再窮都要去旅行！

和牛88 

用餐日期：2018/01/15

去到日本其中一樣必食嘅相信係和牛吧，來自沖繩嘅Steak House 88進駐香港，取名「和牛88」座落銅鑼灣登龍街，客人可以合理價格品嚐到不同部位嘅牛肉。

而且餐廳營業至凌晨，更加推出宵夜和牛套餐，成為不少人嘅深宵食堂

餐廳位於永光中心，裝潢富日式風味，座位不少，有吧枱、梳化、卡座、另有傳統和式包廂，環境舒適。平日嘅宵夜時間，人流唔算多。

店員可以更自在跟客人交流，感覺佢地對餐廳、日本都有相當豐富嘅認識，招呼亦很到位。

餐牌供應黑毛和牛刺身、和牛壽司、不同部位嘅和牛，有招牌火焰牛扒、牛柳、西冷、肉眼、和牛粒、漢堡扒等。

另有沙律、小食、前菜、鍋物、飯麵、甜品，迎合香港人需要，唔怕只有牛食咁單調。

至於宵夜套餐，每晚十點半至凌晨一點供應，有和牛牛柳、蓋飯、和牛漢堡等，定價$148-388，附沙律、餐湯、白飯/法包。

我地點左兩份宵夜，然後再追加正餐牌嘅薄燒和牛、幾件壽司，非常滿足

沙律、餐湯

燒和牛 $32、和牛大拖羅 $45、和牛鵝肝 $58 

和牛壽司有不同配搭，燒和牛、赤身、配海膽、配三文魚籽等，定價$32-68，有選擇困難嘅大可點廚師精選五款壽司拼盤。

燒和牛呈淡粉紅色，脂肪較少，紋理分明，面頭嘅生洋蔥粒令一口燒和牛口感味道提升。和牛大拖羅係同行朋友之選，果然好似拖羅一樣入口即溶嫩腍冇筋，但牛嘅味道唔重。

和牛鵝肝上枱傳來香氣，鵝肝燒至微焦，慢慢喺口腔溶化味道濃而不膩，和牛都幾乎淪為配角。

薄燒和牛壽司 $68

呢款相信係其中一款幾乎每枱客人都會點嘅和牛壽司，上枱後店員都先問我地需唔需拍照，我地準備好手機佢就以酒燒香和牛，肉質薄身，輕輕一燒已經食得。

除左視覺效果滿分，味道都係一流，炙燒過後，和牛油份逼出，油香十足，沾點附上嘅蔥花、蒜，更加香口

和牛牛柳 $388/200g (宵夜餐牌)

和牛牛柳以鐵板上，落單時店員會問到需要幾成熟，我地點左五成，賣相吸引，一份約切成十件，表面燒至金黃，肉質保持嫩紅，熟成度剛好。

由於會有鐵板餘溫，最佳味道、口感應該選擇三成熟會更好，不過同行朋友怕太生。食前可以加入大蒜汁，唔需要加多調味。

牛柳肉質嫩腍，外脆內軟，口感帶點嚼勁，脂肪均勻，唔會有油膩感。伴菜有薯仔、栗米、豆角，以洋蔥墊底，浸入牛柳嘅肉汁，我地食清光。

燒和牛蓋飯 $188 (宵夜餐牌)

和牛肉鋪滿碗中，香氣十足，配上白飯、雞蛋、沙律醬，食之前輕輕拮穿雞蛋，蛋漿流出，我地輕輕搞勻再食。

牛肉煎到嫩紅色，唔會太熟，肪肪唔多，口感柔軟，加入蛋漿，更加濕潤滑溜。

Like 店家facebook送嘅飲品：

和牛88

地址：銅鑼灣登龍街28號永光中心13樓

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com