再窮都要去旅行！

龍門居

用餐日期：2018/01/27

屯門人講到掃街宵夜乜乜，必定會提到良景、龍門居、富泰啦。其實我就唔算住附近，平時多數黎買宵夜，然後坐的士番屋企，盡量保持溫度。

當然啦，呢啲小食，梗係即食最滋味，拎到番屋企都唔係太差，但點都唔夠即整即食咁爽皮。是日將食飯時間次序調轉，先喺元朗食完糖水先過黎龍門居食野，跳過正餐，留肚食小食

其實我就食來食去嗰幾間，如果之前有睇過分享，應該都見過。唯獨手抓餅今日冇開店，食少樣正野。

一如以往，先到「齊齊串泰式小食」落單，再去買其他野，等差唔多時間番去拎。

咁耐冇黎，原來佢地已經搬左去後面，串燒都係以肉、丸為主，定價$8-14/串。價錢唔貴，好過年年去咩工展會戲棚。

我地點左芝士丸、司華力腸、牛肉、豬頸肉、雞翼，加泰式辣醬，5串共$64

平時買到番屋企，多數凍左，而醬汁都變到好稠；今次即刻食，果然好食多了。

由於係泰式串燒，就唔會好似大陸串燒咁香口，燒到剛好夠熱，唔會太燶。加啲泰式醬，辣辣地夠過癮。

泰式串燒 $64

齊齊串泰式小食

地址：屯門龍門路43號龍門居地下61號舖

檢視較大的地圖

作為雞翼尖控，就一定少不了要食埋鐵板炒雞翼尖，龍門居數下手指都有5、6檔有賣雞尖，有唔同做法，有鐵板、蒜蓉。

我地試過其中三間，覺得呢間「味緣」不錯。

鐵板雞翼尖 $22

即時食，好食多了，份量不少，用鐵板炒起，有點鍋氣，加左少少辣粉、滷汁，十分惹味。

味緣

地址： 屯門龍門路43號龍門居地下21號舖

講到豆腐花、糖水，呢邊又有幾檔，最搶眼應該就係呢間「龍門手工豆腐花」，自稱「一定係全港九新界最好食嘅豆腐花」。

因為有一段時間冇黎龍門居，都無為意有家咁霸氣嘅糖水店。講到咁誇張，就算明知隔離嗰檔平4蚊，我地都即管一試

豆腐花標榜使用加拿大供應嘅特級黃豆，唔係機因改造豆，每日現場新鮮製作。

除左豆花，餐牌仲供應紅、綠豆沙、芝麻糊、喳咋、西米露等，購買呢啲會送豆花一款。

優惠時間惠顧豆花，由12點至7點，只需6蚊，當然啦，話明我地係食宵夜，呢個時間當然係收正價。

鮮薑糖豆腐花 $9

店員快手片好豆花，一般外賣兜份量，可選鮮薑汁、桂花汁，當然要加少少黃糖。

阿玉、阿婆豆花都未賣到9蚊10蚊碗，羅太十零蚊仲可以任食，所以即管就當用有豆成本高啲吧。

豆腐花加左薑汁，味道幾香，口感好似燉蛋、蒸蛋確實滑溜不過豆味一般，唔知係咪因為非機因改造豆嘅緣故，入口較淡。

至於是咪全港九新界最好食豆花，個人對呢個說法有點保留，只能說呢度嘅豆花的而且確非常滑，絲毫不覺豆渣。

始終個人口味不一，小店覺得自己出品係最好食，都理所當然。咁講話一定，就未免有點囂s

就好似嘉士伯，都話自己可能係全世界最好飲嘅啤酒一樣。咁是否屬實就見仁見智啦，但身邊起碼冇人鐘意飲嘉士伯(笑)。

龍門手工豆腐花 

地址：屯門龍門路43號龍門居地下33號舖

最後以「摩登士丹里」甜品作結，有一排真係好興食芋圓、地瓜圓，咁當時屯門又未有，只好黎龍門居。

餐牌款式巨多，有芋圓、仙草、牛乳、紫薯系列，配搭多樣，亦可以自選，款式多到花多眼亂，就好似見到鮮芋仙嘅餐牌般，揀到頭痛。

如果真係樣樣都想試的話，就唔洗煩惱，有一款叫「我最喜愛芋圓」42蚊包哂芋圓、仙草、紅豆沙、紫薯蓉、花奶、小丸子、珍珠。

仙草1號 $29

仙草系列都幾大兜，比豆腐花外賣碗再大啲，頗具份量。

裡面有三種圓s，分別係紫薯圓、芋圓、地瓜圓，各5粒，定價合理。

仙草底略為失望，基本上就係龜苓膏嘅甘味，並非小清新。質感流動性低，膏狀，唔夠滑溜

其他配料紫薯蓉同芋圓較淡，地瓜圓味道明顯啲，食落尚算煙韌，如果再軟身點更好。

摩登士丹里

地址：屯門龍門路43號龍門居地下7號舖

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com