奈雪の茶

用餐日期:2017/07/06

奈雪の茶  一杯好茶 ,一口軟歐包

隨住網紅喜茶嘅成功,國內都有好多唔同嘅茶飲品牌興起,奈雪の茶可算係其中比較成功,旗下仲有喜年貢茶、台蓋等品牌。「一杯好茶,一口软欧包」係品牌希望傳遞嘅概念,所以有別於眾多茶飲店,奈雪の茶除左供應飲品,仲自設餅房新鮮製作軟歐包,非常受歡迎。創辦人表示希望顧客除左記得品牌嘅茶飲,仲要記住佢地嘅麵包,因此將兩款產品都做得好有質素。假如你係「麵包控」,去到深圳不妨搵間奈雪の茶,有超過二十間分店,提供座位,以茶飲店、麵包店而言,規模不容忽視

從深圳灣口岸前往奈雪の茶海岸城分店可以坐M299號巴士,於海岸城站落車;從其他口岸出發,可選搭地鐵於后海站落車。

海岸城店很有規模,近門口位置係收銀處,任何時間都有長長人龍,右邊有麵包櫃,裡面有餅房,定時新鮮出爐麵包。雖然店內位置非常多,但由於採取自助形式,唔會有店員催趕,好多客人都會坐一段時間,情況就類似星巴克,加上人氣不一般,要搵位都有難度。我地黎過兩次,一次平日下午茶時間,人頭湧湧;另一次係週六,早上人流較少

naixuecha_01.JPG

naixuecha_03.JPG

雖然人多,但唔會感覺逼狹,聞說裝潢出自國際設計師手筆,個人認為垂下嘅吊燈做成蒲公英狀,別具一格

naixuecha_02.JPG

先排隊點單,店員會叫號,雖然人多,但等候時間唔會太長,約十多分鐘

供應冷泡茶、現萃茶、鮮果茶、可配芝士奶蓋 / 牛奶,另有奶茶、沙冰等超過30款茶飲,定價RMB¥12-28。 

茶葉大部分來自台灣地區,例如阿里山區嘅青心烏龍、蜜香烏龍,來自鹿谷嘅凍頂烏龍等,強調茶好,簡單泡就好飲。

芝士奶蓋阿里山初露 (少糖)  RMB¥25

茶飲有固定份量,熱飲杯為500ml,冷飲杯為700ml,其中最大杯嘅一款水果茶有1000ml,很有份量,至於冰量及糖份一律可以自選。

芝士奶蓋味道較鹹,入口細滑,但個人認為喜茶嘅奶蓋做得厚身,香而不鹹,確係更出色

阿里山初露指清晨採集嘅高山茶葉,以超過40小時低溫焙火,味道清新,茶香甘甜,但唔會太濃

   霸氣牛奶草莓  RMB¥28

配牛奶嘅鮮果茶供應草莓及芒果兩款,因為用上鮮果,屬於季節限定款式。其他唔加入牛奶嘅果茶有7款,例如橙、百香果、檸檬等。

茶飲強調用上鮮果,並冇加入太多冰沙,所以飲品唔會好挺身。牛奶份量多,放置一段短時間,已經開始滲入果茶中,形成唔太清晰嘅漸層

草莓可能唔係當造時節,甜度唔高,牛奶味反而更突出,個人唔識欣賞,交由伴侶飲哂

naixuecha_09.JPG

軟歐包都係奈雪の茶嘅人氣產品,供應多款口味,而且每個月輪換。例如當月有抹茶芝士味、芝心三色薯、藍莓、Oero夾心、榴槤等口味,定價RMB¥12-28,款款都好吸引,「麵包控」不能錯過

軟歐包著重麵粉發酵嘅天然風味,強調低脂、低糖、低鹽,屬健康之選。喺香港嘅話,價錢相信係兩倍有多。

naixuecha_04.JPG

naixuecha_05.JPG

naixuecha_06.JPG

naixuecha_07.JPG

麵包可以即場食用或外帶,有專人幫忙切割。

naixuecha_08.JPG

抹茶芝士圈 RMB¥12

 

本來係想試花花形狀嘅「抹茶朵朵」,但剛好賣哂,只好留待下次再試。

歐包非常軟熟,入口唔硬唔乾。麵包帶天然麥香,抹茶味道唔算太明顯,但加上淡淡芝士香及混有朱古力顆粒,增添口感。而且咁嘅價錢咁大個包,邊度搵。

 

naixuecha_10.JPG

naixuecha_11.JPG

紅曲蔓越莓 RMB¥14

第二次黎嘅時候,我地選定呢款顏色好靚嘅蔓越莓歐包,依然軟熟,裡面加有軟芝士、莓乾,味道天然,喜歡食包嘅不妨一試。

 

naixuecha_12.JPG

naixuecha_13.jpg

深圳有好多食店不論規模、質素都不錯,奈雪の茶有相當高嘅人氣,個人認為茶飲中規中矩,軟歐包反而更值得試下,價錢相宜,款式又多

深圳分店位處各地,較為香港人熟識嘅除左有海岸城店,仲有KK mall、華強北九方購物中心等。

naixuecha_14.jpg

其他深圳嘅飲品店介紹:

【深圳一日遊 - 歐包熱】樸悅間 http://bit.ly/2iZDyY2

【深圳一日遊】喜茶 - 超級網紅店 http://bit.ly/2iXC3ts

喜茶嘅其他ins帖文:http://bit.ly/2AaOZpc


奈雪の茶  

地址:深圳市南山區文心五路33號海岸城購物中心一層129號鋪


 

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

    I'm Carol 發表在 痞客邦 留言(0) 人氣()