再窮都要去旅行！

李記大連燒烤

用餐日期：2017/07/19

印象中渡船角一帶可算係香港嘅雞煲同串燒發源地，所以同類型店舖喺附近開到成行成市，以往一癮起就會落去幫襯，但今次落去食比較冷門嘅東北菜，亦令我又有新嘅體驗。李記大連烤燒位於文英街，附近都係啲燒烤老字號，當然佢哋本身都有雞煲、烤魚同燒烤供應，但老細本身係東北人，所以東北菜先至係佢哋嘅特色主打。我地本身唔係經常食東北菜，所以拜托老闆娘介紹左幾味菜，佢好好客，而且點嘅幾款都好啱我地口味

餐廳位置唔多，但乾淨企理，最欣賞係每枱都有盒裝紙巾。

當日落住大雨，客人就唔係特別多，所以我地都坐得舒服。 但老闆娘話平時人多啲，會熱鬧啲，什至有時要坐埋室外張枱仔。

桑拿花甲 $70 

有別於一般炒法，並冇加入豆豉，落左彩椒、辣椒輕炒依然惹味，而且花甲本身夠新鮮，粒粒飽滿，鮮甜好味

蒸東北餃子 $45
餃子即叫即蒸，老闆娘話由連餃皮都係鄉下寄過黎，夠哂地道，由搓皮到餡料全部自己親手做。

餡料簡單唔複雜，只用豆角切粒加豬肉，好好食。東北餃本身皮會厚身啲，食落帶韌勁，肉汁豐富，可配蒜醋食，輕鬆清哂十隻

紅燒芽帶魚 $128
呢味係餐牌上我搵極都搵唔到，因為貨源關係唔係成日有得食架，真好彩
老闆娘話呢道都係東北名菜，小店堅持用野生芽帶魚，食落會同養植嘅唔同，所以就唔係成日有。
芽帶先炸香，後回鍋紅燒，食落咸香，魚肉唔多但莓莓下又可以送飯。不過芽帶骨多，要小心。

香辣蟹 $388
全晚主角當然係香辣蟹啦！香辣味道撲鼻，賣相又吸引，睇相我都流晒口水！

肉蟹本身夠大隻，相信係用過猛火將外殻炸至酥脆，蟹肉本身就唔算話好多，但好新鮮，食落唔會太乾。

加上香辣超級惹味，辣度適中，唔會過龍，正宗嘅東北辣蟹會辣得多，但老闆娘怕我地唔食得太辣，調整過口味。

總之就食到停唔到口，連配料嘅青瓜同金筍都好入味

韭菜炒木耳 $68 

韭菜同木耳呢個配撘有清脂、降血壓嘅作用，用蒜蓉清炒唔會難食得去近。木耳夠爽口，食完香辣，清清地中和一下非常好。

涼拌豬耳 $65
同四川嘅涼拌有少少唔同，以香辣為主而非麻辣，但依照過癮，豬耳有軟骨，口感脆脆，送酒一流

整體嚟講菜式嘅水準不俗，雖然自己好少食東北菜，但都留低唔錯嘅印象，加上老闆娘非常豪爽，招呼週到。
眼見現場亦有唔少係熟客幫襯，自己回訪機會亦高

李記大連燒烤

地址：佐敦文英街9號地下

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com