再窮都要去旅行！

一直想黎太安樓掃街，不過嫌遠，上個月最後嘅週六男朋友喺附近踢波，機會黎喇！
下雨天過去，人唔多，基本上全部都唔洗排隊。

魚蛋佬 

地址：西灣河筲箕灣道57-87號太安樓地下A28號B舖

魚蛋 $5/串

牛栢葉 $8/串

腸仔 $3/串

中大伏！呢度嘅魚蛋唔知發生咩事…魚蛋質感唔好，太鬆拋拋，唔爽口，唔彈牙。我覺得浸左太耐囉，都淋兼脹…完全食唔出咖哩汁味道…唔知係咪我地黑仔啦…

牛栢葉3塊，價錢唔貴；腸仔食左兩條，但整體係普通非常

桜

喺魚蛋佬食左一般般嘅魚蛋 就向手卷出發，桜嘅手卷定價合理，冇特別平貴，一般材料例如三文魚、蟹籽、北寄貝20蚊內；帶子、海膽呢類大概30蚊。

店外有幾張吧枱，方便客人食用~

三文魚手卷 $16

雖然食開三文魚手卷嘅都明白，一般咪兩片，不過睇左店家嘅圖片，滿滿三文魚咁🐟見到實物點都會有多少失落，明明幅圖有…幾片…
撇除數量問題，三文魚不過不失，都算厚切，1/3條白飯手卷，可接受範圍~

飛魚籽手卷 $18

最符合圖片描述就係呢條~ 好好食講唔上，但見朋友食到幾底都有零碎飛魚籽。

紫菜唔淋，但唔算脆口，白飯咪普通白飯囉…

吞拿魚蓉手卷 $22

要數當中最同圖片不符一定係呢條吞拿魚蓉手卷！

男朋友點嘅，我嘗試總結下佢嘅感想：把鬼唔係講笑，幅圖真係鋪滿哂的，實際得一督

一個唔覺意第一啖咬得大啖左…哈，白飯手卷就咁誕生左，不過唔洗驚 ，店家有提供豉油、wasabi油等你送飯

呢度嘅手卷唔貴，整體不過不失，視乎點邊款手卷。但我個人比較鐘意真實性高嘅照片