再窮都要去旅行！

台北瘋豆甜品 

用餐日期：2018/02/17

而家都好多人會去深圳搵食，除左老早常出現嘅喜茶，鮮芋仙相信都係唔少人嘅口袋名單，價錢平得來又好食

但間中都想搵啲新鮮感，今次揀左呢間台北瘋豆甜品，唔想每次上黎都一條公式咁，食黎食去嗰幾味。

喺深圳有幾家分店，我地揀左最便利嘅東門店，位置就喺東門町老麥附近，旁邊仲有許留山。

新年期間，人流唔多，鋪面幾大，坐得舒適。話就話係來自台灣嘅瘋豆家族，個人就聽都未聽過，可能都係啲深圳品牌。

餐牌選擇豐富，有自選亦有固定款式，自選主料有豆花、燒仙草、牛奶冰、紅、綠豆湯等，定價RMB¥22/28。

配料可選4款，有紅豆綠豆、花生、芋圓、芋頭、蕃薯、蓮子、薏仁、珍珠，仲有各種圓，包括紫薯圓、包心圓、芝麻圓等。

另外招牌有芒果冰、木瓜冰，定價RMB¥28-38。

唔知係因為過年期間定平時都係咁，大部分配料都未有供應，我地呢兩款已經係盡量揀啲唔一樣

紫薯圓、包心蕃薯圓、包心芋圓、紅豆 + 燒仙草 RMB¥22

size同鮮芋仙差不多，每樣圓有6粒左右，都算幾豐富。

燒仙草對味，入口滑溜溜，又唔會似龜苓膏或者涼粉。

雖然呢間喺網上評語不俗，但我對於所選嘅幾款圓，都有點失望紫薯圓算比較正常自然，唔會太甜，口感煙韌。

但另外兩款簡直係難食。包心蕃薯圓香精味重，完全同蕃薯味拉唔上關係。包心芋圓芋味唔突出，芋餡偏實，唔推薦

綠豆、芋圓、包心芝麻圓、珍珠 + 台灣牛奶冰 RMB¥28

牛奶冰嘅份量大，裝到滿滿，幾足料，兩個人share啱啱好。可能我地揀嘅配料，色澤好似死氣沉沉，但其實味道都可以。

芋圓偏實，唔夠煙韌，鮮芋仙真係好食啲。綠豆正常野，另外點左芝麻圓可接受，起碼有芝麻味，但整體幾款圓都係唔夠Q彈。

牛奶冰味道唔錯，冰同牛奶份量適中，未至於好濃烈，甜度適中。

整體只係滿足我地對新鮮感嘅要求，質素就普普啦，未試到招牌芒果冰，唔知如何，純粹唔想下下鮮芋仙。

【深圳一日遊】鮮芋仙 http://bit.ly/2ELjCFg

台北瘋豆甜品

地址：深圳人民北路1001-53號 (東門町美食廣場麥當勞旁)

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com