再窮都要去旅行！

四季文昌

用餐日期：2017/01/23

大半年前一次同朋友聚會，要揾地方食飯，嗰時四季文昌太子店剛開冇耐，以椰子雞鍋做主打，見口碑不俗，所以同朋友去試過。

結果冇預期中特別，鍋底比較清淡，配料亦冇乜驚豔，唯價錢亦都唔平，同行朋友都覺得普普通通，我都唔敢再提起話要食。

不過勝在店面夠大，空間感足，如果同朋友食飯，都可以坐得舒舒服服。

今次同男朋友再訪尖沙咀分店，就冇再抱著好大期望~

平日晚上八點半到達，人客蠻多，差不多坐滿。

雖然比起太子分店細好多，但座位間唔會逼逼狹狹，唔會話要聽哂隔離枱講乜 ~ 裝潢上都依舊展現文青感。

原味椰子雞鍋 $128/半隻

鍋底揀咗最基本嘅原味，比較番半年前喺太子店食嘅，明顯好好多，唔知道是咪已經整體改善左。

鍋內仲有唔少椰皇肉，今次食確係比上次食美味。

首先煮滾椰子水，加入文昌雞，慢火煮7分鐘食得，唔怕唔知時間，漏斗會幫你計時。

湯頭椰青味香甜，保留清新感，唔算好濃郁，雞件有肉，夠滑！(上次食係覺得雞皮肥到冇朋友) ​​​​​​​

沙薑、辣椒、青金桔嘅調味料隨個人喜好添加。

安格斯牛小排 $168/小

賣相唔錯，大小均一，紋路清晰，冇太多肥脂又唔會過瘦~

快灼幾秒食得，入口好腍、有牛味，淥耐左都唔會又老又韌。

以咁嘅價錢，份量算多都抵食~上次食平一半有多嘅雪花肥牛，確係普通，寧願俾多少少叫呢份。

玫塊黑豚腩片$98

將黑豚腩片砌成玫瑰花形狀上碟，無疑係為相機食先者而設。

腩片本身切得夠薄，很快熟，入口算爽，唔會肥，而特別有些少軟骨有脆口感。

不過如果好似我咁唔多like軟骨，會覺得到攰。

手打蝦滑 $68

雖然食到有蝦味，但蝦肉唔實，唔算好彈牙，不過不失。

文昌墨汁丸 $88

墨汁丸上配少量蟹籽作裝飾，賣相可以，但味道唔突出，同蝦滑一樣唔算彈牙，有啲失望。(即時諗起力奇火鍋，呢兩樣佢比較出色。)

燒汁肥牛福袋 $88

店家推介產品，賣相成索袋型，幾得意，一碟四隻，大少如包裝紙巾~

用豆皮包著燒汁肥牛同洋蔥，因為豆皮會索湯，所以食嘅時候要小心。

牛肉味道似日式，甜甜地，算不錯，但一個已夠皮，睇佢唔出係飽肚野。

炸響玲 $32

普通嘢，唔特別出色，但不會有油億味~ (同大部分酒樓質素差唔多)

日本產地直送野菜籃  $49

呢度蔬菜嘅款式都唔少，而且有啲比較少見：小松菜、水晶冰菜、羽衣甘藍、水菜

我地點嘅野菜籃有四至五種菜，日本水菜、菜芯、娃娃菜、生菜，少量菇類。

各款菜都食得出好新鮮，加上椰子鍋湯底，好甜。

個人尤其喜歡水菜，味道、口感特別，小清新，食完咁多肉類，唔食番幾條菜唔掂！

煲仔飯

唔好期望係好正宗嘅乾身煲仔飯，食過兩次唔同款嘅飯，都有同感。

如果想食乾身、有焦嘅煲仔飯，呢度未必滿足到你~因為啲飯食落濕濕地不過芝士味濃郁，有拉絲效果，而且裡面嘅肉唔老唔韌，拉回分數。

薄荷青檸梳打 $32

每人叫咗一杯飲品，好大杯，賣相又幾靚，價錢唔貴好抵。(有時打邊爐見到十幾廿蚊罐汽水，唔多捨得點)

不過呢杯味道麻麻，青檸味太強，無乜薄荷味~

菠蘿沙冰 $32

沙冰冇伏！幾好飲，唔會過甜，而且夠細滑，可以一試。

整體黎講，感覺比上次好！ (湯底上次冇鹽冇味、雞又肥) 加上店員好有禮~想清清地打個火鍋不妨一試，但食開重口味野會覺得較淡~

四季文昌

地址：尖沙咀金巴利道35號金巴利中心1樓

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

GetReady Blog: http://bit.ly/2j9I7jn

Contact us: mrmrsfoodhk@gmail.com