文記車仔麵
用餐日期:2018/05/27
雖然暴露左年齡,後生時食嘅車仔麵係賣緊幾蚊碗食到而家要三、四十蚊。如果話車仔麵係其中一樣能夠代表香港嘅美食,都冇人反對
以前食車仔麵,就為左平平地有多種選擇,而家幾乎每區都有唔少車仔麵店,各有特色,經過包裝加入高檔食材嘅又有,賣湯底嘅又有。
文記喺深水埗無人不識,由一間鋪開到左右隔離共三間,雖然舊鋪裝修冇咁靚,又或者好似衛生冇咁好,不過我就係鐘意自己埋位指指指,要邊樣就指邊樣。
話哂係排隊美食,等幾耐睇運氣。是日約埋住附近嘅朋友三人行食個晏,雖然係假日,不過時間尚早,十分鐘入座
餐牌選擇多,魷魚、自製餃、魚肉、蘿蔔等都係招牌,配料定價$8-12,麵底$8-9,湯底分腩汁、瑞士汁、清湯,可配辣汁、咖喱、沙嗲汁。
而本身每個位都整齊擺放好醬料、菜莆,車仔麵店都唔代表係乸渣最低消費$25/位,求其點兩三個餸埋單都唔止架喇。
玻璃辣魷魚 $38
就咁點餸就12蚊,見大家都鐘意食,就點一碟。用番本身個辣汁配魷魚,又滑又爽,不過38蚊夠食碗麵了
鳳爪、韭菜餃、酸齋、豬腸+油麵、腩汁、辣汁、蔥花 $47
叫夠四、五個餸,點會唔飽
鳳爪唔係檔檔好食,呢度可以,腍得黎又未至於鬆散。韭菜餃一夾散哂,可能浸得耐。
酸齋冇乜特別,純粹個人喜好,見有就想點。豬腸份量算多,乾淨冇臭亦都唔韌,但可以再入味啲。
雞翼、蘿蔔、魚片頭+油麵、清湯、辣汁 $39
小孩口味,依然係揀啲基本配料,雞翼控係每次車仔麵之選,幾入味,冇過火。
魚片頭正常野,但蘿蔔確實十分甜又冇渣,推薦。油麵爽口,份量多。
我就唔鐘意食咖喱、沙嗲呢啲汁,一定係點辣汁,又幾惹味有辣勁
雞翼、蘿蔔、魚肉+米粉、清湯、辣汁、蔥花 $39
朋友點嘅~同我揀嘅配料差不多。
唔係神級好食,但非車仔麵控覺得算係咁啦,起碼配料整體都唔錯,加上幾鐘意佢個辣汁同菜莆
唔怕辛苦熱住等位可試,我就…冬天先講啦
文記車仔麵
地址:深水埗福榮街121號地下
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表