地芋添糖

用餐日期:2017/12/20

已經黎到台中最後一日,因為馬上就要落去台北,除左想大量灌入台式飲品,仲要去埋口袋名單呢家甜品店,想試好耐了。

地芋添糖位於錦新街,益民商圈「步行街」,位置唔難搵,因為我地本身已經食左蛋餅、舒芙蕾鬆餅、同兩杯台茶,本住點都要一試嘅心態行過黎,幸好冇令我地失望

睇過有唔少iger分享,見到啲相七彩繽紛嘅珍珠、手工芋圓被吸引過黎,所以話網絡嘅宣傳何其重要,始終台灣嘅食店咁多,齋睇旅遊書都好難試到啲小店

店名「地芋添糖」,原來係食左字,普通話讀起來就係「地獄天堂」,哈哈。

IMG_4347.JPG


門外都展示不少自家製嘅產品

IMG_4348.JPG

甜品店位置不少,空間感足,以白色為主調,半開放式廚房,隱約可以見到店員喺工作室中製作產品,配料透明度高,點單可以見到實物

IMG_4350.JPG

IMG_4352.JPG

餐牌主要供應剉冰、甜湯等,配上好多唔同款式嘅包心圓、珍珠等配料,價錢唔貴,每人低消一份甜品,繁忙時間限用餐60分鐘。

除左固定款式甜品,亦可以自由選擇配料,兩款配料NT45,三款則NT50,可以再加錢追加手作配料例如包心粉圓、雙色芋薯圓。

IMG_4377.JPG

包心粉圓、珍珠、芋薯圓等強調無化學成份,無添加色素、香料、糖精,珍珠嘅顏色主要來自蔬果,每日新鮮製作,所以供應款式會有所不同。

IMG_4349.JPG

可惜我地係遊客,佢地嘅手作產品需要冷藏,否則真係好有興趣帶番黎香港自家製

IMG_4357.JPG

剉冰自由配 NT65 (粉粿、珍珠、手作綜合包心粉圓)

首先十選二配料,我地揀左粉粿、珍珠,喺NT45嘅基礎下加配手作綜合包心粉圓NT20,共NT65。

剉冰份量相當多,足夠二人分享,店主人好好,相信見到我地係遊客,短時間難以回訪,所以就送左幾粒店家嘅招牌雙色芋薯圓俾我地試試,佢話黎到一定要試啊,再次感謝

IMG_4360.JPG

IMG_4361.JPG

粉粿、珍珠、包心圓嘅口味非常多,而且好特別。粉粿方面有梔子花、寶山紅糖口味,仲有季節限定款式,例如蝶豆花、桂花、火龍果等,不過當日未見。

粉粿切粒,外型似啫喱糖,但口感更柔軟味道清新,梔子花粉粿仲加入人手炒芝麻,好有誠意,但味道上就以紅糖較突出

IMG_4376.JPG

手工包心圓有芝士、雪蓮子、粟米、堅果、大豆、花生、毛豆等口味,隨機分配,包心圓嘅外皮煙韌晶瑩,隱約可以見到裡面係咩材料,口感粒粒唔同

較為得意係芝士,鹹甜交錯感覺突出。其次係毛豆,製作工序好花功夫,比較少見

IMG_4373.JPG

珍珠五顏六色,有紅蘿蔔、洛神花、老薑、有機薄荷、蕃茄、菠菜、黑木耳、芝麻等口味;不過唔係每日都有咁多款式,視乎當日供應。

部分由顏色、質感可以睇得出係咩味,例如芝麻、蝶豆花。有啲較為相近嘅就一路食一路估下係咩味道,幾好玩。

珍珠偏細粒,食落幾煙韌有彈性,如果再大粒啲更得我心。要數到最特別一定係老薑,薑味十足,但唔會太嗆喉

IMG_4375.JPG

至於店主請我地食嘅芋薯圓都係呢度招牌,可以一試呢,芋圓冇添加糯米粉,芋味唔係一入口就有,經嘴嚼口慢慢散出天然芋香,除左煙韌,居然仲保留左芋頭嘅口感,好新鮮

IMG_4355.JPG

地瓜圓亦係第一次食到嘅比例,用上兩種蕃薯製成,所以有兩種顏色,一半偏黃,一半偏橙色。賣相靚啲,地瓜味都會更突出,甜度唔高。

又八掛又見店主幾好傾,佢透露地瓜圓係用左黃金地瓜、紅地瓜製成,做法相當花功夫,經過慢火窯烤地瓜脫水將味道濃縮再各自做成兩種粉圓,再經手工結合成為雙色地瓜圓。

IMG_4374.JPG

同好多台式剉冰一樣並非細滑類,冰底加入左少少蔗糖,甜度適中。

最主要係感受到小店製作用心,對食材講究,一人食一個都唔過份啊,有機會去台中都會回訪。

IMG_4363.JPG


地芋添糖

北區錦新街28-3號

粉專:https://www.facebook.com/heavenlysweet2015/


檢視較大的地圖


Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com

    I'm Carol 發表在 痞客邦 留言(0) 人氣()