再窮都要去旅行！

上個禮拜中秋節有幾日假期，同幾個朋友一早決定租個渡假屋玩下，過過節。雖然成班已經唔是年青人，但就想搞下老鬼camping囉。

其實網上而家都算有好多渡假屋嘅選擇，大部分都有齊照片同價錢。原本就想搵南丫島嘅屋，不過發現南丫島比較少一整幢嘅渡假屋（?）

我地決定好地點：大嶼山、梅窩、塘福等等呢類

因為係中秋翌日，都預左會比較貴少少，作為參考，假日大部分嘅屋都貴出兩倍有多。

我地總數有7人，起碼都要求要有3房。另外想要有燒烤爐同簡單設備，中秋嘛當然是BBQ！

搵嘅過程發現，有9成以上嘅網站都係吹大左，有d你睇相已經好明顯見到冇可能容納咁多人嘅。

當然事情就總會拖下拖下，選擇就有唔少，但揀下又愈小、揀下又少間。

到我地狠下心嘅時候，比較好、比較企理嘅屋都冇了。

最終喺呢個網站預約左一個三房一廳嘅單位。

Holimood 網站該房資料：http://bit.ly/MY10A

因為相片跟網站展示大概有9成吻合，傢具嘅位置大致上相同，但我必須說，照片睇起上黎，的確係單位裝修完成初期嘅樣子，你如果正在考慮，我會話，實際係比較冇相片咁乾淨、光猛。

睇番網站關於呢個渡假屋嘅簡介：

------1.基本資料/ 特色------
此三房一廳單位2016年新裝修, 設有八人床具。單位設備齊全，有4台空調。此房間鄰近銀鑛灣沙灘及公共泳池，附近亦有餐館食肆。而位置亦十分便利，步行至碼頭或巴士站也只是5分鐘距離。

------2. 預訂前注意事項------
房間按金：HK $ 200
入住時間：下午3時（最遲晚上7:00前辦理入住手續，如需七時後入住，請事先通知安排）
退房時間：中午12時
登記時至少2人同時前往。
請攜帶您的身份證辦理入住手續。

------3. 額外收費項目------
免費天台燒烤爐
麻將租用費：$ 100/晚
*不設加床

*MY10A / MY10B 為上下層單位, 2間一起租共可住16人, 此兩單位共用私家天台及2個免費燒烤爐

我有以下幾點根講：

1 裝修：呢間屋或許曾經新裝修過，不過如果打理不善，實際唔可以作為一個賣點。

2 人數：渡假屋表示可容納客人係10個，設8人床具，事實上係包括兩間雙人床房，同埋一間廚房改建成嘅單人床房。再加上廳嘅兩張梳化，勉強都只係訓到我地7個人。

3 有4台空調：咁又啱喎，冇寫明係4台work嘅空調，因為有一間房嘅冷氣係勁嘈+會噴灰出黎。另外一間房嘅冷氣睇得出比較新淨，但唔明點解完會搵唔到remote，長期17度。

4 床：其中一間雙人床張床真係正到無輪，訓落去同直接訓上彈簧係冇分別。plus，廳嘅其中一張梳化係4尺半嘅，希望你同行都好似我地咁有個細粒d嘅朋友訓到。

5 天台燒烤爐：設有2個，簡直係crazy，只有一個係正常嘅燒烤爐，另一個係fix左係天台中心。既然要同2樓共用天台，係有冇可能喺咁細嘅地方，容納到所謂16個人！？

6 位置：我簡單講，都算便利，但絕對不是步行至碼頭只是5分鐘距離！我估如果跑步嘅話，你有機會5分鐘到嘅！行嘅話起碼10分鐘。

呢個係世紀級好笑！

因為都有擔心過天氣問題，事前我地問過兩個問題：第一天台有冇帳篷，第二提供嘅電熱鍋work唔work。

網站回覆天台係冇帳篷，電熱鍋係work的。

於是乎我地都方心d，因為怕落雨燒烤有難度，都可以轉plan B打邊爐。

屋裡面的確有一個圖中咁嘅樣嘅電熱鍋。但係！我地真係屌左出聲。

因電爐過熱會自動斷電

請停用10分鐘後再開啓使用

乜Q野？！咁樣嘅野夠膽死擺出黎俾人用？

我地試圖想溿煲野食，佢果然係會自動斷電，一個水都煲唔熱嘅電熱鍋點解會係work？

如果有d人一心入黎打邊爐，買哂野食咁樣，咁我想問下可以點煮到野呢？每10分鐘斷電一次再等15分鐘先開得番？

好老實講，租得呢d渡假屋，都唔會有咩期望，我地都好清楚，絕對唔會以為自己住緊酒店。

講左咁耐，我必須講番，我地房費係$2300。呢3房1廳平日預約係$980。

我地事後俾左以上意見呢個網站，屋主居然打電話俾我朋友，問下可否修改下d評語。

？！

咩呀？真係聞所未聞。

屋主話，佢仲有兩張床不過係收埋左，所以佢間屋係訓到10個人的。

我就當你有多兩張床，問題係你間屋放唔到多兩張床呢屌，仲撐飯蓋。佢話我地預約只係表示7人入住，所以佢就收埋左兩張床。

你寫到明住到10個人，我想問下如果真係final出席有10人，咁點呢？訓天台？

點解人有人寫d真實意見出黎，屋主唔檢討下，仲想點點反駁呢？

我想問下你駁得幾多點？佢話番我地轉頭，覺得我地有問題應該打左俾佢問左先。大佬我咪要打俾你幾廿次？我打俾你係咪會有個新嘅電熱鍋？會有張好d嘅床褥？

仲話叫我地改評語，下次入住有8折。

都未訓醒，仲有下次入住？

大佬2千3呀，唔係2百3。

以上係評論緊間渡假屋。

唔同意呢d係基本要求嘅請close window。

之後會分享番我地兩日一夜嘅少少照片，同埋第二日我地去大澳食左d乜，點樣過左個假期。

Follow us:
 

Instagram: http://bit.ly/2g3ZtuS

Blog: http://bit.ly/ywycarol

Facebook: http://bit.ly/2gu1fIG

Contact us: mrmrsfoodhk@gmail.com

早前收到 the kitchenette 她們家的醬料，發現佢地嘅 concept幾有趣，所以想分享一下。

呢家係以 food in Jar 為主題嘅網店，意思係用玻璃瓶去呈現食物，除左可以品嚐新鮮嘅味道，由於玻璃瓶係可回收，就算係享用完食物，都可以再使用玻璃瓶。而且店家為左方便送禮，每個小瓶都附小吊牌，可以寫上字句送俾朋友。佢地嘅產品都幾多類型，除左主打嘅醬料，例如：意粉醬，仲會有抹醬同少量甜品。

今次收到嘅醬料有3款，最左邊係卡邦尼醬，中間係海鹽焦糖醬，右邊係青醬（羅勒香蒜醬）。

由於佢地家嘅醬料係handmade同冇添加防腐劑，當然唔似一般超市嘅醬料，可以存放多時。而且每款醬料嘅保質期都唔一樣，購買時記得查詢店家。

3款醬我已經試過當中兩款，所以想想先作分享。

第一款係卡邦尼醬（含奶類）：用洋蔥、煙肉、忌廉同牛奶煮成

售價係$50/200g，$98/450g

保質期大約係一至兩星期

以呢個醬自製一味意粉實在唔難，就連我完全唔入廚嘅人黎講都唔會有難度。當然呢個賣相咁好，係男朋友代勞。

如果以3/4人份黎講450g大概可以用上兩次，當然要視乎個人口味濃淡啦。

買手作醬原來都幾方便，啱哂對煮食冇乜概念嘅人，什至懶人叮叮個飯都撈得。

我地今只係準備左意粉、火腿、磨菇同少量香草，材料簡單得黎又唔貴。

意粉我地比較鐘意爽身，所以冇特別煮太耐，加少少油落埋火腿炒炒、之後再加入磨菇。呢個時候醬料就要出動喇，加入適當份量攪拌，基本上就已經完成。

不過男朋友將意粉上碟後，有再用多一匙意粉醬煮熱，再淋上面、味道更香濃。最後唔少得扮哂野香草，完成！

自製醬料因為用玻璃瓶裝住嘅關係，唔需要好似罐頭咁要一次過用哂或者留起又驚變壞，加上同一款醬料都有唔同嘅用途，變相食幾次都唔怕悶。

第二款用嘅係焦糖醬（含奶類）：用新鮮忌廉、牛油、糖煮成

售價係$38/100g，$72/200g

保質期大約係兩至三星期

焦糖醬我自己幾期待，因為我想我係完全唔知有乜用途。哈！店主話呢款抹醬除左可以用黎搽面包，亦都可以沖野飲同配雪糕食。

今日就正正試左黎搽面包，花生醬就用得多，原來用焦糖醬都幾有新鮮感！對於極度喜歡甜食嘅我，呢個醬真係好香好甜。

琴晚仲試過用呢隻焦糖醬黎配雪糕，雪糕當然係最普通嘅雲呢拿味，因為想試下突出個焦糖醬嘛。

假如喜歡做甜嘅朋友，做一塊窩夫，配一球雪糕，落少少焦糖醬，正呀！

最後一款係青醬（含堅果類）：用羅勒葉、蒜頭、松子、橄欖油煮成。

售價係$50/200g，$98/450g

保質期大約係兩至三星期

食落會有清新嘅羅勒香味，加上炒香左嘅松子，我地只係簡單加在759嘅平價帶子粒，就已經完成左呢碟意粉，真係方便至極。

雖然男朋友識煮野食，不過我地一般係出街食，所以今次託店主嘅福，又可以試下佢手勢了。如果有興趣的話，再跟你地分享。

Instagram：thekittchenette_

Facebook：http://www.facebook.com/thekitchenettehk

店主都會在ig和fb分享食譜，而且會參與市集，有興趣不妨睇睇。

Follow us:
 

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com