明洞街頭一到黃昏前,好多小食檔都陸續開檔,一條街如果要食哂,恐怕要分幾日,而且明洞嘅小食一啲都唔平,我認為當中只有少部分值得試!以下介紹幾款明洞小食:
魚糕2000won(痴狂愛上)
喺明洞開始左我第一串魚糕,之後愛不釋手!
食左魚糕,飲啖湯,驚覺原來魚糕咁好食!可能平時香港食嗰啲太垃圾
不過呢間嘅炒年糕太辣,同埋好鬼大舊,粗身,比較推介魚糕!
地址:明洞Savoy Hotel直行右轉
烤扇貝 8000won
即場烤熱再溶芝士~
扇貝都比想像中大粒,雖然燒成咁都冇乜鮮味可言,不過扇貝肉都唔老~另外芝士味濃郁,熱辣辣食係爽 計一計,不過大佬成50蚊隻
魚糕2000won
食完晚飯明明都夠哂飽,都係忍唔住整串魚糕,所以又去番明洞,夜晚開左好多街邊檔
我覺得咁多條 呢條最好食,辣度剛剛好,而且魚糕唔會因爲太耐冇人買而浸脹哂
士多啤梨鮮果汁 4000won
佢地仲有其他生果,不過唯獨士多啤梨要加一千圜,可惜士多啤梨唔濃,睇住佢加水加糖水,但都冇乜味,唔甜唔酸。
香蕉朱古力crepe 4000won
用嘅係nutella朱古力醬,冇得輸啦(?)
除左面頭有醬,裡面都有揸到。包好香蕉,再加入粟米片。
份量都多,而且會有口感,塊皮多少有啲厚,始終要裝住咁多料,不過30蚊唔洗,都算食得過~仲好想買個醬。
士多啤梨 12000won
明洞大街是但一檔有賣一萬圜亦都有賣萬二圜,我地買左後者聲稱有機 後來諗番相信冇分別…
問心有啲失望,即時食唔係好甜,食唔哂雪左一晚,男朋友就話甜啲。但心理同實際上都覺得朋友啲手信好鬼甜
士多啤梨大福 2500won/個
唔知係咪同一檔,所以都覺得士多啤梨唔夠甜…糯米皮厚到痴線,同大阪食到嘅大福完全唔同
裡面雖然仲加左紅荳蓉…但冇提升味道…
烤龍蝦 15000won
第一日行過本來都想食,不過覺得太貴,唔捨得但同行朋友食過話好正,搞到我又心思思想食~
龍蝦輕輕搽左茄汁水(?),再用火槍加熱,落埋牛油、芝士、香草
最後用烤爐加熱,芝士會慢慢溶開。
龍蝦肉預先拆好的,尚算彈牙,但芝士味唔出 ,以成舊水港幣黎講,性價比一般,貪得意試下。
雞蛋蛋糕 2000won
朋友話幾好食,不過個人覺得一般般,而且價錢唔平。
蛋糕都算鬆軟,裡面包左雞蛋,但估唔到係成隻蛋食左一半冇心機,隊左俾男朋友…
燒八爪魚 4000won
呢款幾好食雖然貴…
八爪魚蒸住 ,落單後先拎去燒。
最後搽上醬汁同木魚,有啲大阪燒feel~魷魚雖然又蒸又燒,不過唔會覺得韌,不錯吃!
明洞都幾多野食可以掃 雖然小食整體性價比唔高
Day4晚餐去左大排檔 由於食飯時間較早,晚上番到明洞,當然又餓鬼上身,外賣番酒店食。
腸仔 (唔知佢本身會否有好聽啲嘅名) 4000won
30蚊得嗰4粒腸仔我食米唔知米貴我,本身就係腸仔控,所以唔會覺得難食。
魚蛋蟹柳(唔知佢本身會否有好聽啲嘅名) 3000won
魚蛋腸仔(唔知佢本身會否有好聽啲嘅名) 3000won
呢兩舊野外面就類似獅子狗咁嘅口感,但基本上食落冇味,成舊野就真係食粉一般試都覺得浪費quota
Follow us:
Instagram: http://bit.ly/2g3ZtuS
Facebook:http://: http://bit.ly/2gu1fIG
Blog: http://bit.ly/ywycarol
Contact us::mrmrsfoodhk@gmail.com
文章標籤
全站熱搜
留言列表