再窮都要去旅行！

幅幅都係童年回憶，除左呢啲街知巷聞嘅漫畫，仲加入較新嘅例如進擊的巨人、你的名字等

吸引唔少動漫迷到訪，所謂高手在民間，原來呢啲彩繪係旁邊機車店嘅老闆畫上。老闆唔係漫畫家，不過係動漫迷，並無接受贊助，都係佢自費喺放假、晚上時候畫嘅

因為附近係住宅，圖片唔會再廷伸，但若果顏色脫落就會再更新作品，所以唔同時間黎都係有機會見到不同嘅彩繪。

個人認為到此一遊已經很足夠，村子唔大，齋行的話10分鐘左右就行完。

動漫彩繪巷

地址：台中市西區林森路102號

檢視較大的地圖

蒔初甜點 original tarts

用餐日期：2017/12/20

蒔初甜點就位於動漫巷入面，一直都係我口袋名單，想食佢地嘅撻一段時間了。甜點既有賣相，亦有內涵，店內自設餅房，每日手工現做，限量供應，標榜低糖、健康

小店位置很好，基本上黎到動漫巷都一定會見到，就喺mario彩繪對面，招牌亮眼。

原本係佢地係主要外帶甜品，後來開左二店喺旁邊，裡面有幾個位置可以堂食，亦有室外座位。

平日唔會好多人，可以輕鬆hea一陣。室內裝潢走文青風，以乾燥花佈置，白色、木色為主調，簡約舒適

餐牌供應甜點，以撻為主，平時喺社交網站都會更新每日款式，方便客人預留。

當日有草莓、藍莓、抹茶、百香果、朱古力、栗子撻等，另外仲有泡芙、芝士蛋糕等，甜點定價NT120-170。

飲品有拿鐵、咖啡，定價NT90-120，甜點加配可減NT30，點單後，由店員送餐。

我地點左兩款撻、分別係「草莓一號塔」、「京都宇治抹茶塔」及一枝冷泡茶

草莓一號塔 NT170

京都宇治抹茶塔 NT140

草莓撻同抹茶撻賣相都好靚，用上小木盤及印花墊紙擺盤。堂食仲附上蛋白餅，幾可愛

草莓撻面頭有新鮮草莓，味道清甜，完全唔酸，草莓下層有唧花奶油，質地滑溜，香而不甜膩。

撻內餡都加入草莓粒，製作都幾有誠意，混入原味生乳酪，整個撻質素不錯。撻皮即日新鮮製作，低糖配方，口感香脆硬淨，曲奇味道唔重

抹茶撻嘅外型令我諗起喺香港幫襯過網店出品嘅焦糖海鹽抹茶撻，此撻嘅裝飾就再複雜一點，加有花生、提子乾，以NT140黎計，都物有所值

用上丸久小山園抹茶製成，茶濃帶點甘味，忌廉、卡士達醬滑溜，花生添加口感，撻皮較為硬略厚。（網店的資料可以再問我）

冷泡茶 NT50

冷泡茶用原個茶包沖泡，茶香清新甘醇，可一解甜膩。

黎到動漫巷都可以一試蒔初甜點，堂食設最低消費NT150，預每人一份甜點啦；如果喺台灣其他地區，小店有部分甜點提供宅配服務，可自行查詢。

地址：台中市西區林森路100巷10號

營業時間：12:00-19:00 (週一公休)

粉專：https://www.facebook.com/originla/

檢視較大的地圖

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog:http://http://bit.ly/ywycarol

Contact us: mrmrsfoodhk@gmail.com

地芋添糖

用餐日期：2017/12/20

已經黎到台中最後一日，因為馬上就要落去台北，除左想大量灌入台式飲品，仲要去埋口袋名單呢家甜品店，想試好耐了。

地芋添糖位於錦新街，益民商圈「步行街」，位置唔難搵，因為我地本身已經食左蛋餅、舒芙蕾鬆餅、同兩杯台茶，本住點都要一試嘅心態行過黎，幸好冇令我地失望

睇過有唔少iger分享，見到啲相七彩繽紛嘅珍珠、手工芋圓被吸引過黎，所以話網絡嘅宣傳何其重要，始終台灣嘅食店咁多，齋睇旅遊書都好難試到啲小店

店名「地芋添糖」，原來係食左字，普通話讀起來就係「地獄天堂」，哈哈。

門外都展示不少自家製嘅產品

甜品店位置不少，空間感足，以白色為主調，半開放式廚房，隱約可以見到店員喺工作室中製作產品，配料透明度高，點單可以見到實物

餐牌主要供應剉冰、甜湯等，配上好多唔同款式嘅包心圓、珍珠等配料，價錢唔貴，每人低消一份甜品，繁忙時間限用餐60分鐘。

除左固定款式甜品，亦可以自由選擇配料，兩款配料NT45，三款則NT50，可以再加錢追加手作配料例如包心粉圓、雙色芋薯圓。

包心粉圓、珍珠、芋薯圓等強調無化學成份，無添加色素、香料、糖精，珍珠嘅顏色主要來自蔬果，每日新鮮製作，所以供應款式會有所不同。

可惜我地係遊客，佢地嘅手作產品需要冷藏，否則真係好有興趣帶番黎香港自家製

剉冰自由配 NT65 (粉粿、珍珠、手作綜合包心粉圓)

首先十選二配料，我地揀左粉粿、珍珠，喺NT45嘅基礎下加配手作綜合包心粉圓NT20，共NT65。

剉冰份量相當多，足夠二人分享，店主人好好，相信見到我地係遊客，短時間難以回訪，所以就送左幾粒店家嘅招牌雙色芋薯圓俾我地試試，佢話黎到一定要試啊，再次感謝

粉粿、珍珠、包心圓嘅口味非常多，而且好特別。粉粿方面有梔子花、寶山紅糖口味，仲有季節限定款式，例如蝶豆花、桂花、火龍果等，不過當日未見。

粉粿切粒，外型似啫喱糖，但口感更柔軟味道清新，梔子花粉粿仲加入人手炒芝麻，好有誠意，但味道上就以紅糖較突出

手工包心圓有芝士、雪蓮子、粟米、堅果、大豆、花生、毛豆等口味，隨機分配，包心圓嘅外皮煙韌晶瑩，隱約可以見到裡面係咩材料，口感粒粒唔同

較為得意係芝士，鹹甜交錯感覺突出。其次係毛豆，製作工序好花功夫，比較少見

珍珠五顏六色，有紅蘿蔔、洛神花、老薑、有機薄荷、蕃茄、菠菜、黑木耳、芝麻等口味；不過唔係每日都有咁多款式，視乎當日供應。

部分由顏色、質感可以睇得出係咩味，例如芝麻、蝶豆花。有啲較為相近嘅就一路食一路估下係咩味道，幾好玩。

珍珠偏細粒，食落幾煙韌有彈性，如果再大粒啲更得我心。要數到最特別一定係老薑，薑味十足，但唔會太嗆喉

至於店主請我地食嘅芋薯圓都係呢度招牌，可以一試呢，芋圓冇添加糯米粉，芋味唔係一入口就有，經嘴嚼口慢慢散出天然芋香，除左煙韌，居然仲保留左芋頭嘅口感，好新鮮

地瓜圓亦係第一次食到嘅比例，用上兩種蕃薯製成，所以有兩種顏色，一半偏黃，一半偏橙色。賣相靚啲，地瓜味都會更突出，甜度唔高。

又八掛又見店主幾好傾，佢透露地瓜圓係用左黃金地瓜、紅地瓜製成，做法相當花功夫，經過慢火窯烤地瓜脫水將味道濃縮再各自做成兩種粉圓，再經手工結合成為雙色地瓜圓。

同好多台式剉冰一樣並非細滑類，冰底加入左少少蔗糖，甜度適中。

最主要係感受到小店製作用心，對食材講究，一人食一個都唔過份啊，有機會去台中都會回訪。

地芋添糖

北區錦新街28-3號

粉專：https://www.facebook.com/heavenlysweet2015/

檢視較大的地圖

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com