長洲冰滴咖啡 $35

冰滴一般價錢都唔平，而且供應量有限。朋友點嘅呢杯有明顯嘅漸層，可以見到咖啡嘅濃度。

價錢唔貴，入到黎長洲都可以一試。

餐牌：