壹燕糖

用餐日期:2017/03/12

壹燕糖位於福隆新街,係早年黎澳門幾乎必到嘅手信街,同時亦都係唔少遊客食翅嘅集中地,佔盡地理優勢。

不過近年遊客買手信都已經轉去大三巴、官也街等地方,食魚翅嘅人都比以往少,所以雖然我地黎過澳門幾次,亦都喺福隆新街影過唔少充滿懷舊味道嘅照片,但都唔知道原來有間挺有水準嘅甜品店。

壹燕糖顧名思義係以燕窩作為主打,定價親民,實行將燕窩平民化。

唔講唔知,原來老闆出生自海味世家,家族經營海味生意好多年,當中為人熟悉嘅就係附近嘅添發碗仔翅美食,所以壹燕糖取貨都係來自自家品牌,變相成本較低之餘,用料又有保證,難怪食落真材實料!

當然除左比較傳統嘅燕窩甜品,小店尚有其他特式糖水、小食,值得一試。


壹燕糖就位於福隆新街1號,門外保留街道嘅舊有風味。晚上黎到福隆新街更有味道,幾乎唔見遊客蹤影,我地都影左唔少相。

gluttonous-house-02.jpg

店內相當闊落,而且乾淨企理。由於時間比較夜,我地都係當日最後嘅客人。

gluttonous-house-01.jpg

甜品款式唔少,分燕窩系列、芒果甜品、傳統石磨糖水、中式糖水。另外有不同款式嘅小食,例如撈麵、蛋撻、豬扒包等。

gluttonous-house-03.jpg

gluttonous-house-04.jpg

椰皇燉官燕 $98

話明主打係燕窩,當然要試下佢地嘅招牌!

燕窩款式都有幾款,有椰皇、燉奶、更滋補嘅花膠燉燕窩等,價錢唔貴。燕窩可以選擇燕盞或碎燕,當然價錢有別,相差幾十蚊,豐儉由人。

一場黎到,我又唔係成日有燕窩食,當然係點燕盞,呢款椰皇燉官燕有足足一両燕窩架,相當足料!

如果選擇冰糖燉燕窩,相同價錢仲食到足二両燕窩,真係諗起都想食。

gluttonous-house-09.jpg

椰皇裡面滿滿係燕窩,由於原隻椰皇燉,椰子味相當強烈,老闆話仲加左椰子水、奶等材料,難怪味道咁清新!

燕窩足料唔洗講,睇番份量都真係相當抵食。喺香港食椰皇燉幾粒湯丸都六、七十蚊…

gluttonous-house10.jpg

芒果腸粉 $32

芒果腸粉睇番評語都係必試系列,食過後都覺得不能錯過。

腸粉睇落已經好滑溜,而且做得相當薄身,用上椰汁製作腸粉皮,所以都帶清甜椰子味。

gluttonous-house11.jpg

芒果肉雖然唔算澎湃,但微微香甜,唔會有甜水感覺,食哂都唔覺得膩。

gluttonous-house12.jpg

鮑魚撈麵 (鮑汁/XO) $120

賣相好吸引!兩隻大鮑魚、撈麵、生菜,好豐富。由於我地食過晚飯,所以二人分享,份量剛好。

見我地大讚好味,老闆都解釋呢個鮑魚撈麵係佢地嘅招牌菜,由鮑魚、麵、調味等配料全部自己煮過,唔係現成貨,當中嘅誠意、功夫可想而知。

gluttonous-house-06.jpg

鮑魚大大隻,煮得腍身,食落爽口,鮑汁入味,唔係一般喺其他鋪頭食到嘅惹味!

gluttonous-house-07.jpg

麵嘅份量唔少,面頭有蝦米仔,食落唔腥。明明幾分鐘前話飽,但我同男朋友都忍唔住一口接一口。

gluttonous-house-08.jpg

燕窩薏米水 $25

食完鮑魚麵飲番杯薏米水,十分清涼。薏米水有利水祛水功效,啱哂女士。

gluttonous-house-05.jpg

總括黎講,壹燕糖嘅甜品都幾有水準,價錢合理,真材實料。如果有多幾個朋友一齊分享,可以試更多款式,特別推介椰皇燉官燕、鮑魚撈麵!

福隆新街係昔日澳門最繁華嘅街道之一,至今仍然保留舊貌,除左黎食糖水,仲可以感受下街巷獨有嘅特色。


壹燕糖甜品
地址:新馬路福隆新街1號地舖

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: http://mrmrsfoodhk@gmail.com

    I'm Carol 發表在 痞客邦 留言(0) 人氣()