姚酸菜魚
用餐日期:2017/12/25
同另一半已經過左好多年聖誕,大餐食過,唔係太享受大時大節俾人搵笨嘅感覺,所以近年我地都冇特別去慶祝
今年聖誕節正日我地又係北上,下午去完唱完K就梗係順手食埋飯,曾經有一次分享酸菜魚嘅時候,有朋友留言話太二酸菜魚可以一試,於是我都一直記喺心上
到認真睇評價時就嚇一嚇,聽講人龍不是蓋的,加上時間有點夜,接近關門,只好將太二暫時擱置。
購物公園商場唔算好豪華,不過都有唔少食店,喜茶啊、探魚啊、巴蜀風月、姜虎東烤肉都有,咁話哂都係假期,周圍都好多人,快手快腳搵到呢間姚酸菜魚。
餐廳日多人應該係六、七點鐘,我地都比較夜,就唔需要等位,直接入座,可惜係有不少菜式已經售罄。
餐牌選擇較少,主打酸菜魚,另有配料、涼菜、小食等,定價唔算好貴,人均百零蚊人民幣啦。
酸菜魚鍋上,唔係烤魚,唔會有熱爐保溫,魚有兩款,西貢巴沙魚、鱸魚分成三個份量,小/中/大分別定價RMB¥98/128/189。鱸魚同巴沙魚約相差十至二十蚊,所以大部分人都會選擇鱸魚,覺得好食啲啦。
不過時間太夜,鱸魚已經冇哂,只係剩番巴沙魚,呢種魚都係平價野,一般腥味較重,通常用黎做重口味菜式。
巴沙魚 RMB¥98/2人份、寬粉皮 RMB¥5、芋絲 RMB¥9
單點酸菜魚得,亦可以飲湯、食魚再追加配料,以素菜為主,例如金菇、芋絲、木耳等容易滲入湯汁嘅配菜,定價RMB¥5-10。
我地就追加左寬粉皮、芋絲,預先加入酸菜魚鍋中,唔會另上。
酸菜魚份量多,兩至三人用可以,睇落就有好多辣椒、花椒、酸菜等,魚肉大量,幾足料。酸菜魚嘅味道冇預期咁辣,酸度就好足,個人認為可以再辣啲
魚肉又大件又厚身,細骨唔多,食落都好嫩滑有彈性,亦冇腥味,咁多魚魚從哪裡來。湯底唔係十分之油膩,但未至於可以拎黎飲。
芋絲份量都多;寬粉皮質地偏硬身,細細一條好難夾起,有點狼狽。
本來想點多幾款涼菜,小食,但有部分已經賣哂
椒麻雞 RMB¥39
雞反而做得幾辣,少麻,面頭嘅花生碎加添口感,亦更香口。雞肉唔係非常嫩,但入口都唔柴,肉比骨多,幾好送飯
刀拍青瓜 RMB¥6
價錢夠哂平,主要係蒜味,唔辣的,幾爽脆。
姚yao椰青凍 RMB¥18
其實就係椰凍,椰味清甜,口感爽滑,不過唔多夠凍。
紅心火龍果 RMB¥19
很大一杯,唔會有糖水感。
其他收費:白飯 RMB¥3、餐位費 RMB¥5/位
酸菜魚質素中規中矩,消費唔高,大時大節食餐飯黎到深圳選擇多啲。太二!等等我,有機會食你的
姚酸菜魚
地址:福華三路星河cocopark商場三樓L3C-002A號商鋪
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表