再窮都要去旅行！

GATE • 傑特曼紳士茶飲

用餐日期：2018/10/19

這趟旅程選擇了一中益民商圈的酒店，寄存行李後由於有點餓，就在附近吃點的東西，選了酒店附近的一家網紅店試試看。

傑特曼茶飲店的門面，比起食物照片更常出現在網路上，皆因門面確實很美。帶點哈利波特式英倫風，即使不在裡面用餐，經過在門口拍照，效果都很好

餐廳共兩層，萬聖節前後，所以添加了不少佈置，店內打卡位置不算很多。

見過有些博客分享說可以借斗篷、魔仗拍照，更有感覺；不過當天我們就沒有問及是否屬實。

餐牌供應輕食例如吐司，分鹹、甜；另有少量甜點、飲料，最低消費一個項目，餐點價位NT100左右。

鞦韆奶酪 NT100 (點飲料折NT10)

卡滋磚 NT100 (點飲料折NT10)

不瞞你說，肯定是為造型而點的，滑溜的奶酪上加一件布丁，珍珠尚算煙韌，不會太甜。

至於吐司，即點即製，需時等候。麵包上加了薯片、大量芝士、香草，味道比想像中好。畢竟光看賣相，還以為是什麼暗黑料理呢

重乳黑糖珍珠 NT120

蜜桃烏龍 NT90/半糖/正常冰

點了兩杯飲料，整體表現普普，黑糖珍珠奶很大杯，但偏甜一點，喝到後面膩了。

蜜桃烏龍半糖後，就基本上是一杯烏龍茶了，沒有桃味

總體來說，作為網紅店，傑特曼茶飲店的價位不高，餐點出品中規中矩，無驚無喜。

如果在附近，想歇一歇、打打卡，還是可以一試。不然，就在門口拍拍照，其實也不錯

GATE 傑特曼茶飲

地址：台中市北區錦林新街30-2號 (一中益民商圈)

營業時間：10:15am-8pm

低消：每人最低消費為任何一個項目，用餐時限2小時

粉專：https://www.facebook.com/gatedrink/

IG：@gate__drink

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

去年12月首次到訪台中，當時係用飛行里數兌換機票，行程包括台北、台中，事後我同另一半都愛上台中呢個地方

剛巧遇上廉航機票優惠，於是相隔10個月，決定再訪，今次一共逗留7天。

由於上次出入都係台北機場，所以今次都係我地第一次降落台中，機場規模比想像中細好多好多，商鋪唔多，都係銀行、電訊商，冇乜選擇，一眼望哂。

兌錢後，我地先購買交通卡、電話卡。（作為參考，一卡通 NT100/張，需額外充值；電話卡係中華電信 NT500/7日/無限數據，全程接收良好）

住過台中公園後，我地都覺得唔算太方便，純粹係比較近火車站，離其他區有一定距離，晚上冇公車後，想要外出行街或者食野，都要的士來回，唔夠划算。

所以今次揀選嘅酒店，位於一中商圈，離一中街同中友百貨比較近，變相想食宵夜都方便啲，行都行到去。

一向我地去旅遊都係以「食」為主，留喺酒店嘅時間唔多，所以喺酒店安排上，唔想花費太多，今次入住6晚，只係$2120，都相當划算了。

當時以agoda價錢最優惠 http://bit.ly/2zhcxaa；酒店官網：http://boxdesignhotels.com/

博客創意旅店

地址：台灣台中市北區錦新街40號

入住日期：2018/10/19-10/25

酒店位於一中西門町，地理位置不錯，我地由台中機場坐9號公車，於【中友百貨】落車。大約需時55分鐘，中途無需換乘。

喺台中公車只需要用一卡通/悠遊卡，上/下車拍卡，首10公里免費，所以車費非常便宜。

公車：NT16/位；時間：55分鐘；車站：中友百貨

酒店門面幾亮眼，透明落地玻璃加上橙、黃色設計，好容易就見到。

大堂：

大堂空間感足，出入嘅住客都比較年輕，有幾張梳化可以休息，提供咖啡機。

酒店要喺下午3點後先可以check in (退房時間為早上11點)。預訂時已付全數，無需另付按金。

早到嘅客人可以先辦手續，然後寄存行李，職員會安排好房間。

客房：

我地入住7樓嘅客房，一張大床、城景。房間四四正正，一眼望哂。

房間有所謂太空主題，兩邊牆紙都有圖案，裝潢算係青年旅舍格局。地毯算乾淨，並無蚊蟲。

酒店整體光線唔算好充足，不過都未知於黑漆漆，可能我個人比較喜歡大白燈。

電視、空調：空調可自由控制，反應夠快

雙人床：唔會太窄，起碼我地身型大件，都唔會好逼，床褥偏硬身少少。

枕頭按一貫習慣，需要兩個叠加使用，第一晚要求，職員表示用哂，並稱要NT50先可提供。第二日再問，最終都係提供左多一個枕頭俾我地，感激。

呢間房嘅洗手間同浴室有一道牆相隔，呢個設計我地冇問題，上廁所嘅人可以同沖涼嘅人分開進行

不過我睇過網上圖片，某啲房間只係用玻璃門分隔。

浴室：

我對浴室嘅要求只有一個，水壓同熱水要充足，完成一日行程，無非想舒舒服服沖個涼舒壓緩。

浴室夠闊落，水壓正常，如果可以再大啲更好，熱水都充足，無需等候，而且一直供應，唔會斷斷續續

水流得切，唔會有積水。浴室內只係有個毛巾架，最好就裝番啲掛鈎啦

牙刷、牙膏有供應，未見浴帽。沖涼液、洗頭水二合一枝 (無乜所謂，反正我帶自己的)

毛巾：毛巾都唔會太殘舊，不過我地都係自備。

風筒：掛牆式風筒，放喺洗手間裡面，唔可以隨便走動，對於長頭髮嘅女生可能會有啲不便。幸好風力夠強，唔需要企喺度太耐。

酒店wifi：有供應無線網絡，無需密碼，不過由於電話卡係無限上網，所以我地全程無用過wifi，未知速度如何。

房卡：入住時只提供一張房卡，拔卡就無電供應，可以另外向職員拎多一張，方便跟同行朋友分開活動。

我地對酒店要求唔高，入住6天，感覺都算係咁，價格相宜，350蚊左右一晚，我都收貨嘅。

又近一中商圈，夜晚肚餓喺樓下都有小食。附近有全家，亦都有7仔，夠哂方便。

房間隔音唔算一級好，感覺牆身好近隔離房門，所以間中都會聽到聲音。咁呢樣視乎運氣啦，我地都係中途有一晚瞓得唔係咁好，其餘時間都係睡眠充足。

其實房間都有幾個掛鈎位置，不過有需要就記得帶衣架啦。

呢間酒店有背包客床位，所以2樓會有公共空間，有雪櫃、微波爐、浴室之類。

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com