再窮都要去旅行！

Espuma

用餐日期：2016/12/11（餐廳邀請）

Espuma初初開嘅時候，分別同唔同朋友食過兩次tea set同一次午餐，大家評語都一般，食物嘅味道一般，佢地最為人詬病嘅服務亦都覺得係差。

今次有機會試到佢地嘅冬日限定甜品，雖然係試食，但都係有果句講果句。整體食物質素係有改善，好食左。

冬日限定甜品分別有3款：抹茶/紫薯火鍋($88)、芒果奇亞籽布丁($48)、鮮雜果碟豆花($48) 【只限尖沙咀分店晚市8:30後供應】

我地揀左紫薯火鍋(2人份)試下，以甜品火鍋而言，定價合理。呢set火鍋包括一兜鮮雜果、棉花糖、日式福餅、窩夫同竹炭芝麻泡芙。

賣相而言都幾精美，紫薯味道唔算超濃，反而牛奶味幾重，類似紫薯奶咁嘅味道。配合配料食唔會太甜，出奇地不錯食。

鮮雜果方面有香蕉、士多啤梨、奇異果、哈密瓜、密瓜，每款兩粒。配火鍋的話，個人必選蕉！

棉花糖一般甜品鋪食嘅就通常係直接俾幾粒你，咁呢度嘅有輕微烤過，冇咁hea，配上紫薯都未有過甜嘅情況。

竹炭芝麻泡芙係全份當中覺得最一般的，雖然係泡芙，但空氣感真係太重，冇口感可言，沾上紫薯都好係食左陣風咁~

其中我認為最好食嘅就係窩夫同日式福餅！

窩夫非常鬆化得黎脆口，新鮮整起！忍唔住食埋朋友果件~

日式福餅有3種味道，口感好好，皮薄、煙韌，3隻款配紫薯都ok，唔撞。(唔知如果叫抹茶味火鍋夾唔夾喇)

整體而言，呢個甜品火鍋都食得過，因為一般甜品鋪食個朱古力火鍋都要6、70蚊~(而且我一路食，一路記起我當時食佢地嘅tea set嘅感受：鹹點好食過甜點) 所以先會覺得佢地嘅甜點進步左！

冬季飲品方面都有幾款熱飲，分別$38 (所有分店)：我地揀左以下兩款，價錢唔算貴，不過就冇話太大驚喜。

抹茶白朱古力奶

飲用前記得攪勻，因為抹茶粉喺底下，相對抹茶味，奶味更濃，至於白朱古力嘅味道就唔多飲得出，所以都唔會太甜。

不過略嫌面頭嘅忌廉太多，一舊舊(佔1/3杯)，又攪唔勻，因為係熱飲冇飲管，基本上飲得有難度，建議飲呢款的話，落單時睇下可否少忌廉。

粟子鮮奶咖啡

栗子鮮奶咖啡比較好飲，栗子味唔算好濃，咖啡同奶嘅份量半半，唔喜歡太甜嘅人可能會卻步，不過我個人唔喜歡濃咖啡，就覺得ok。賣相又夠靚~

總結一下，之前嘅下午茶tea set令我對呢度有多少卻步，今次輕輕再試番甜品，覺得有改善，而且幾好食，兩個人飯後食個甜品，紫薯火鍋都係唔錯嘅選擇；飲品冇特別推介，甚至可以點火鍋優惠價配嘅飲品都得，價錢平啲。

不過同大部分嘅人一樣，依然覺得服務方面有改善空間，話哂都有收服務費。特別係如果安排客人坐裡面、窗邊嘅位置要多加留意，好大機會會被忽略…週日晚上9點後未算滿座，但都有唔少客人，入座後或者可以試下輕輕介紹餐單（雖然餐牌已經放左喺枱面），免得客人感覺突兀。

Espuma
地址：尖沙咀厚福街8號H8 2樓

Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: http://mrmrsfoodhk@gmail.com