再窮都要去旅行！

Tea Hub

用餐日期：2019/04/28

首次到訪tea hub係超過兩年前，當時試左主食、甜品，印象唔錯。兩年幾後嘅今日，小店喺各方面都更游刃有餘，裝潢、餐點、氣氛貫徹始終，唔單止清新，仲好有內涵。

作為文青咖啡店，餐點選擇算多，由沙律、主食、甜品到飲料都可以喺呢度食到。如果平時好似我地咁食開重口味，偶然搵一日試下啲冇咁濃味嘅食物，都唔錯啊

店內面積唔算好大，一眼望哂，最標誌性一定係近門口位嘅高枱高櫈，背住店內客人，望向街道，聽住旁邊街市檔販叫賣，感覺幾「出戲」。

店內位置唔多，分佈散落，配合高樓底設計，滿滿文青感，簡約樸實，用餐環境舒適，完全無壓力。

兩年前黎都仲未有呢幅牆，原來係來自東華三院藝術愛漫遊計劃，當中部份使用者嘅作品，非常有愛。

餐牌比起當時豐富左，除左固有嘅茶食套餐包括茶漬飯同茶湯麵、三文治、窩夫、多士、蛋糕等，仲有一個出鏡率好高嘅燒雜菜咖喱蛋包飯，設有套餐優惠。

飲品並非大行其道嘅奶蓋，而係主要供應原茶、現泡茶等。

燒雜菜咖喱蛋包飯 $80 (附前菜、飲品)

套餐附前菜、飲品，伯爵茶薯蓉滑溜有茶味。蛋包飯賣相同圖片一致，十分討喜。以滑蛋覆蓋白飯，淋上咖喱汁，再以燒雜菜伴碟，包括薯仔、蘿蔔、黃椒。

雜菜以茶葉調味炒製，實在係亮點，帶淡淡茶香，雜菜粒啱啱好熟，唔會太腍，幾好食 如果炒埋洋蔥，一定更加正。

日式咖喱汁稀身唔辣，連同嫩滑雞蛋，好好下飯，推薦；只係當日嘅白飯略嫌硬身，店員解釋可能係餐廳剛換新米未熟悉所致，期待愈做愈好嘅蛋包飯

自選茶湯冷麵、燒鯖魚、日式蛋卷 $80 (附飲品)

沙律

湯底清香，完全不油膩，麵條有彈性。

燒鯖魚伴自家製洛神花醬清淡，魚肉紮實，腩位骨較多。茉莉綠茶日式蛋卷並唔係煎燶左，不過未有突出表現。

薄荷朱古力博士茶

唔洗加錢可以轉飲$37以下嘅飲料，揀左不含咖啡因嘅博士茶，茶具精緻，附上小漏斗，方便掌握沖泡時間，呢壼就等候一分鐘飲得。

薄荷柚子茉莉綠茶

蝶豆花芝士醬雲蛋多士 $58

外貌協會俾呢件咁可愛嘅多士吸引，以沙律菜、車厘茄伴碟，多士均勻搽上加左蝶豆花嘅芝士醬，鋪上一舊蛋白雲、雞蛋黃。原本驚蛋白雲會好快下塌，所以我急急腳影相，啊，又唔會喎。

雲朵好重蛋白味，有少少鹹鹹地，撈勻蛋液後會令多士較濕潤，但邊位仲好脆，而咀嚼下會有麵包香；反而芝士醬成為配角。呢份多士除左有賣相，都有內涵呢

伯爵茶戚風蛋糕 $55

焙茶芝士蛋糕 $36

甜點係小店招牌，擺盤好靚，以餅脆、玫瑰花瓣、焙茶忌廉伴碟。

戚風蛋糕忌廉量比起第一次食更多，細滑不膩口，伯爵茶味突出蛋糕體有彈性、唔會太粗糙，而且唔會話好細件。

但焙茶芝士蛋糕更得我心，焙茶味濃郁，質感實的的，餅底薄脆，沾少少焙茶忌廉，更有層次

對tea hub嘅印象如初，小清新、有特色，環境舒服，搵日下午茶冇咩做一定要黎坐下、食件甜點呢。

TEA HUB

地址：深水埗順寧道439號順寧居地下2號舖‬ (星期一休息)

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com