再窮都要去旅行！

黃記煌三汁燜鍋

用餐日期：2017/09/25

黃記煌三汁燜鍋源自北京，喺國內有超過600多間分店，早已喺美國、馬拉西亞、泰國、台灣等地開設分店，最近亦都已經進駐尖沙咀。

三汁燜鍋以無水烹調，鍋中不加水，放入底油、蔬菜，配搭海鮮肉類等主料，加上自家製醬汁，單靠食物本身嘅味道燜煮，更加原汁原味。

食完燜鍋後可加入高湯及配料，好似平時食雞煲嘅做法一樣，頗有新鮮感，可以一試呢

其實黃記煌喺國內都有好多分店，雖然我間中都北上搵野食，但好少話諗到去食燜鍋，畢竟國內有咁多選擇。估唔到香港嘅黃記煌水準都唔錯，環境舒適，燜鍋又夠惹味。

餐廳位於尖沙咀，喺樓下已經見到亮眼招牌，位置很多，而且相當闊落，即使唔係坐卡座，都有足夠嘅空間。

餐牌供應多款燜鍋，有魚、雞、牛蛙、海鮮、牛肉、豬類，定價$228-298。

如果喜歡彈性高一點，可以自選配料四款，都係$298，可選魚柳、白蝦、蠔、牛柳粒、大腸等，然後醬汁自選，有招牌鹹鮮汁、海鮮鹹鮮汁、香辣豉皇汁、麻辣汁等。

另有涼菜，例如麻辣土豆絲、黃瓜、尖椒皮蛋等，等緊燜鍋途中可以點個涼菜，邊食邊等。配料有海鮮、肉類、丸餃滑類、蔬菜、豆品、麵飯等。

蝦蝦大笑燜鍋 $278

個個鍋都好吸引，我地揀黎揀去都係決定呢個「蝦蝦大笑」，裡面有虎蝦、白蝦、墨魚仔，跟番建議配搭選香辣豉皇汁。

配料用一個類係花樽嘅容器裝住，一層一層，先落底油，然後會鋪上蔬菜底料，有蘿蔔、西芹、洋蔥、紅棗、杞子、蕃薯等。

然後鋪上主要配料，即係虎蝦、白蝦、墨魚仔。最後加調味料，黑白胡椒、五香粉同少少酒，蓋上煲蓋燜煮，我地呢款鍋燜左15分鐘。

然後店員會加入香辣豉皇汁，均勻鋪喺面頭，質地幾嘅稠身，所以燜鍋都幾重口味，最後再燜多幾分鐘就食得

虎蝦、白蝦加埋都有接近20隻，相對白蝦，虎蝦嘅質素較好，既大隻啲，而肉質較彈牙爽口，感覺都幾新鮮。

白蝦則中規中矩，其餘墨魚仔其實都好多，不過燜完縮哂水，好細粒好搞笑。

而香辣豉皇汁嘅味道其實有少少似奇味雞煲，鹹鹹地又辣辣地，愈煲愈入味連蘿蔔、蕃薯等配料我地都食清光。

燜鍋食到咁上下，可以加湯好似平時咁樣打邊爐，加左湯之後，味道會稍為調淡，冇咁重口味。

美國客格斯牛柳粒 $98

牛柳粒帶少少筋位，有嚼勁得黎唔老唔韌，亦有明顯牛味，但一點必需要講，價錢實在太貴，接近十蚊粒

三黃雞件 $58

因為冇點燜雞鍋，所以只行點左一份雞淥落去試試，雞件份量正常，而且配呢個鍋底都好入味

手打蝦滑 $65

蝦滑都夠新鮮，而且入口都彈牙，略嫌唔夠起膠。

鮮蝦雲吞 $24/半份

本來半份雲吞要廿幾蚊都唔貴，不過只有三粒，而且質素普通

娃娃菜 $35

咁重口味嘅鍋底唔少得點個菜食下，我地揀左娃娃菜，超入味

出前一丁 $15

本來係冇打算點的，但見到前面枱食，我又忍唔住。

多芒亮晶晶 $19（like facebook半價）

最方便係食完火鍋，仲可以點埋許留山糖水，我都唔知自己幾耐冇食過（本來我係想去食抹茶甜品的），但朋友猛話幾抵幾抵，要食埋。

於是我地like左黃記煌嘅facebook，享用左半價甜品，如果人多，想一人一份，就按人頭like，都幾大方

黃記煌三汁燜鍋

地址：尖沙咀加拿分道16號金輝大廈1樓

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com