離開東海大學、彩虹眷村,我地就往下一站出發,喺彩虹眷村乘坐56號公車往西區,於美術館站下車,車程約30分鐘,到美術館站係為左黎附近嘅審計新村走走
審計新村前身係省政府時期嘅審計處員工宿舍之一,後來已荒廢多年。近年規劃為青年創業基地,經過翻新,咖啡店、甜品店、皮具、飾品店等進駐。
不時會舉辦市集、工作坊,成為台中頗受歡迎嘅文創點。當中嘅甜品店-序曲Overture亦係唔少本地人、遊客嘅口袋名單
雖然有部分商店、食店裝修過,但舊式公寓嘅結構依然保留,建築已有多年歷史,隱約可見昔日居民生活過嘅痕跡。而紅磚牆、鐵鏽樓梯等都成為文青打卡位置。
當日係平日,未見市集,唔算好熱鬧,但氣氛悠閒,係消磨時間嘅好地方,而且仲搵到有唔少人氣餐廳,不妨一來
審計新村
地址:西區民生路368巷4弄8號
粉專:https://www.facebook.com/ShenJiNewVillage/
呢家序曲Overture係我地嘅目的地,本身喺台中北屯區有店,兩店供應款式有所不同。如果要食戚風,到太原店;要食千層,就要去審計366。
小店裝潢簡約樸實,保留舊宅風味,用上木枱木櫈。甜品店分為上、下兩層,於地下點單,位置唔算好多,空間感足,都算坐得幾舒適。
平日下午茶時間都有唔少客人,但點都會比假日悠閒,用餐限時1個半小時,每人低消一品項。
餐牌供應撻類、蛋糕類,定價NT120-240。飲品有原葉茶、花茶、拿鐵、抹茶、氣泡飲品等。
伯爵拿鐵 NT150
雖然冇花巧嘅擺盤,只係簡單嘅玻璃杯,但內涵不錯。奶層頗厚,但混合後伯爵茶味都未有被蓋過,甜度適中
美人鐵觀音千層蛋糕 NT180
千層有幾款口味,抹茶、紅烏龍、鐵觀音,定價NT175-180,原本我係睇中黑色嘅伯爵千層,但當日未見,揀左同樣幾特別嘅鐵觀音口味。
千層有16層,面頭有鐵觀音淋醬,千層都唔算好厚,入口綿滑唔會粗糙感,奶油抹得平均,茶味主要來自淋醬
我諗起西環嘅千層蛋糕,口感有點相似,未至於去到ladym咁薄咁creamy。
聖誕樹 NT240
呢款屬於期間限定產品,最底係抹茶撻,上面係抹茶戚風蛋糕、抹茶忌廉、草莓、紅莓等。一如大家所言,抹茶味香濃,忌廉較稠黏,甜度唔高。
蛋糕偏濕潤,唔屬於輕盈,草莓食落好清甜,稍為平衡蛋糕嘅膩,否則單食蛋糕會有飽腹感
底層嘅抹茶撻面頭仲鋪左藍莓,相當足料,撻面嘅忌廉冇咁稠,入口較細滑。撻皮脆口,曲奇味唔重,要慢慢咀嚼先試到。
本身單點一個抹茶撻都NT120,咁聖誕樹都幾抵,而且可以順道試埋原本只有太原店先有供應嘅戚風蛋糕。
雖然呢個甜品唔甜,但始終有三層戚風,加上忌廉,都會比較飽滯,最好都係開心share。
序曲Overture 審計366
地址:台中市西區民生路366號
營業時間:12:00-19:30
粉專:https://www.facebook.com/overture366/
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表