樂點咖啡
用餐日期:2017/02/17
食物選擇不少,有沙律、小食、三文治、主食、全日早餐、手工貝果、churros、熱香餅。
由於我地已經食過早餐先上船,所以只係點左一客飯、一客甜品、兩杯飲品。
沖繩塔可飯 Taco rice $64
塔可飯有菜有肉,賣相唔錯。
材料有生菜、牛油果、蕃茄、太陽蛋、粟米片、芝士、肉醬、牛肉、豬肉,非常豐富。
飯類只有兩款,見比較多人會點呢份,確實見到意粉類嘅賣相較普通。
隻蛋幾靚仔!(我見隔離學生哥隻蛋,有表情好可愛嘅蛋黃哥)
將碟飯撈勻左係有少少核突,但味道不錯。
份量適中,有蔬菜、豬牛肉,有菜有肉,幾健康。
食落主要就係肉醬味,芝士味唔濃,配粟米片原來幾好食,不過略嫌飯唔夠熱辣辣。
飲品嘅選擇都唔少,有咖啡、拿鐵、朱古力、壺裝果粒茶、梳打、冰果茶、花茶。
綜合鮮果冰茶 $38
水果茶比較一般,可能因為只係幾十蚊,用隻普通杯,加幾粒切細嘅果粒。
我覺得hea左啲,味道當然都係一般,唔會太甜,但冇乜果味。
你問我,就38蚊都嫌貴左少少。
香蕉朱古力 $38
香蕉朱古力嘅賣相唔錯喔!凍飲都照樣有小拉花。
朱古力味濃,甜度剛好,可惜幾乎飲唔到任何香蕉味。
但比起水果茶,呢杯起碼有個拉花睇下。
一心黎食甜品,當然不能錯過。
本來想點大部分人食嘅雪糕配熱香餅,但見到有幾款「期間限定」,又俾呢幾個字吸引去。
焦糖烤布丁芝士熱香餅 $70
上層係焦糖烤布丁,下層係芝士熱香餅。
雖然價錢唔平,但賣相不俗。
布丁滑溜,質地挺身,蛋香濃郁,配合面頭嘅焦糖醬,甜度適中。
底層係芝士熱香餅,同我地食開嘅pancake唔同,比較接近蛋糕,蛋糕軟綿綿。
中間嘅芝士細滑,唯味道係淡芝士,唔會蓋過布丁嘅風頭。
整塊食都會嚐到唔同嘅層次。
不過老實講,價錢偏貴,幸好味道不錯。
睇到呢度,其實兩個人黎食餐飯,如果一人一碟,加兩杯飲品,再食埋甜品,冇三百蚊係落唔到樓的。 所以點解大部分香港人慕名黎都係share一份甜品就算。
見到凍櫃有一杯杯嘅焦糖吉士布丁,size比較迷你,我地都仲食得落,加上見到只係5蚊,試一杯。
焦糖吉士布丁 $5
5蚊,細細杯,如果飯後食唔落一整份甜品,點一個迷你版布丁不錯呢!
焦糖層燒得非常脆,微焦,厚身。
布丁質地creamy,跟以上嘅布丁熱香餅截然不同。相比之下,呢個更甜一點,幾口食哂,幾蚊雞可以一試。
整體而言,樂點咖啡嘅質素不俗,唯消費稍高。
服務都相當唔錯,店員眼見我地飲品飲完,都主動遞上清水,夠醒目!
下次黎的話,會主力食甜品。
樂點咖啡
Follow us:
Instagram:http://http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表