喜樂牛肉麵
用餐日期:2017/12/22
上午只係食左蔥抓餅跟喝了台茶就直接出發去【戲曲中心】影相,都有點肚餓,既然已經身處芝山站,反正係同一條捷運線,就去埋淡水。
喜樂牛肉麵位於淡水,麥當勞直入便是,係隨手喺網上見到,並非口袋名單。
麵店明顯有點老店feel,由兩夫婦打理,先生煮麵,太太落單打掃,很地道,裝潢較為簡約,位置頗多,類似飯堂,純粹用食物質素留住顧客吧
即使係星期五,都有不少本地客人。
牆上嘅小黑板寫住:兩個人食一碗,不賣;不提供加湯;不提供空碗;不幫打包,謝謝。
啊,你幾型幾有性格喎,寫清寫楚冇數拗,突然都令我諗起香港嘅裕興大排檔。
雖然見到有部分評語話人地態度一般,咁我又唔覺得,只係比大部分食店來得冇咁熱情,實事求事,冇乜表情而已。
餐牌選擇唔多,主要供應牛肉麵,分清墩、紅燒湯底,可選牛雜,半雜半肉,甚至單點湯都可以,定價NT90-150。
紅燒牛肉麵 NT130
清墩牛肉麵 NT130
喺遊客區都唔算貴啦,你諗下永康嗰啲都過二百。牛肉份量很多,蓋過整碗麵,輕輕一數,都超過十件,講緊係35蚊港幣一碗咋
平時好多麵店,好似老張或者永康都係用牛肋條做,口感會嫩腍啲,一咬散開;呢度就用上腩位,多一份噍頭,牛味挺重的。
湯底睇落唔會好油膩,即使係紅燒湯頭,都唔會油淋淋,很清澈。飲落就冇咁重口味,少一種辣味,所以我都要加番少少辣椒油。
麵條份量亦多,很喜歡佢地嘅麵質,煙韌滑溜,又唔會腍得快,食完冇飽滯感
至於清墩牛肉麵都係一樣,只係冇左紅燒味道,用牛肉熬出,好罕有地我飲哂成很湯,不覺有味精感。
牛肉湯可供外賣作火鍋湯底,可見店家對自己嘅湯,都有一定嘅信心。
鐘意食酸菜嘅朋友,點完麵後,老闆娘會擺低一大兜酸菜,可以任加啊,夠哂大方。
總括而言,我地都好滿意呢間喜樂牛肉麵,俾人感覺好地道,加上麵條出色,不遜於名牌牛肉店但如果食開重口味永康,呢度未必啱你。
但聽講佢地公休時間只作參考,「愛開不開」,令好多粉絲都轉投同區嘅京華牛肉麵懷抱。
喜樂牛肉麵
地址:新北市淡水區中正東路35巷12號
Follow us:
Instagram: http://bit.ly/2g3ZtuS
Facebook: http://bit.ly/2gu1fIG
Blog: http://bit.ly/ywycarol
Contact us: mrmrsfoodhk@gmail.com
留言列表