再窮都要去旅行！

柞木炭家

用餐日期：2019/04/21

一連四日復活節假期，當然係同朋友飲飲食食嘅最佳時機，揀左呢間之前食過一次嘅柞木炭家再訪，一來覺得好食過一般平價韓燒，二來價錢都可以接受

銅鑼灣分店位於金百利，餐廳面積頗大，座位間非常闊落，被安排到卡位，又唔洗同隔離枱貼枱、背貼背。店內燈光稍暗，可能係假期啦，客人頗多，店內嘅通風有待加強。

餐牌有單點，亦有套餐，根據上次經驗，套餐比較划算，亦都免得我地諗到頭爆。全新套餐有兩款，分別係「王道」、「御膳」，定價每位$356/420。

套餐包括五道菜，可以試到唔同牛肉部位，點餐前店員會推出展示牛肉嘅餐車，其中西冷仲可以由客人自選產地(韓牛/和牛)。

前菜、粟米、生菜無限添加，泡菜可以自行剪出，味道剛好

沙律

御膳套餐 $420/位/2位起

套餐包括：牛舌、黑毛豬、汁燒牛小排、是日稀少部位、和牛牛胸腹、和牛牛胸、和牛西冷、牛肩、鰻魚、八爪魚、柞木韓牛飯、大醬湯

首先上枱係牛舌同黑毛豬，牛舌有齊厚切、薄切兩種口感，厚切特別爽口黑毛豬腩肉難得冇被比下去，肉香軟腍。

呢四款當中，我地比較喜歡和牛，不論係牛胸定牛胸腹都同樣咁正。尤其係和牛胸腹，好搶火，脂肪較多，食落柔軟溶化，唔洗特別醃製調味，油香馥郁。

汁燒牛小排都唔差，韓牛嚼勁較強。反而呢塊稀少部位好難燒啊，可能因為瘦，油份唔多，燒到好散。

第三道菜實在回味無窮，要二選一的話，我都係投油脂豐富嘅日本和牛一票。

薄薄一片，為免浪費，我地請店員幫我地燒起，輕輕沾少少鹽份，入口溶化

最後燒埋鰻魚同八爪魚，因為店員比較忙，由另一半操刀，有上次嘅經驗，佢都燒得唔錯。

鰻魚肉厚無骨，外皮燒到香口(雖然燶左少唐，哈哈)。八爪魚入口好爽，不過我地燒到有少少過火，噍頭太強勁。

燒左成晚肉，再食埋柞木韓牛飯飯同大醬湯，更加飽足。

柞木韓牛飯牛肉加蛋黃、大半碗京蔥拌飯，簡單美味；大醬湯不過不失。

我地對柞木炭家嘅印象依舊唔錯，牛肉整體質素比一般燒烤店好，但又未到負擔唔到嘅消費，值得再訪。

柞木炭家

地址：銅鑼灣記利佐治街1號金百利廣場3樓301室

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com