Sister Korea Cafe(餐廳邀請)
用餐日期:2016/10/30
見到網上呢度好評都算多,今日終於一試,雖然身為新界人,但平日幾乎唔去大圍,所以真係唔知大圍屋村入面有間質素唔錯嘅韓食!
一入門口就見到宋仲基…個紙牌,仲播緊《太陽的後裔》OST,正,完全係我杯茶。 話哂黎緊12月第一次去韓國,呢排都食左幾餐韓國野,打定個韓食底,順便睇下自己有咩啱食。
一坐低,睇睇個menu先,佢地個餐牌幾得意,圖文並茂!
點完菜之後,店員就送上湯同小菜,呢度嘅泡菜居然啱我口味!
(我本身真係唔多食,但最近成日睇《三時三餐》見到車嬸嘅手勢,就想試泡菜了)
之後陸續上菜。
漢拿山豚肉炒飯 $128
店員喺你面前炒的飯!店員雖然係韓國人,但都識英文同簡單嘅廣東話,溝通冇問題,所以我地都乘機同佢吹下水。原來佢係黎 working holiday,話一年之後都會繼續睇下有邊度可以去打工。
店員首先將飯炒熱,再逐樣加入配料,超快速完成一個炒飯,我地都好多謝佢整左粒星出黎。
炒飯新鮮熱辣!男朋友仲話呢間嘅炒飯好食過炑八,佢話芝士少d冇咁滯呀!
火焰芝士拉豬仔骨 $178
超邪惡之選!勁大pat芝士!
同樣地,店員都係會幫你處理埋。(否則你叫我自己搞真係太有難度)
豬仔骨肉腍,芝士味好濃,omg之食完唔知又肥幾磅不過都唔會理,因為食左先講!
店員煮溶左d芝士,就會圈喺豬仔骨上面,淡淡都有芝士!你話邪唔邪惡!
韓式大蔥蜜糖炸雞 $42/5件
呢度嘅炸雞比較平!不過個人認為味道就屬so-so,雖然蜜糖味都濃,甜甜地,不過塊皮就腍左d,感覺唔多炸。
不過勝在價錢相宜,除左蜜糖味,仲有原味同火辣醬爆燒汁味。如果人多,叫多幾款都唔洗驚太貴。
飛機醬缸醃蟹 $188(贈送麻油紫菜伴飯)
老實講,喺香港食醬油蟹都真係50-50,始終係生野,再加上之前聽過好多新聞話有蟲乜乜乜…我就唔敢食,所以男朋友獨吞。
有點驚訝係,呢度連醬油蟹伴飯都有人為你操刀!店員會幫你拆左部分蟹肉撈好個飯,真貼心!
不過男朋友就話覺得呢個麻麻,所以話,生蟹真係好個人口味!唔知佢去到韓國仲會唔會想再食。
飲品方面,呢度都有好多選擇。除左菠蘿冰貴d,其他價錢都係好合理。
韓國菠蘿冰 $58
呢個見到大部分人都有點的!都想試好耐兼有d期望!果然冇失望!
半個菠蘿入面滿滿的菠蘿冰,味道超好!好fresh!食完d比較重味道嘅野,一飲舒服哂,都幾建議點呢個試下喔!
如果再凍d更好。
忌廉插柚子沙冰 $38
另一杯我地揀左柚子,呢個都好fresh,柚子味唔假,配埋忌廉,想難飲都難。
而且比其他韓國過江龍餐廳嘅飲品平一截,讚!
整體黎講,呢餐都幾滿意。不過兩個人食咁多野埋單就會有少少金!所以食韓國野真係要約埋幾個朋友食先抵,又唔洗好似我地咁,乜都想試,捧住個肚仔走呀!
推介:漢拿山炒飯、芝士豬仔骨、菠蘿冰!
同埋當日星期日下午,客人都幾多,居然都維持到咁嘅服務,呢個位係我地都好欣賞。希望下次帶朋友黎嘅時候都一樣keep到!
仲要免加一!
如果你住大圍沙田呢一帶,都值得過黎一試。不過如果話住得遠嘅,就自行考慮。
同埋臨走見到佢地平日一至五有平價午餐!
Sister Korea Cafe https://www.facebook.com/Cafesister/
地址:大圍翠田街2號新翠商場地下17,18 &18A號舖
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表