黎到台灣除左火鍋、燒肉一定要食，仲要灌入大量台式飲品
因為平時喺香港飲，平極都要廿零蚊杯，喺台灣飲，選擇多之餘，仲要平一半。其實邊有人去便利店買野飲
50嵐
用餐日期：2017/12/18
試左呢間50嵐，自稱為手搖茶第一品牌，我地本身都鐘意旗下嘅KOI，睇睇有冇唔同。
50嵐供應原茶、拿鐵、多多、奶茶系列等，定價NT20-70，冰度甜度自選。買中杯裝超過NT30，加珍珠、波霸係唔加價。
青茶瑪奇朵 NT30/L
甜左少甜，同KOI嘅一樣，瑪奇朵指嘅係鮮奶油，類似奶蓋層。晚上人唔多，等左幾分鐘，點嘅中杯size。
鮮奶層竟然超過1/3杯，誇張，入口順滑，但唔夠稠唔夠綿，雖然點左少糖，但鮮奶油都係太甜
飲兩口有點膩，只好盡量大啖啲飲，務求沖啲茶上黎。
青茶色澤較淺，茶味清澀，冇乜點擔心過台茶唔夠茶香，只係奶太甜。
50嵐
地址：西區美村路一段141號
其他店：http://www.i-write.idv.tw/life/info/50lan/50lan8.html
丸作食茶
用餐日期：2017/12/18
雖然香港都已經有分店，兼試過好幾款，但行過又冇理由唔飲下，台灣呢邊買平一半有多，兼當日慶祝勤美店試賣 ，所以全線飲品都有9折。
餐牌供應原茶、手沖茶、果茶、奶茶、特調等，定價NT20-85，甜度冰度自選，珍珠可加錢配，但唔同款式價錢有別，加NT10/20。
Menu基本上同香港嘅一樣，只係某部分飲料改左個比較台式、文青嘅名字，例如【一日時光】、【匆匆那年】…
輕慢旅行 NT45 (原價NT50)
好明顯係揀名 多過揀茶(笑) ，其實佢係白桃烏龍手沖茶，手沖茶同原茶唔同 ，前者即時沖泡， 價錢比原茶高一半。
原本想加下珍珠 ，有啲野咬下， 但店員話手沖茶唔建議加配料。大約13蚊唔洗，點都係抵飲
剛好同戰鬥女子學園合作 ，所以我地要左呢款熱飲杯 (裡面當然是凍飲)
點左微糖，第一下入口桃味都幾出， 但再飲就開始淡 完全唔甜嘅，始終係即時沖，烏龍茶味未有好濃。
丸作食茶
地址：西區美村路一段36-1號
福芳號
用餐日期：2017/12/20
I Plaza外圍有少食店、飲品店 大部都不用排的，唯獨有一家未開門已經排左20個人以上，直至我地喺同一個商場食完飯離開，人龍仲愈黎愈長，我冇乜心機排隊，於是放棄
其實呢條街單單係賣黑糖珍珠嘅手搖杯都有好幾間，轉角位有福芳號，咁我地即管試下。
福芳號店面唔大，只提供外帶，餐單圖文並茂，確係比較吸睛。飲品分為咖啡、鮮奶、冰茶、沙冰、奶蓋、原茶。
價錢比一般台茶高一點，定價 NT30-96，若果追加珍珠再加NT10，難怪大家都話佢嘅飲品可愛，但價格唔可愛
當日都有兩款特價 - 惡魔珍珠鮮奶、盆栽珍珠鮮奶，只需NT50 (原本要NT70)，但我地想試另一款都好吸引嘅漸層飲品。
抹茶咖啡歐蕾 NT75
飲品有明顯三個分層，抹茶比例較少，鮮奶部分喺中間，而咖啡佔最多。唔搖勻嘅話，係好長時間都唔會融合。
直接飲的話，會飲到好突出嘅三種口味，先有明顯抹茶， 再到鮮奶嘅甜度，最終滿口咖啡味。
但如果搖勻左先飲，基本上抹茶味就無影無蹤，只係一杯普通嘅鮮奶咖啡。
咖啡味道幾濃，唔會太甜，其實整體都唔差，不過價位有點高
福芳號 一中店
地址：台中市北區一中街96號
輕時代飲品製造所
用餐日期：2017/12/20
喺台灣都興起黑糖珍珠鮮奶，好多茶飲店都跟風推出黑糖飲料，大熱嘅老虎堂啦、福芳號等一樣供應，原本我就想良辰吉時嘅，可惜依照店家營業時間去到，結果沒開，殘念
離開一中街前，見到呢間門面亮眼又文青嘅輕時代飲品製造所，裝潢以黃色為主，鋪面唔大 門外有文青單車、乾燥花擺設，可借用影相
餐牌選擇唔多，只有10款飲品，紅綠青茶、鮮奶類、果茶、果醋等，茶底標榜用天仁茗茶系列，鮮奶係小農牧場直送，黑糖珍珠由店家手工炒製，定價NT20-45。
「一件很美很小的事」呢啲字句都挺吸引目光，由裝潢到用料都想表達，佢地係好用心嘅小店。
價位親民，即使飲品一般般都無傷大雅，至少性價比唔會太低。
黑糖珍珠鮮奶 NT35
第一次見到呢個價錢嘅黑糖珍奶，一般價位大概喺NT50，所以真係幾平。同大部分茶飲店一樣，固定甜度，賣相都幾靚，珍珠暖暖地。
老實講好多黑糖珍奶味道都差無幾，我主要係睇邊間冇咁甜，哈哈
除左黑糖珍珠都加左黑糖蜜，飲用前搖勻，飲落有明顯黑糖味道，鮮奶順滑，但奶香一般 。
黑糖味太強烈，甜度十分高，能夠糖度減半會好多
珍珠粒粒都充滿黑糖味，正常大小，但我覺得喺台灣嘅珍珠偏腍身，可能就係大家稱之為Q彈，我比較喜歡煙韌嘅口感。
飲到最尾實在太甜，不能繼續，主要就係價錢相宜，不用排隊。
輕時代飲品製造所
地址：北區一中街175號
清心福全
用餐日期：2017/12/21
番到台北 都不忘繼續飲台式飲品，清心福全就唔係得台北先有，但我冇時間嘛。
揀呢間真係不為什麼，就只為杯子，以前都冇留意過呢間茶飲，直至早輪換上新包裝聯乘，就多左好多人拎黎打卡。咁見艋舺夜市有，順手飲埋。
餐牌供應茗茶、奶茶、果茶、多多、朱古力、冰淇淋、薑母系列，定價NT20-70；可自選冰度、甜度；加料有粉圓、椰果、珍珠、仙草等。
凍飲、熱飲都有提供hello kitty杯；熱飲係紙杯，圖案較細密。為杯而來要留意，只有大杯裝飲品有。
仙草凍奶茶 微冰少糖 NT50/大
又大杯又抵飲，仙草份量超多，約佔一半，點微糖少冰。
奶味唔會過重，已經算飲到有茶味，唔係齋奶。
仙草凍入口滑溜，味道清香。少糖剛好，係呢幾日飲過比較正常嘅台茶
清心福全冷飲站
地址：萬華區廣州路217號
不要對我尖叫
用餐日期：2017/12/22
「喜好真誠，討厭諂媚，但我不說」「不要對我尖叫。」
呢間係其中比較新，由藝人丫頭投資，位於中山站，裝潢文青fu，簡約線條畫出插畫標誌，霓虹燈牌亦吸引好多人前來打卡。
店名幾有趣，齋睇唔會知道係飲品店 -「不要對我尖叫」，原本都冇諗住專登黎，不過呢幾隻字好入腦
餐牌選擇不多，有原茶、花茶、抹茶、牛奶、可爾必田、冬瓜等，定價NT40-80。添加配料NT10，有爆漿珍珠、白玉、地瓜芋圓、奶蓋等。
飲品唔算特別平，但杯子比較高身，所以可以接受。
可可牛奶 加爆漿珍珠 NT70
台式飲品黎講算比較貴(?) 味道只是還好 ，可可同牛奶比例半半，
爆漿珍珠幾新奇， 屬於大粒， 咬落會咇啲百香果汁出黎，類似牛乜火鍋 任唧乳酪嗰種彩色珍珠味，亦即係某啲雞蛋仔店嘅蜂蜜爆珠，exactly一樣口感。
好唔好食見仁見智 ，如果為煙韌而點珍珠， 相信會失望。
冬瓜菊花 NT40
睇番好多人話係招牌， 影相效果不俗 ，有明顯分層。杯底有一朵朵菊花， 然後有冬瓜茶、糖漿咁。
都有清香菊花味 ，但並沒有很特別嘅記憶點，幸好唔會太甜。
不要對我尖叫
地址：台北中山區中山北路二段16巷9號
一芳水果茶
用餐日期：2017/12/23
去到最後一日，依然係台式飲品，原本仲想試良辰吉時，吐糟，營業時間去到還未營業。
喺ATT潮聖完醒醒柴犬粉糰子，樓下就有好多飲品店、小食店，即管試埋一芳啊。
雖然喺香港、深圳都有一芳，又聽講香港嘅質素一般。但都要喺台灣飲，因為人地平一截嘛
餐牌供應原茶、花茶、古早味茶、果茶、鮮奶茶、甘蔗類、冬天限定嘅薑茶，定價NT25-70。配料有粉圓、愛玉等，甜度、冰度可自選。
試過好多呢類茶飲店嘅水果茶，對味道都唔係十分之滿意。咁但因為一芳主打水果茶，都要一試啦。
一芳水果茶 NT60/大
週六人頭湧湧，等左接近15分鐘。水果茶唔算好大杯，點左少糖、正常冰。
裡面有檸檬、蘋果、百香果等，飲落非常清涼，當日真係超熱，有即時解渴感覺。
少糖剛好，唔會太甜。同大部分水果茶一樣，以百香果作為基礎，平時飲嗰啲味道都幾霸道。
但我地就幾鐘意一芳嘅百香果，甜得黎唔會蓋過哂其他水果嘅味，而見仲有茶味保留
特別係另一半本身唔係太鐘意百香果，都覺得唔錯。成日喺香港都想飲番，但又淆底，驚破壞印象。
唯一就係裡面有太多生果，可以飲到嘅野唔多，even已經係大杯裝。而且杯蓋係啤死左，唔預你食番啲水果，哈哈
一芳水果茶
地址： 台北市信義區松壽路12號(Att 4 fun)1樓
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表
吃貨夫婦 (51)
