再窮都要去旅行！

小法國、南怡島、晨靜木公園 一日遊

原定其中一天打算到小法國和南怡島這兩個景點，事前上網做左啲功課，瀏覽網站，睇youtube嘅短片，發現去呢兩個地方路線交通都有些少複雜，作為新手去韓國，要轉車加上轉船嘅路途，感覺都會幾攰，再加上自己坐車的話，會花左比較多時間喺坐車上，真正喺景點嘅時間會有多少趕，另外都有曾經諗過租車，因為我地一行五人，其實租車除開都唔會太貴，不過有個問題，因為租車比較自由，冇人去限時限刻，好容易會玩太耐，唔知時間，諗黎諗去，決定參加one day tour。

One day tour的話，網上都有唔少選擇，同行有朋友5月份去相同嘅地方甚至乎係即場喺韓國報名的，當然價錢會比較貴~作為一個小師奶，我都想去旅行划算啲。心目中有兩個選擇，一個價錢貴少少，包午飯；一個價錢平啲，自費午餐。最後我地揀左後者，唔想俾人規定食啲乜，想自己到時再揀下。

KKday嘅呢個tour最適合我地，去嘅地方有3個：小法國、南怡島、晨靜木公園

作為參考，當時每位$567（報名可以網上睇睇有冇啲優惠碼，搵到的話就再平啲）

費用包括車費、3個景點嘅入場費，同埋一個識少少英文嘅隨團韓國oppa，午餐自理。

原定行程係咁的：（購買時就要選定邊個地方上車）

10:20 弘大出口

11:00 明洞出口（我地住明洞，當然選呢個站上車，但眼見旅遊車黎嘅時候，並冇人喺車上，旅遊車亦都冇駛去東大門接客。相信係因為報團人數都多差唔多滿一架大巴，所以直接開一架車由明洞出發吧…）

11:10 東大門出口

12:30 南怡島

16:00 離開南怡島

16:20 小法國

17:50 離開小法國

18:30 晨靜木公園

20:00 離開

21:10 東大門

21:20 明洞

21:50 弘大

行程到最後有少許唔同，除左直車出發，冇經弘大、東大門之外，第一景點轉為小法國，接著先去南怡島同晨靜木公園。（個人認為咁樣編排反而更好。）以下係最終行程、時間，作為參考：

11:00 明洞

11:30 小法國

12:45 離開小法國

1:30 南怡島 > 坐船（約10分鐘）

5:05 離開南怡島 

5:50 -6:00 晨靜木公園

7:30 離開晨靜木公園

8;45 明洞

時間大約係咁，因為團隊人數多，所以有時約定開車時間未齊人，有機會有十幾分鐘差異。

選擇KKday呢個團都有另一個原因，因為發覺逗留南怡島嘅時間比較長，深明島上比較大，而且要喺裡面食餐午飯，所以逗留時間長啲，會舒服啲；而小法國面積比較細，所以唔需要太長時間參觀。

整體黎講，呢個團適合以下幾種人：

1. 怕煩嘅人，唔想自己編排時間

2. 覺得轉車好辛苦嘅人，自己坐車我諗要早好多出發，搭旅遊巴的確係節省左啲時間

3. 未去過以上景點嘅人，因為同行有朋友已經去過小法國，所以再去會覺得冇乜野影

4. 晨靜木公國每年冬季會有燈飾，所以旅行團都會就番時間推遲行程（夏季嘅時間就唔係咁晏11點先出發架喇）如果想冬天去影相，呢個團時間係預啱的。

小法國：

不如朋友所言，小法國面積唔大，自由行的話大約預留一小時已經好足夠，如果去過嘅朋友直頭唔需要再去。

當日係平日，遊客數量唔算多，所以我地都行得好舒服，邊行邊影就唔係好覺時間過。所以對我初次黎嘅人黎講，細心啲搵靚景的話，都係會影到啲靚相的。

當然，如果有睇《來自星星的你》，黎到都會對場景有印象，不過係點都影唔到人地咁靚架喇，因為人地係金秀賢同全智賢嘛

入口

裡面有展示小王子嘅部分手繪，不過真係欣賞嘅人唔多，大部分人都係好似我咁港女上身，不停影相。

現場冇韓劇睇起上黎咁靚係真的，加上現場睇，似乎有啲地方仲未建築完成（？）

有啲位置會見到泥、石堆。

當日天氣都幾好，所以小法國嘅照片都配上藍天。

如果要自行前往小法國，參考呢個網站係咁講的：http://big5chinese.visitkorea.or.kr/cht/SI/SI_CH_2_1_2_1.jsp?cid=730706

文章有啲長篇，南怡島同晨靜木公園嘅照片就下篇繼續。

小法國

地址： 京畿道加平郡清平面湖畔路1063

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog:http://http://bit.ly/ywycarol

Contact us: mrmrsfoodhk@gmail.com