Cha Bei
用餐日期:2017/02/18
Cha Bei係澳門銀河一間以生活風格為題嘅粉色系咖啡廳,裝潢、設計充滿少女心,開幕以來都有唔少人去過打卡。
Cha Bei,即係「茶杯」,結合餐飲、美食、設計、藝術於一身,當中有唔少擺設都出自大師手筆。
咖啡廳面積甚廣,除左提供茗茶、咖啡、甜點,仲陳列一系列精緻茶具、家居產品、花卉等,客人滿足口腹、眼球之餘,心靈都得以放鬆。
Cha Bei位於澳門銀河1樓,佔地幾千呎,裝潢極具少女心,就算唔幫襯,都可以影番幾張相。
咖啡廳設有超大型甜品櫃,旁邊一塊大玻璃更加可以讓客人欣賞到甜品師製作過程。
近門外位置為「外賣區」,即使買左甜品、飲品嘅客人,都可以喺餐廳內用餐,環境都唔錯呢!
當然啦,要想坐喺裡面就要點餐單嘅食物,並會收取服務費。
門外陳列唔少甜點,作為手信,包裝都相當靚。
門口呢個相信就係打卡熱點。
餐廳空間感足,位置舒適。
Cha Bei 嘅下午茶每日兩點半後供應,分別有兩個選擇 - 縱情享受 $328、繽紛狂想曲 $528,定價為兩人份。
事前我睇過唔少食後感,都表示佢地嘅下午茶「得個樣」,唔飽肚。
但由於咖啡廳太靚,我都自行腦補過後,我都堅持要男朋友陪我去試下,我地揀左較便宜嘅一款。
優惠:想食可以預先網上申請埋銀河皇卡,有9折。
縱情享受 $328/兩位
有鹹點四款、甜點八款,加上鬆餅、瑪德蓮,飲品,配合環境、服務、食物質素,我認為定價合理。
店員首先送上歡迎茶,係熱紅棗茶,味道香濃,飲完有暖和感。餐飲方面,可選茗茶、熱朱古力或咖啡。
茗茶分綠茶、紅茶、烏龍、白茶及花草茶,選擇不少。
皇后伯爵茶
以壺上嘅伯爵茶,茶具非常精緻,飲落帶香而不濃,因為呢款伯爵茶混合清酒、花橙、佛手柑嘅成分。
可可豆所用亦係頂級朱古力品牌,熱朱古力分三種濃度:35%白朱古力、66%黑朱古力、80%黑朱古力
Caraïbe 黑朱古力 66%
朱古力味好香濃,帶少少苦澀,可按喜好加入淡奶,更加幼滑。
主角下午茶以珠寶盒形式展現,有鹹點四款、甜點八款,加上鬆餅、瑪德蓮,夠少女吧!
眼見在場各位女士都舉起手機影相,我都唔執輸,影番三五七打照片。
鹹點以三文治、麵包為主,用料都幾特別,有牛油果、松露磨菇、煙三文魚等,整體味道不錯,尤以松露磨菇酥味道最好!
雖然聽過唔少人表示Cha Bei嘅甜點一般,可能我冇乜期望去到,又覺得比想像中好呢。
甜品賣相精美,用料特別就稱唔上,都係比較大路嘅材料,就連男朋友都覺得味道唔差。
甜點配合珠寶盒嘅主題,有戒指造型嘅嘴唇朱古力、馬卡龍。
加上最後嘅烤瑪德蓮、英式乾果鬆餅,其實都飽肚。
特別一提香蕉熱情果醬、雜莓醬配合鬆餅,味道不錯。
整體黎講,我地覺得Cha Bei嘅下午茶味道不俗,可能好多評價都係開業初期,相信試業一段時間,食物已水準已經穩定落黎。
個人認為價錢合理,配合環境,加上店員服務親切、有禮,都好值得一試。
見到旁邊兩位客人點嘅係「繽紛狂想曲下午茶」,價錢貴一點點,食物更豐富呢!
詳細餐牌可查閱餐廳網站: https://www.galaxymacau.com/zh-hant/macau-restaurant/restaurant-directory/bar/cha-bei
***下午茶不設預約
Cha Bei
地址:澳門銀河1樓,1047
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: http://mrmrsfoodhk@gmail.com