天空公園
對於極少運動嘅我而言,要我行上大東山影下芒草基乎係冇可能嘅事,基本嘅自知之明我都係有的。
但講真,見到啲相咁靚,都想去睇下,所以今次去韓國都選定天空公園作為其中一日嘅目的地。
去到世界盃運動場站,其實當中都會見到有指示牌,如果不懂的話,口在路邊啦,附近嘅人都識路。
當日啱啱遇上首爾fc嘅賽事,好多球迷,男朋友都買左件質素唔錯,價錢唔貴嘅衛衣。韓國嘅人真支持體育運動,光係一個運動場,已經咁大,仲特別有個地鐵站。
樓梯上望到嘅運動場:
天空公園好適合我,既可以滿足到睇下芒草園嘅願望,而同一時間並唔需要花好大體力。
點解咁講?
因為只需要行292級樓梯就上到山了!聽落好多?唔會,好似我咁廢都係行左15分鐘~行完樓梯上一段小斜路就到。
小斜路:如果懶嘅話,其實有小車接送,單程2000won,來回3000won就可以不費力,帶到你上公園。
天空公園喺秋冬基本上就係一塊超大芒草園,春夏雖然冇芒草,但藍天綠草 都係另一種靚。
雖然係週六,可能因為紫芒嘅時節都過左,只係見到少數遊客,以韓國人為主。
天空公園嘅大好難形容,閒閒地影番兩三個鐘冇難度,好在而家影相咁方便,只需要相機有電同有空間就可以(雖然我部相機喺晨靜木公園都凍到傻傻地)
基本上求其一個位都已經見唔到人,自high冇難度,可惜我擺pose好廢,張張個樣差唔多。
當日天氣好好,因為中午時間,上到山上本以為會凍,點知有陽光照住,影影下甚至覺得熱。
一整天感覺好完滿。
雪糕係由於早上食嘅明洞餃子太重口味,口乾不解,灌左好多水都解決唔到,於是喺山上嘅小食亭買左雪糕。
天空公園
地址:麻蒲區天空公園路95上岩洞(地鐵9號線世界盃運動場站1號出口)
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表