張姐烤肥牛
用餐日期:2017/11/11
都知道有唔少人對於番大陸冇乜好感,又或者聽過太多壞印象嘅事,但我個人對北上冇抗拒感,特別鐘意北上唱K,平到冇朋友,去開嗰間量販式都幾有規模,乾淨企理。
日頭(12-7pm內)收費都係 RMB¥75/4小時,講緊係中房,當4個人坐都相當闊落,除番開都唔洗廿蚊位,消磨四個鐘,喺香港,邊度做到。(想知邊間再問)
音響唔好以為好差,靚過香港;最重要係啲歌夠新,又唔會分公司
近期記低左唔少咖啡店喺車公廟呢邊,就連續兩星期過黎,喺皇崗口岸過黎都好方便 地鐵車公廟站落,呢度好似仲發展中,冇咩商場或者地標。
跟住點評網嘅「好友」黎到呢間【張姐烤肥牛】,橫街窄巷都幾隱蔽,(唔係香港嗰種,係又隱世唔係又隱世),其實晚上黎,附近都有少少暗。
因為我地揼完骨先黎,過哂食飯時間,接近九點半鐘,客人唔多。餐廳位置都幾多,夠光猛企理
主打炭爐烤肉,有牛、豬、雞、腸、魷魚、多春魚、菇菜、海產、涼菜等,選擇唔算好多。驟眼睇價錢都唔平,但份量頗多,適合多幾個人一齊食。
炭爐烤肉喺香港比較少食,而佢地個爐稍稍墊高,可以漏番啲油出黎。烤爐面頭會放吸油紙 (其實冇咩用), 不過唔會有炭屎咁解。
醬料自助
肥牛 RMB¥60/小
雖然係(小),但實際份量都幾多,兩個人食,開行turbo都食唔哂牛嘅質素都唔差,但就肥膩啲,因為會靠牛嘅油份黎烤其他食物。
雞軟骨 RMB¥35
烤雞軟骨係高難度動作,多得店員幫我地先冇浪費因為碳火都幾猛,雞軟骨容易燒焦,但裡面又唔熟,所以要放爐邊慢慢烤,冇耐性者唔建議。
丹東大蜆 RMB¥50
呢隻野真係唔平,一份12隻,喺木屋燒烤食過一半價錢咋。唔算好大隻,但乾淨冇沙,其實幾鮮甜多汁唔乾,可惜太貴。
生蠔 RMB¥50
喺大陸食生蠔,有喺人好鐘意,有啲人就覺得唔乾淨,好反感。我就【眼不見便可以】,而且我唔係好狂熱,兩三隻止步,so far冇肚痛。
生蠔已拆殼,加左調料,辣辣地,連錫紙兜燒,唔會好乾幾好食
魷魚 RMB¥40
主要係魷魚腳,用生洋蔥墊底,鐘意可以烤埋,洋蔥熟左甜甜地,幾好食。
講番魷魚,魷魚份量多,四個人一份夠哂,烤完之後,幾彈牙爽口,而且佢啲配料已經醃好哂,鐘意自己再加孜然粉又得,鐘意加辣醬又得
韓式烤腸 RMB¥35
本身唔知係乜,類似細條嘅台灣香腸,不過口感好腍,一般
雞脾菇 RMB¥15
菇調味比較重手,略鹹。
生菜 RMB¥5
我地都係拎黎包肉食,冇咁肥膩。
環境都可以,因為客人唔多,店員(老闆?)服務很好,又幫忙烤又不時換紙。
食物質素未算驚豔,但還可以,人均百零蚊可以食得飽,不過怕肥啊、怕油膩、怕重口味嘅人就唔建議黎喇。我唔怕,哈哈
張姐烤肥牛
地址:車公廟泰然工貿園205棟 (地鐵車公廟站F出口)
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表