再窮都要去旅行！

愛 . 添 Appétit

用餐日期：2017/11/04

紅橋冇咩多，就係小店多，近巴士站呢個位成日轉手，原來已經變左甜品店。雖然係週六，但因為時間尚早，人地仲食緊正餐，所以我地「霸氣包場」。

餐廳都幾光猛，水泥牆，一律高櫈木枱，加幾個粉藍cushion，簡單舒適，加上播啲國語歌好啱聽

餐牌供應甜品為主，有梳芙厘班戟、窩夫、芋圓甜品、綿綿冰，定價$28-78；飲品方面有果昔、水果茶、奶茶等，定價$20-38，選擇唔算好多。

另有台式小食，例如鹽酥雞、花枝丸，想飽肚啲有一丁同烏冬，亦有熟食套餐，包麵、肉燥、小食、飲品各一款，9pm前$48，9pm後加廿蚊。

自選撈麵套餐 $48 (自家製四川麻辣肉燥+$2、出前一丁、台式鹽酥雞、綜合水果茶+$10)=$60

套餐都抵食嘅，因為單點小食都30幾蚊。原本就$48包麵、肉燥、小食、飲品，咁我地想試下麻辣肉燥就加兩蚊，飲品揀左原價$38嘅水果茶。 最終揀齊野就$60，可以接受

自家製四川麻辣肉燥出前一丁

如果唔鐘意一丁，可以選烏冬的。四川麻辣肉燥就一般般，嚴格黎講唔係好肉燥，一條條肉絲有啲醬料咁，麻辣度有點弱，勉強過得去

麵就細細碗，預你食埋甜品先夠飽。真係諗住食到四川麻辣嘅我地有啲啲啲啲失望。

台式鹽酥雞

鹽酥雞都幾好食，唔會太厚粉，入口幾酥脆，鹹度適中，雞肉都嫩，六、七件左右。

綜合水果茶+$10

跟餐加10都幾抵，味道唔差，有火龍果、橙、蘋果、藍莓等，預期之中茶味唔算好濃，但果味都幾香

(見到門口易拉架寫住飲品外賣會有9折)

愛·添草莓 $38

即係草莓果昔，裡面有鮮草莓同鮮芒果，賣相都ok嘅呢個價錢。

用鮮果blend成，味道唔假，冇溝果醬，酸酸甜甜，飲落順滑，冇細碎冰，而且都幾大杯呢

法式燉蛋  

燉蛋係店員話梳芙厘班戟嘅等候時間耐左而送俾我地嘅，幾貼心。

質素一般般，原價$28就唔係貴，面頭嘅焦糖層燒起一段時間，唔夠香脆燉蛋未算滑溜，見唔到雲呢拿籽。

草莓芒果日式梳芙厘班戟 +雪糕 $78

班戟賣相同圖片都有少少出入，圖片靚少少，明嘅。不過見到奶油面頭加左一條乾花，都開心仔

除左班戟，仲有甜奶油、鮮草莓、鮮芒果同一球自家製雪糕：豆腐、芒果、香芋、曲奇

班戟有空氣感，唔死實實，唔似食蛋糕，但中間好似未熟透，蛋香弱啲，個人認為都ok啦，除左面同底好似焗過龍咁，燶燶地(?)，比較粗糙

雪糕係自家製，揀左豆腐味，唔係好濃，入口都唔夠滑溜。

整體黎講，對於班戟會有少少失望嘅，但可能成間野感覺都幾舒服，我又覺得可以有下次，俾多次機會。