柒‧柒手作早午餐
用餐日期:2017/12/18
韓國之前吹起一股「自動販賣機潮」,有咖啡店外設藍色販賣機,吸引好多網美前去打卡。而黎到台中,都可以搵到幾家有販賣機造型嘅店家啊,喺北區有藍色同黃色販賣機出沒。
呢家設有粉紅色販賣機嘅「柒‧柒手作早午餐」喺西區昇平街,有唔少人都專程去影相架。唔知幾時吹到黎香港?
柒‧柒手作早午餐位於昇平街嘅轉角位,距離公車站接近15分鐘,作為參考由台中公園出發的士收費大約NT135。
餐廳位置比想像中多,有望窗嘅文青位,另有8張枱,裝潢簡約樸實,空間感足,枱櫈唔會密麻麻。
餐廳採用開放式廚房,煮嘅都係簡單嘅早午餐,唔會話聞到油煙味,客人自行點單,餐具自取,由店員送餐,並冇收取服務費。
小店就營業到下午3點,用餐限90分鐘,不過平日早上客人唔多,所以都可以輕鬆食下早餐。
餐牌供應全日早餐、三文治、貝果、歐姆蛋、意大利麵、沙律、小食、飲品等,點了兩份早餐及飲品,人均NT220,價格合理。
起司培根貝果 NT160
食物即點即製,大約8分鐘上枱。呢份有原味貝果、芝士、培根、滑蛋、沙律。
貝果中規中矩,因為加左蒜蓉烘過,口感唔算軟熟,放涼的話會偏硬。其他配料都係簡單材料,正常質素,冇乜特別驚豔之處
厚蛋起司豬排三明治 NT149
呢份會較抵食,所以眼見大部分人都有點,價錢大約40蚊港幣,有炸豬排、芝士、厚蛋、蕃茄、沙律菜,仲配埋原味脆薯。
三文治係薄薄一片,配料豐富,豬排即時炸起,冇油膩感。蛋同豬排一樣厚,食落滿足,不過會稍微影響豬排外皮脆脆嘅口感。
薯條份量不少,沾粉即炸,薯味幾重,口感酥脆,呢份三明治性價比挺高
巧克力尬鮮奶 NT100 (跟餐減NT20)
相對較小一杯,價錢唔貴。不過朱古力奶唔算話好濃嘅朱古力味。
柒彩霓虹燈 NT110 (跟餐減NT20)
果昔共有4款,有藍莓配香蕉、鳳梨配藍莓等,呢杯「柒彩霓虹燈」係火龍果加奇異果嘅果昔,有明顯漸層。
果昔打得細滑,口感唔會過份稠,火龍果味本來就比較弱,搭配奇異果味道自然清新
柒‧柒係一間比較多本地人前來嘅食店,環境舒適,係個食早餐嘅選擇,餐點製作較簡單,味道上雖然唔會有啲咩大驚喜,但價錢唔貴。
餐廳後門就係粉紅色販賣機,又可以影下相,可以一試啊
柒‧柒手作早午餐
地址:台中市西區昇平街146號
Follow us:
Instagram:http://http://bit.ly/2g3ZtuS
Facebook: http://bit.ly/2gu1fIG
Blog:http://http://bit.ly/ywycarol
Contact us: mrmrsfoodhk@gmail.com
留言列表