鵝大哥鵝煲專家
用餐日期：2017/04/28
近幾年有鋪雞煲熱潮，好多餐廳、酒樓都相應推出雞煲，當然唔少得一系列雞煲專門店，但坊間就比較少有鵝煲食。
鵝大哥鵝煲專家位處旺角新城嘅樓上鋪，顧明思義主打鵝煲，加上多種新鮮特式配料，最多人推介嘅係鵝內臟、炸魚皮、手打蝦滑等，價錢較大眾化，所以一直好受歡迎。
而事實上，為左照顧埋唔喜歡食鵝嘅客人，鵝大哥仲供應多種湯底，例如有花膠龍躉湯底、雞煲、胡椒豬肚雞窩等十幾款。
唔講唔知，仲有多款小炒、小食，如果唔想食火鍋，亦都可以選擇點菜食飯，係非常多元嘅火鍋店，可見老闆都好有心，盡量提供多種選擇俾客人。
而且佢地營業至凌晨三點，都係宵夜好去處。
鵝大哥面積唔算好大，裝潢比較簡單，一般火鍋店格局，但座位間唔會好逼狹。
醬料每位收$10，但免加一。
秘製肥鵝煲 $148/份
首先將鵝斬件，加上鵝大哥自製醬汁炆過，，配以大量唐芹，一上枱已經聞到好惹味
同食雞煲一樣，都係先食鵝，再加水繼續火鍋。
因為我地人少，點左一份，鵝肉份量就唔係好多。
醬汁鹹淡適中，食落冇坊間嘅雞煲咁重口味，唔會太辣或者太鹹，至於鵝肉炆得相當入味，雖然稱唔上嫩滑，但都唔會好韌或者乾柴。
鮮鵝腸 $68
好多時喺其他火鍋店食鵝腸，遇著唔係太新鮮嘅話，一係就一陣味，一係就唔夠爽唔夠肥。
鵝大哥嘅鵝腸完全冇以上問題，基本上好新鮮，帶少少肥脂，食落爽口微脆，配合鵝煲嘅醬汁，惹味，果然係招牌！
鎮店炸魚皮 $48
先黎一份新鮮厚塊炸魚皮，大約有四至五大塊，上枱都哇聲四起
問過店員，佢地以大門膳嘅魚皮即叫即炸，幾乎每枱都有點，同其他火鍋店嘅炸魚皮有少少唔同。
第一佢非常大塊，第二較為薄身，食落好脆唔油膩，似食薯片嘅感覺！咁香口嘅小食，配啤酒一流。
原隻大蝦水餃皇、手打流沙蝦丸 $96/雙拼
水餃皇真材實料，一隻裡面大概有三至四隻大蝦，食落非常爽口，滿足。
至於蝦丸有流沙效果，蛋黃味道唔算好強烈，蝦丸都幾彈牙，但未至於話好有驚喜。另外有啲手打丸類定價 $42-$66，可以接受。
深海北寄蚌 $80/隻 (火鍋用)
北寄蚌新鮮，灼一灼食得，鮮甜爽口！呢個價錢都幾抵食！
因為人少少，就唔係點左好多火鍋配料，而且見佢仲有小菜、小食，我地留左肚點左個小炒皇試下。
小炒皇 $88
鵝大哥嘅小炒皇都幾出色，以魚乾、蝦乾、韭菜花炒成，魚乾相對其他酒樓菜館大條，連同蝦乾炸到好脆口，調味恰當，唔會太鹹，會愈食愈想食，當然啦呢個點都會熱氣少少。
杞子洛神花茶 $33/每渣
飲品方面都有一般啤酒汽水，另外有幾款自家製竹蔗茅根水、洛神花茶、紫貝天葵等，味道夠天然，唔會太甜，食完火鍋，小炒，飲下涼茶點都好過飲汽水嘅。
總括黎講，鵝大哥嘅鵝煲幾有特色，配料選擇多，我地點嘅幾款食物味道不俗，價錢唔貴，特別係宵夜時段仲有更多優惠，適合一班朋友聚會，既可以打邊爐，亦可以有小炒食。
特別推介佢地嘅鵝腸、炸魚皮，好出色呢！朋友都冇介紹錯，可以一試
餐牌：另有4人火鍋餐 $668。
鵝大哥鵝煲專家
地址：旺角彌敦道584-596號旺角新城17樓
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
同美味餃唔同，美味餃坐得逼啲，而且油煙味相當勁。
龍蝦玉子燒 $88
吃貨夫婦 (50)
