再窮都要去旅行！

蘭苑饎館

用餐日期：2018/01/18

對於中式糖水有種固執，我好多時都係食芝麻糊、杏仁露，而男朋友好多時都食合桃露，好處係可以容易比較各店嘅分別。

呢間蘭苑饎館明明喺公司附近，照道理就應該一早試過，但今次係第一次黎，好多時行過路過專登黎過都食唔到，有時食飯時間人地滿滿人潮，咁我又唔好意思話入黎食碗糖水；有時又時間太夜

有時又行過黎途中俾其他糖水店吸引左。今次係專程飯後行番過黎，留肚，一心衝著佢地嘅糖水而來

黎到都仲有半個鐘就關門，眼見都有唔少客人食緊正餐，咁我地食左野，所以就冇留意正餐有咩食，但知道都有唔少人鐘意呢度嘅中式野，話哂都係米豬蓮餐廳。

裝潢幾有中國風，木枱木櫈、傳統印花餐具。甜品供應傳統中式野，馬蹄露、雪耳、木瓜、西米露、杏仁、芝麻、合桃、開心果、甜湯等，定價18蚊至3、40蚊。

另外有啲標榜不含香料味精嘅多款糕點，紅豆、馬豆、菠蘿、紅莓、桂花、馬蹄、開心果、藍莓糕等，迷你size定價$12-16。

藍莓糕 $14

開心果糕 $16

價錢都唔算平，都係預先整好嘅糕點，點單後拎入廚房倒番出黎，size就係正常麵包鋪見過嘅杯裝布丁咁上下。

當你懷疑緊開心果顏色嘅時間，餐牌會替你釋疑寫明出品不含香料、人造色素，採用天然材料製成。 聽過係用過伊朗嘅開心果，我見識較少，原來咁翠綠色架

同平時食開嘅糕點，質地差不多，口感唔會太實太黏，幾彈手。

第一次食開心果糕，同平時食開心果、或者開心果雪糕好唔同，味道係慢慢滲出黎，唔係一野衝擊味蕾。都知道有啲人覺得淡，可能係俾佢鮮明顏色影響，先入為主認為應該好濃吧。

開心果糕比糊較甜一點，我就覺得幾好食

藍莓糕晶瑩啲，色澤自然，從外表見到明顯果肉，類似果乾、西莓咁嘅濕濕腍腍質地。食落唔係太藍莓，偏酸清新，好似山渣咁。

開心果糊 $34

最近試過幾間中式糖水店，以呢度嘅質地望落最濃稠，目測已經知道係我地鐘意嘅口感。

搞佢幾下，就會見到稠度好高，顏色同開心果糕一樣。相對而言，開心果味更清淡一點，甜度都低啲。

顏色驚豔，但味道自然，冇堅果嘅燶味或者熱氣感，稠身得黎唔會封喉，最重要唔係周街都食到

補腦合桃露 $33

溫度適中，色澤同質地都很對辦，濃稠度同開心果糊一樣。合桃露比較厚，都足以稱為糊。 個人唔鐘意太滑溜，亦都唔鐘意太鞋，好麻煩，呢個剛好，唔會好似成堆粉推出黎咁。

保留合桃口感，又唔會多到起渣，入口有香濃合桃味，都算係近期食過比較有水準的

整體兩個人食左接近一百蚊，因為第一次黎，又點糕又點糖水。其實單睇糖水30零蚊都好合理。

今次一試，個人認為幾滿意，如果想食中式糖水，我會再訪試埋其他產品

蘭苑饎館

Follow us:

Instagram: http://bit.ly/2g3ZtuS

Facebook: http://bit.ly/2gu1fIG

Blog: http://bit.ly/ywycarol

Contact us: mrmrsfoodhk@gmail.com