再窮都要去旅行！

BlackHole 黑洞甜品

用餐日期：2018/05/22

"You cant buy happiness, but you can buy coffee & cake and that's pretty close."

假日到深圳食野或者、影相、唱K，相信都成為唔少人嘅消遣活動。網紅餐廳特別多人，雖然都聽過有人話深圳嘅甜品只有顏值，唔放得入口。

嗯，中低價嘅甜品店好似初代、無邪主要係賣性價比；去到貴少少嘅基本上都唔差，只係兌番港幣實在價值不菲。

喺深圳有唔少cafe會用來貨嘅甜品，所以某部分喺外型、味道感覺上都差唔多。假日試左呢間幾有性格嘅甜品店，出品自家製，辨識度高。

甜品店位置對於非本地人而言，有點難找，距離最近嘅地鐵大新站都要行十零分鐘，附近冇商場，真係專程過去的。如果唔係太熟路，真係搭的士好過

小店開喺馬路邊，不太起眼，同附近嘅食店整體風格很不一樣。面積唔大，只有幾張枱仔，有啲似上環、西環嘅cafe仔咁。

全店以藍、灰冷色作為主調，裝潢有個性，鋪頭裡外都有啲太空相關嘅擺設，幾特別，跟好多可以影相影足一日嘅網紅咖啡店唔同。

卡片上印有開放時間，包括一句：「沒有什麼意外的話，我們會準時開門；關門時間看心情。」好聽就有個性，唔好聽嘅咪串串貢。

甜品櫃展示當日供應蛋糕，事先喺網上睇過照片，原本想試一件名為【牛油果】嘅蛋糕，像真度高，可惜店員話冇再供應了。(哭)

蛋糕有點小貴，size的骰小巧，定價 RMB¥48-68。飲品以咖啡、茶、梳打為主，定價 RMB¥10-36。

部分甜品以電影命名，例如《菊次郎的夏天》、《湯姆和杰瑞》、《志明與春嬌》、《宿醉》等。連名字都貫徹風格，我差啲覺得佢整餅唔係為錢，係為興趣 (笑)。

冷山 RMB¥58

小山造型吸睛，山峰分明，用噴砂方式做成面層石頭咁嘅顏色。除左有賣相，味道亦唔錯。

切開後有幾個層次，以慕絲為主，另有榛子醬，夾層係覆盆子果醬，底層為蛋糕。

慕絲非常軟滑濕潤，朱古力味香濃，可能有果醬平衡，唔會過甜，幾有水準

菊次郎的夏天  RMB¥48

梨子外型精緻，其實都係慕絲蛋糕，酸酸甜甜，好認真咁食仲會感覺到梨嘅口感。

慕絲同樣地creamy細膩，夾層仲有少量細粒梨肉，冰冰涼涼，加埋焦糖、果醬味，配搭得宜。

餅底唔係脆身嘅類型，係較清爽輕盈嘅甜點

黑洞拿鐵 RMB¥35

雖然放喺餐牌上嘅咖啡類，不過店員提醒不含咖啡因。黑白色漸層，飲落係雲呢拿味…雲呢拿加冰水嘅味道怪怪的

整體而言，甜點質素頗高，一眼就認得出佢地嘅出品為左保持新鮮度，甜品係上午製作，下午出售，所以最好都係先查詢供應時間、款式，以免撲空。

深圳有咁多cafe選擇，換轉如果開喺市中心區，應該會更加受歡迎了。選址非市中心區，加上消費唔係大眾化，好似想同其他嘅cafe走不一樣的路。

比較可惜當然係價錢，兌番港幣70蚊，始終香港好多大師級都唔洗呢個價，而環境又未能搭夠，滿足少女影相嘅心，值唔值就見仁見智喇。

啊，店員操流利冇口音嘅廣東話，比較撲克臉，唔會有好熱情嘅招待、介紹，反令我覺得比較自在

BlackHole黑洞甜品

地址：深圳南頭街道學府路國興苑1002鋪 (地鐵大新站)

其他深圳嘅cafe介紹：

【深圳一日遊】Dreamiya  http://bit.ly/2jtKcoT

【深圳一日遊】ANDCAFE  http://bit.ly/2EOzEhJ

【深圳一日遊】Lady7 Café http://bit.ly/2v3RTLJ

【深圳一日遊】Line Friends Cafe & Store   http://bit.ly/2ibKKDB

【我在38樓看風景】KONG 空    http://bit.ly/2BuQf54

【深圳一日遊】雲屋http://bit.ly/2HUt0HG

【深圳一日遊】Bon Vivant http://bit.ly/2KSGWjV

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com